تۇرعىن ءۇي جالداۋ سۋبسيدياسىنا ءوتىنىش بەرۋشىلەر قانداي قاتەلىكتەردى ءجيى قايتالايدى
بۇل تۋرالى «وتباسى بانك» اكسيونەرلىك قوعامىنىڭ باسپا ءسوز قىزمەتىنەن قازاقپارات ساۋالىنا جولداعان جاۋابىندا ءمالىم ەتتى.
«10.08.2022 -جىلعى كورسەتكىشتەرگە سايكەس، جالعا بەرىلەتىن تۇرعىن ءۇيدى سۋبسيديالاۋ بويىنشا «وتباسى بانكىنە» 30 مىڭنان استام ءوتىنىش كەلىپ ءتۇستى. ولاردىڭ 7 مىڭنان استامى ماقۇلدانىپ، 9 مىڭعا جۋىعىن بانك قاراستىرىپ جاتىر. 14630 ءوتىنىش ءتۇرلى سەبەپتەرمەن كەرى قايتارىلعان»، - دەپ جازىلعان جاۋاپتا.
وتىنىشتەردىڭ كەرى قايتارىلۋىنا ءۇش نەگىزگى سەبەپ بار.
«تەكسەرۋ بارىسىندا كەرى قايتارىلعان وتىنىشتەردىڭ دەنى - تىركەۋ كەزىندە SMS ارقىلى جىبەرىلگەن كودتى ەنگىزبەگەن قاتىسۋشىلار نەمەسە ولاردىڭ وتباسى مۇشەلەرى (8153 ءوتىنىش). سۋبسيديا راسىمدەۋ ءۇشىن ءوتىنىش بەرۋشىنىڭ نەمەسە ونىڭ وتباسى مۇشەلەرىنىڭ دەرەكتەرىن وڭدەۋ قاجەت. ال ول ءۇشىن تىركەۋ كەزىندە SMS ارقىلى جىبەرىلگەن كودتى ەنگىزۋ ارقىلى، وزىنە قاتىستى رەسمي مالىمەتتەردى وڭدەۋگە رۇقسات بەرەتىنىن راستاۋى كەرەك. مۇنسىز سۋبسيديا راسىمدەۋ مۇمكىن ەمەس.
ەكىنشى فاكتور - وتباسىنىڭ ءاربىر مۇشەسىنىڭ تابىسى ەڭ تومەنگى كۇنكورىس دەڭگەيىنەن جوعارى بولۋى. وسىنداي سەبەپپەن 1608 ءوتىنىش كەرى قايتارىلدى. ءۇشىنشى فاكتور - ءوتىنىش بەرۋشى eGov قىزمەتتەرىن پايدالانۋشىنىڭ جەكە مالىمەتتەرى جيناقتالىپ، ساقتالاتىن موبيلدى ازاماتتار بازاسىنان تابىلماۋى (976 ءوتىنىش).
ازاماتتاردىڭ جەكە سايكەستەندىرۋ ءنومىرى (ج س ن) بازاعا ەنگىزىلگەن تەلەفون نومىرىمەن بايلانىستى بولادى. سايكەسىنشە، بازاعا تىركەلگەن ازاماتتار eGov-تىڭ ءموبيلدى قوسىمشاسى مەن Telegram بوت ارقىلى مەملەكەتتىك قىزمەتتەردى ونلاين الا الادى. eGov پورتالىنا ە س ق- سىز ءبىر رەتتىك پارول ارقىلى كىرۋگە بولادى»، - دەپ جازادى «وتباسى بانكتىڭ» باسپا ءسوز قىزمەتىنەن.
اتالعان ازاماتتار بازاسىنا تىركەلۋ ءۇشىن جەكە كۋالىك قانا قاجەت. قازاقستاننىڭ جەكە كۋالىك العان (16 جاستان اسقان) ازاماتتارى تىركەلەدى. ول ءۇشىن eGov پورتالىنا نەمەسە 1414.kz ءبىرىڭعاي بايلانىس ورتالىعىنىڭ سايتىنا كىرۋ قاجەت. سول جەردەن وڭ جاق تومەنگى بۇرىشتا جاسىل تۇستەگى «ۆيرتۋالدى اسسيستەنت» قىزمەتىن تاڭداۋ كەرەك. بەينەقوڭىراۋ باتىرماسىن باسۋ ارقىلى ينتەرنەت- براۋزەر پارامەترلەرىندە بەينەكامەرا مەن ميكروفونعا رۇقسات بەرۋ قاجەت بولادى. بايلانىسقا شىققان وپەراتورعا جەكە كۋالىك كورسەتۋ كەرەك. وپەراتورعا ج س ن ءنومىر، تەلەفون ءنومىرى مەن تەلەفونعا كەلىپ تۇسكەن ءبىر رەتتىك كودتى ايتۋ قاجەت.
سونداي-اق، اتالعان بازاعا ەلەكتروندى سيفرلىق قولتاڭبا كومەگىمەن eGov پورتالىنداعى جەكە كابينەتكە كىرىپ، «تەلەفون» دەگەن جەرگە موبيلدى تەلەفون ءنومىرىن جازىپ تا تىركەلۋگە بولادى.
اۆتور ەسىمجان ناقتىباي