مەكتەپتەردىڭ كەمشىلىگىن كوزگە شۇقىپ، «باستان ۇرا» بەرگەننەن ەشتەڭە شىقپايدى - ايماعامبەتوۆ
بۇل تۋرالى ق ر وقۋ-اعارتۋ ءمينيسترى اسحات ايماعامبەتوۆ ايتتى، دەپ حابارلايدى قازاقپارات ءتىلشىسى.
«بىزدە ءبىلىم الۋشىلاردىڭ وقۋ جەتىستىگىن مونيتورينگىلەۋ بار. بۇل جۇيەنى ارىقاراي دامىتامىز. ويتكەنى، ءبىلىم الۋشىلاردىڭ وقۋ جەتىستىگىن مونيتورينگىلەۋ PISA سياقتى قۇرال بولۋى كەرەك. ەكىنشىدەن، ءبىلىم الۋشىلاردىڭ وقۋ جەتىستىگىن مونيتورينگىلەۋدەن ەشكىم قورىقپاۋى قاجەت. ۇشىنشىدەن، ءبىلىم الۋشىلاردىڭ وقۋ جەتىستىگىن مونيتورينگىلەۋ جانە اتتەستاتسيالاۋ وتكىزگەننەن كەيىن ونىڭ ەشقانداي جازالاۋشى ىقپالى بولماۋ ءتيىس. اتتەستاتسيادان وتپەدىڭىز بە، وندا ءبىرىنشى رەت ول كومەك سياقتى بولۋى قاجەت. ادام اۋىرىپ قالعاندا وعان ەشكىم «اۋىرىپ قالدىڭ» دەپ ۇرىسپايدى عوي. ەگەر مەكتەپكە بارىپ، تەكسەرىس جۇمىسىن جۇرگىزىپ، كەمشىلىكتەردى انىقتاساق، وندا «مىناداي ماسەلەلەر بار، وعان وسىنداي كومەك كەرەك» دەپ ايتۋىمىز كەرەك. سول كومەكتى كورسەتۋ ءۇشىن ءبىلىم اكادەمياسىنان، «ورلەۋدەن» ءبىر توپ شىعىپ، جارتى جىل، 1 جىل كومەكتەسۋى قاجەت. سوندا مەكتەپتەر ولاردى تۇسىنەتىن بولادى»، - دەدى مينيستر.
اسحات ايماعامبەتوۆ مينيسترلىك تاراپىنان كەمشىلىگى بار ءبىلىم بەرۋ ۇيىمدارىنا كومەك كورسەتىلگەنىمەن، ناتيجە شىقپاسا، وندا ول باسقا ماسەلە ەكەندىگىن باسا ايتتى.
«ءبىراق، ۇتقىر توپ جىبەرىپ، كومەكتەسىپ، قاجەت بولسا پەداگوگتەردى كۋرستاردا وقىتىپ، ادەستەمەلىك جاردەم بەرسەك، ناقتى ناتيجە بولادى. ال جاي عانا «مىناۋ جامان، مىناۋ ىستەلمەدى» دەپ، «باستان ۇرا» بەرگەننەن ەشتەڭە شىقپايدى. بەس جىلدان سوڭ كەلسەك، تاعى سولاي تۇرادى»، - دەدى ول.
ايتا كەتيىك، بۇگىن نۇر-سۇلتان قالاسىندا ى. التىنسارين اتىنداعى ۇلتتىق ءبىلىم اكادەمياسىندا تامىز كونفەرەنتسياسى اياسىندا «ءبىلىم ساپاسىن قامتاماسىز ەتۋدىڭ ۇلتتىق جۇيەسى» تاقىرىبىندا پانەلدىك سەسسيانىڭ جالپى وتىرىسى ءوتىپ جاتىر.