قىتايدا تۋۋ كورسەتكىشى قاتتى ءتۇسىپ كەتكەندىكتەن، تۇسىك جاساتۋعا ءىشىنارا تىيىم سالىندى

بەيجىڭ. شينحۋا- قازاقپارات - قىتاي بيلىگى بوسانۋعا دەيىنگى جانە بوسانعاننان كەيىنگى قولداۋعا ارنالعان ءبىرقاتار شارالاردى قامتيتىن، سونداي-اق حالىق سانىنىڭ تەڭگەرىمدى جانە ۇزاق مەرزىمدى وسۋىنە ىقپال ەتۋگە باعىتتالعان «بالا تۋۋدى بەلسەندى تۇردە قولداۋ شارالارىن ودان ءارى جەتىلدىرۋ جانە ىسكە اسىرۋ جونىندەگى نۇسقاۋلىق» دەپ اتالاتىن قۇجاتتى جاريالادى، دەپ حابارلايدى قازاقپارات شينحۋا اگەنتتىگىنە سىلتەمە جاساپ.

دەنساۋلىق ساقتاۋ ىستەرى جونىندەگى مەملەكەتتىك كوميتەت باسقا 16 ورگانمەن بىرلەسىپ جاريالاعان وسى قۇجاتقا سايكەس، بۇل شارالارعا انا مەن بالا كۇتىمى بويىنشا قىزمەتتەردىڭ ساپاسىن جاقسارتۋ، دەكرەتتىك دەمالىس ساياساتىن جاقسارتۋ، تۇرعىن ءۇي جانە سالىق جەڭىلدىكتەرى، سونداي-اق جۇمىس ورىندارىندا بالا تۋۋعا قولايلى جاعداي جاساۋعا جاردەمدەسۋ شارالارى كىرەدى.

سونداي-اق، قىتايدىڭ ۇلتتىق دەنساۋلىق ساقتاۋ كوميسسياسى تۇسىك جاساتۋعا ءىشىنارا تىيىم سالىنعانىن جاريا ەتتى.

قىتاي بيلىگىنىڭ مالىمەتىنشە، 2015-2019 -جىلدار ارالىعىندا ەلدە جىل سايىن ورتا ەسەپپەن 9,5 ميلليون تۇسىك جاسالعان. دەنساۋلىق ساقتاۋ سالاسى شەنەۋنىكتەرىنىڭ ۇسىنىسى بويىنشا، ەندى جۇكتىلىكتى تەك مەديتسينالىق سەبەپتەرمەن عانا توقتاتۋعا بولادى. سونداي-اق، الداعى ۋاقىتتا انالارعا الەۋمەتتىك كومەك كورسەتۋ اياسى كەڭەيىپ، بەدەۋلىكتى ەمدەۋدى قولجەتىمدى بولماق.

قىتايدا تۋۋ كورسەتكىشى بيىل بۇرىن- سوڭدى بولماعان دەڭگەيگە دەيىن تومەندەيدى دەگەن بولجام بار: ەلدە دۇنيەگە كەلەتىن بالا سانى 10 ميلليوننان از بولۋى مۇمكىن (وتكەن جىلى 10,6 ميلليون بالا تۋعان، بۇل - الدىڭعى جىلمەن سالىستىرعاندا %11,5 عا از).

بىرىككەن ۇلتتار ۇيىمىنىڭ بولجامى بويىنشا، 2023 -جىلى ءۇندىستان قىتايدى باسىپ وزىپ، الەمدەگى حالىق سانى ەڭ كوپ ەلگە اينالادى.

ايتا كەتسەك، 1980-2015 -جىلدارى قىتايدا «ءبىر وتباسى - ءبىر بالا» ساياساتى جۇرگىزىلدى. 2016 -جىلى وتباسىلارعا 2 بالا سۇيۋگە رۇقسات بەرىلدى، ال تاعى 5 -جىلدان كەيىن بالا سانى 3-كە جەتتى.