اسحات ايماعامبەتوۆ بالاباقشالاردىڭ تەكسەرۋدەن جالتارۋ ءادىسىن اتادى
18 تامىز 16:57

اسحات ايماعامبەتوۆ بالاباقشالاردىڭ تەكسەرۋدەن جالتارۋ ءادىسىن اتادى

نۇر-سۇلتان. قازاقپارات - جەكەمەنشىك بالاباقشالارعا ليتسەنزيالاۋ ەنگىزۋ ءماجبۇرلى ءىس-شارا. بۇل تۋرالى ق ر وقۋ-اعارتۋ ءمينيسترى اسحات ايماعامبەتوۆ ايتتى، دەپ حابارلايدى قازاقپارات ءتىلشىسى.

«اتتەستاتسيا بەس جىلدا ءبىر رەت وتكىزىلەدى. قازىر مىناداي مۇمكىندىك ويلاپ تاۋىپ الىپتى. ولار «ەشتەڭە ەتپەيدى، ءتورت جىل جۇمىس ىستەدىك» دەيدى دە بەسىنشى جىلى جابىلادى. سودان كەيىن قايتادان جاڭا مەرزىمگە اشىلىپ، «ءبارىمىز جاڭا سۋبەكتىمىز» دەيدى. ءبىراق بۇل ارەكەتتەن ەڭ الدىمەن كىم بارىنەن زارداپ شەگەدى؟ بالا، تاربيەلەنۋشى زارداپ شەگەدى»، - دەدى اسحات ايماعامبەتوۆ.

وسى ورايدا مينيستر ليتسەنزيالاۋدى ءماجبۇرلى تۇردە ەنگىزۋ جوسپارلانىپ وتىرعاندىعىن اتاپ ءوتتى.

«سوندىقتان ءبىز بۇل شارانى ەنگىزۋگە ءماجبۇرمىز. ءىس جۇزىندە بۇل ءبىز ءۇشىن رەسۋرستار، قاراجات، ۋاقىت، نازار اۋدارۋعا الىپ كەلەدى. ەشكىم مۇنى بىرەۋگە پايدالى دەپ سەندىرۋگە تىرىسۋ ءۇشىن جاسامايدى. بۇل ەڭ الدىمەن، بالالار مەن قوعامعا ءتيىمدى»، - دەپ اتاپ ءوتتى ول.

جاڭالىقتار