قازاقستاندىقتار شىلدە ايىندا قانشا التىن قۇيما ساتىپ العانى بەلگىلى بولدى
18 تامىز 17:12

قازاقستاندىقتار شىلدە ايىندا قانشا التىن قۇيما ساتىپ العانى بەلگىلى بولدى

نۇر-سۇلتان. قازاقپارات - 2022-جىلدىڭ شىلدە ايىندا ەكىنشى دەڭگەيلى بانكتەر مەن بانكتىك ەمەس جەكەلەگەن ايىرباستاۋ پۋنكتەرىندە جالپى سالماعى 97,4 كەلى 2712 التىن قۇيما ساتىلدى. بۇل تۋرالى قازاقپارات ۇلتتىق بانككە سىلتەمە جاساپ حابارلايدى.

حالىققا تازارتىلعان التىن قۇيمالاردى ساتۋ باعدارلاماسى جۇزەگە اسقالى جالپى سالماعى 3,36 تونناعا جۋىق 99451 التىن قۇيما ساتىلعان.

التىن قۇيمالار بەس ءتۇرلى سالماقتا ۇسىنىلادى: 5، 10، 20، 50 جانە 100 گرام. ساتىپ الۋشىلار اراسىندا وتە جوعارى سۇرانىسقا يە ءتۇرى - 10 گرامدىق التىن قۇيما. جالپى ساتىلعان قۇيمالار اراسىندا ونىڭ ۇلەسى - %26، ياعني، 25589 دانا. ودان كەيىن 20 گرامدىق قۇيما سۇرانىسقا يە، 21484 دانا (%22) ساتىلعان، 5 گرامدىق قۇيمادان 20735 دانا (%21)، 100 گرامدىق قۇيمادان 19708 دانا (%19)، 50 گرامدىق قۇيمادان 11935 دانا (%12) ساتىلدى. التىن قۇيمالار الماتى، نۇر-سۇلتان جانە اتىراۋ قالالارىندا كوپ ساتىلادى.

التىن قۇيمالار سەنىمدى ينۆەستيتسيا قۇرالى بولا الادى. التىن قۇيمالار نارىعىنداعى وتىمدىلىكتىڭ باستى كەپىلى - بانك پەن بانكتىك ەمەس ايىرباستاۋ پۋنكتەرى كليەنتكە اقشانى سول كۇنى تولەي وتىرىپ، التىن قۇيمالاردى كەرى ساتىپ الا الادى.

باعدارلاما ىسكە قوسىلعالى ەكىنشى دەڭگەيلى بانكتەر مەن بانكتىك ەمەس جەكەلەگەن ايىرباستاۋ پۋنكتەرى جالپى سالماعى 379 كەلى 15279 التىن قۇيمانى كەرى ساتىپ العان، بۇل - جالپى ساتىلعان قۇيمالاردىڭ %15. ولار كەرى ساتىپ العان التىن قۇيمالاردىڭ بارلىعى دەرلىك ۇلتتىق بانكتىڭ فيليالدارى ارقىلى حالىققا ساتىلادى.

ءاربىر قۇيما قورعاۋ ەلەمەنتتەرىمەن قاپتالعان (قۇيمانىڭ اينا بەتى، ميكروتەكست جانە جيەگى بار) جانە ارنايى قوراپقا سالىنىپ شىعادى، سول ارقىلى قۇيمانىڭ اشىلعان-اشىلماعانىن وڭاي تەكسەرۋگە بولادى. قورعاپ تۇراتىن قوراپ، سونداي-اق ساپا سەرتيفيكاتى بولىپ سانالادى. سوندىقتان، التىن قۇيمانى ۇقىپتى ساقتاپ، قورابىن بۇلدىرمەۋگە كەڭەس بەرەمىز.

قازىر التىن قۇيمالاردى Halyk Bank، ەۋرازيالىق بانك، Jusan Bank، سەنتركرەديت بانكى، سونداي-اق جەكەلەگەن بانكتىك ەمەس پۋنكتەردەن ساتىپ الىپ، كەرى ساتۋعا بولادى.

جاڭالىقتار