اتىراۋدا ەكى جارقانات پاتەرگە كىرىپ كەتكەن
18 تامىز 15:10

اتىراۋدا ەكى جارقانات پاتەرگە كىرىپ كەتكەن

اتىراۋ. قازاقپارات - اتىراۋدا ەكى جارقانات تەرەزەسى اشىق پاتەرلەرگە ۇشىپ كىرگەن.

قۇتقارۋشىلار تۇندە ۇشاتىن قۇستاردى ۇستاپ الىپ، ەركىندىككە جىبەردى، دەپ حابارلايدى قازاقپارات.

وبلىستىق توتەنشە جاعدايلار دەپارتامەنتىنىڭ قوعاممەن بايلانىس توبىنان ءمالىم ەتكەندەي، بۇل وقيعا كەشە، 17-تامىزدا تىركەلگەن.

اتىراۋ قالاسىنىڭ ق. ساتپايەۆ كوشەسىندە ورنالاسقان كوپقاباتتى ۇيدەگى ەكى پاتەردىڭ تۇرعىندارى قۇتقارۋشىلارعا قوڭىراۋ شالعان. ولار ۇيلەرىنە جارقاناتتىڭ ۇشىپ كىرگەنىن حابارلايدى.

تۇرعىندارعا كومەك كورسەتۋ ءۇشىن جەدەل قۇتقارۋ جاساعىنىڭ قۇتقارۋشىلارى مەكەنجايعا بارادى. قۇتقارۋشىلار ەكى پاتەردەن جارقاناتتاردى ۇستاپ الىپ، ەركىندىككە جىبەرەدى.

«تامىز ايىندا ەندى عانا قاناتتانعان جارقاناتتار جاڭا قونىس ىزدەيدى ەكەن. سول سەبەپتەن، وسى كەزەڭدە قاناتتى تىشقاندار ابايسىزدا اشىق قالعان تەرەزە ارقىلى پاتەرگە ۇشىپ كىرۋى مۇمكىن. مۇنداي جاعدايدا سابىر ساقتاپ، قورىقپاۋ قاجەت. جارقاناتتى ۇستاۋعا تىرىسپاۋ كەرەك. ەڭ قاراپايىم ءتاسىل - بولمەنىڭ ەسىگىن جاۋىپ، تەرەزەنى اشىپ، ءبىراز كۇتكەن ءجون»، - دەپ كەڭەس بەردى دەپارتامەنتتىڭ قوعاممەن بايلانىس توبىنان.

اتىراۋ وبلىستىق توتەنشە جاعدايلار دەپارتامەنتى قۇتقارۋشىلارىنىڭ ايتۋىنشا، جاز مەزگىلىندە جانۋارلاردى قۇتقارۋعا قاتىستى شاقىرتۋ سانى ارتقان. بۇعان دەيىن قۇتقارۋشىلار شۇڭقىر مەن باتپاققا تۇسكەن ءيتتى، سيىر مەن جىلقىنى، تەرەكتىڭ ۇشار باسىنان جەرگە تۇسە الماعان مىسىقتاردى بىرنەشە رەت قۇتقارىپتى.

جاڭالىقتار