الماتىدا ءدامحانا داياشىسى ازىق-تۇلىك دۇكەنىنە قارۋلى شابۋىل جاسادى
18 تامىز 20:24

الماتىدا ءدامحانا داياشىسى ازىق-تۇلىك دۇكەنىنە قارۋلى شابۋىل جاسادى

الماتى. قازاقپارات - الماتىدا ءدامحانا داياشىسى بولىپ جۇمىس ىستەيتىن 24 جاستاعى ەر ادام ازىق-تۇلىك دۇكەنىنە قارۋلى شابۋىل جاسادى، دەپ حابارلايدى قازاقپارات ءتىلشىسى.

بوستاندىق اۋدانىندا تۇنگى ساعات 01.00 دە ازىق-تۇلىك دۇكەنىنە قارۋلى شابۋىل جاسالدى.

«روزىباكيەۆ كوشەسىندە تاۋلىك بويى جۇمىس ىستەيتىن ازىق-تۇلىك دۇكەنىنە بەلگىسىز بىرەۋ كليەنت بولىپ كىرىپ، قارۋ قولدانۋ ارقىلى كاسساداعى اقشانى ۇرلاعان. كۇزەتشى مەن كاسسير ومىرلەرى ءۇشىن قاۋىپتەنىپ، توناۋشىنىڭ تالابىن ورىنداپ، تۇسكەن اقشانى بەرگەن. قىلمىستى اشۋ ماقساتىندا كريمينالدىق پوليتسيانىڭ تاجىريبەلى جەدەل قىزمەتكەرلەرى مەن اۋداندىق پوليتسيا ءبولىمىنىڭ ءتارتىپ ساقشىلارىنان ارنايى جەدەل-ىزدەستىرۋ توبى قۇرىلدى. ءبىر تاۋلىكتەن سوڭ پوليتسيانىڭ ارنايى جاساعىنىڭ كومەگىمەن كۇدىكتى قولعا ءتۇستى»، - دەدى الماتى قالالىق پوليتسيا دەپارتامەنتى باستىعىنىڭ ورىنباسارى ديدار احانوۆ.

ونىڭ ايتۋىنشا، كۇدىكتى داياشى بولىپ جۇمىس ىستەيدى. ءدامحاناداعى كيىم اۋىستىراتىن بولمەدە سومكە تابىلىپ، وندا ايعاق زاتتار انىقتالدى.

«اتاپ ايتقاندا، مىلتىق، كۇدىكتىنىڭ توناۋ كەزىندە كيگەن كيىمدەرى مەن باسقا دا قۇرالدار بولدى»، - دەدى ديدار احانوۆ.

بەلگىلى بولعانى، كۇدىكتى - شىمكەنت قالاسىنىڭ 24 جاستاعى تۇرعىنى. الماتىعا تابىس تابۋ ءۇشىن كەلگەن.

«ونىڭ ازىق-تۇلىك دۇكەندەرىنە جاسالعان تاعى ەكى قاراقشىلىق شابۋىلعا قاتىسى بارى انىقتالدى. قازىر ساراپتاما جۇرگىزىلىپ جاتىر. كۇدىكتى ۋاقىتشا ۇستاۋ يزولياتورىنا قامالدى»، - دەدى دەپارتامەنت باسشىسىنىڭ ورىنباسارى.


جاڭالىقتار