بالاباقشالاردى ليتسەنزيالاۋدا قاتال تالاپ بولمايدى - ايماعامبەتوۆ
18 تامىز 15:40

بالاباقشالاردى ليتسەنزيالاۋدا قاتال تالاپ بولمايدى - ايماعامبەتوۆ

نۇر-سۇلتان. قازاقپارات - بالاباقشالاردىڭ 95 پايىزى مەكتەپكە دەيىنگى ۇيىمداردى ليتسەنزيالاۋ جۇيەسىنە قولداۋ كورسەتىپ وتىر.

بۇل تۋرالى ق ر وقۋ-اعارتۋ ءمينيسترى اسحات ايماعامبەتوۆ ايتتى، دەپ حابارلايدى قازاقپارات ءتىلشىسى.

«جەكە ۇيىمدار قاۋىمداستىقتارىنىڭ باسىم كوپشىلىگى بۇل باستامانى قولدايدى، تولىق قولدايدى. جاقىندا عانا Amanat پارتياسى جانىنداعى كوميسسيانىڭ وتىرىسى ءوتىپ، ليتسەنزيالاۋدى ەنگىزۋ ماسەلەسى قارالدى. مەنىڭشە، وسى وتىرىستا مەكتەپكە دەيىنگى ۇيىمداردىڭ قاۋىمداستىقتارى مەن جەكەمەنشىك بالاباقشالاردىڭ قۇرىلتايشىلارىنىڭ وزدەرى، مەملەكەتتىك بالاباقشالار بۇل باستامانى قولداپ قانا قويماي، مەملەكەت وسى راسىمگە جاۋاپكەرشىلىكپەن قاراپ، ونى ەنگىزۋى ءتيىس دەپ ناقتى ايتقان بولاتىن»، - دەدى اسحات ايماعامبەتوۆ.

مينيستر ليتسەنزيالاۋدى ەنگىزۋ كەزىندە مەملەكەتتىك جانە جەكەمەنشىك بالاباقشالارعا بىردەي تالاپ بولاتىندىعىن باسا ايتتى.

«بۇل جەردە تاۋەكەلدەردى ەسكەرۋىمىز كەرەكتىگى تۇسىنىكتى. كەزەڭدىلىك، بالاباقشالار ورىنداي الاتىن كريتەريلەر مەن بىلىكتىلىك تالاپتارى بولۋى كەرەك. بەلگىلى ءبىر شەكتەس ەلدەردە بار كريتەريلەردى قويا المايمىز. ويتكەنى، بىزدە بالالاردى مەكتەپكە دەيىنگى تاربيەمەن قامتۋدى تومەندەتپەۋ مىندەتى تۇرعانىن بايقاپ وتىرمىز. دەمەك، مەكتەپكە دەيىنگى ۇيىمنىڭ عيماراتى مىندەتتى تۇردە مەنشىكتە بولۋى كەرەك دەگەن ماسەلەنى ەشكىم كوتەرمەيدى. ءبىراق، ەندى بالالاردى تەرەزەسى جوق، جەلدەتىلمەيتىن جەرتولەدە تاربيەلەۋگە جول بەرىلمەيدى، ياعني وتە قولايلى جاعداي جاسالادى. دەگەنمەن، كەيبىرەۋلەر نارىقتى يلاندىرۋعا تىرىسىپ جۇرگەنىندەي ەشقانداي قاتال ءىس-شارالار بولمايدى. تالاپ اقىلعا قونىمدى، سايما-ساي جانە قولجەتىمدى بولادى»، - دەپ ءتۇسىندىردى ول.

ايتا كەتەيىك، بۇگىن نۇر-سۇلتان قالاسىندا ى. التىنسارين اتىنداعى ۇلتتىق ءبىلىم اكادەمياسىندا تامىز كونفەرەنتسياسى اياسىندا «ءبىلىم ساپاسىن قامتاماسىز ەتۋدىڭ ۇلتتىق جۇيەسى» تاقىرىبىندا پانەلدىك سەسسيانىڭ جالپى وتىرىسى ءوتىپ جاتىر.

بۇعان دەيىن مينيستر ءبىلىم الۋشىلاردىڭ وقۋ جەتىستىگىن مونيتورينگىلەۋ PISA سياقتى قۇرال بولۋى كەرەكتىگىن ايتتى.

جاڭالىقتار