ۇكىمەتتە شەكاراداعى وتكىزۋ بەكەتتەرىن جاڭعىرتۋ ماسەلەسى تالقىلاندى
18 تامىز 20:40

ۇكىمەتتە شەكاراداعى وتكىزۋ بەكەتتەرىن جاڭعىرتۋ ماسەلەسى تالقىلاندى

نۇر-سۇلتان. قازاقپارات – ە ا ە و سىرتقى شەكاراسىنداعى 9 كۇرە جول مەن ءبىر تەمىرجول وتكىزۋ بەكەتىن جاڭعىرتۋ جۇرگىزىلىپ جاتىر.

بۇل تۋرالى بۇگىن قازاقستاننىڭ كەدەندىك ينفراقۇرىلىمىن جاڭعىرتۋ ماسەلەلەرى جونىندە ق ر پرەمەر-ءمينيسترى ءاليحان سمايىلوۆ وتكىزگەن كەڭەستە ايتىلدى، دەپ حابارلايدى قازاقپارات primeminister.kz سايتىنا سىلتەمە جاساپ.

ق ر قارجى مينيسترلىگى مەملەكەتتىك كىرىستەر كوميتەتىنىڭ ءتوراعاسى دانيار جانالينوۆ قازىرگى ۋاقىتتا ە ا ە و سىرتقى شەكاراسىنداعى توعىز كۇرە جول مەن ءبىر تەمىرجول وتكىزۋ بەكەتىن جانە نۇر-سۇلتان قالاسىنداعى ق م م ك ك باس ديسپەتچەرلىك باسقارماسىن جاڭعىرتۋ جانە تەحنيكالىق جاراقتاندىرۋ جۇرگىزىلىپ جاتقانىن حابارلادى.

رەكونسترۋكتسيالاۋ ەكى كەزەڭمەن جۇزەگە اسىرىلماق، ياعني 2022-2023-جىلدارى - «دوستىق اۆتو»، «دوستىق ت/ج»، «مايقاپشاعاي»، «باقتى»، «قالجات»، «تاجەن»، «قاپلانبەك»، «تەمىر بابا»، ال 2023-2024 -جىلدارى - «اتامەكەن»، «قازىعۇرت» جانە ب د ب وتكىزۋ بەكەتتەرى جاڭعىرتىلاتىن بولادى.

ناتيجەسىندە ولاردىڭ وتكىزۋ قابىلەتى 8 ەسەگە دەيىن ۇلعايىپ، ءوتۋ ۋاقىتى 2 ساعاتتان 25 مينۋتقا دەيىن قىسقارادى. سونىمەن قاتار بيزنەس-پروتسەستەردى اۆتوماتتاندىرۋ، كەدەندىك باقىلاۋدى ورتالىقتاندىرۋ جانە سىبايلاس جەمقورلىق تاۋەكەلدەرىن بارىنشا ازايتۋ جونىندەگى شارالاردى قولعا الۋ جوسپارلانعان.

بۇگىنگى كۇنى جوبالىق-سمەتالىق قۇجاتتاردىڭ ءبارى ازىرلەندى. قۇرىلىستىڭ باستاپقى كەزەڭىندە بارلىق نىساندار بويىنشا ساپالى جانە ۋاقىتىلى ورىندالۋىن باقىلاۋ ءۇشىن جۇمىس كەستەلەرىن بەكىتۋ كوزدەلگەن.

كەڭەس قورىتىندىسى بويىنشا ءاليحان سمايىلوۆ سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىنە جاڭعىرتىلاتىن بەكەتتەردە بايلانىس ارنالارىنىڭ وتكىزۋ قابىلەتىن ارتتىرۋ ماسەلەسىن پىسىقتاۋدى تاپسىردى.

«وسى بەكەتتەر ارقىلى تاۋار اينالىمىنىڭ ۇلعايۋىنا بايلانىستى بيۋجەتكە قوسىمشا تۇسىمدەر تۇسەدى. بۇل رەتتە جوبانى ىسكە اسىرۋدى تەزدەتۋ قاجەتتىگىنە نازار اۋدارعىم كەلەدى»، - دەدى پرەمەر-مينيستر.

جاڭالىقتار