اتىراۋدا ەكى جاس ءوسپىرىمدى قاققان جۇرگىزۋشى كولىگىن تاستاپ قاشىپ كەتتى

اتىراۋ. قازاقپارات - اتىراۋدا ەكى جاس ءوسپىرىمدى قاققان جۇرگىزۋشى كولىگىن تاستاپ، قاشىپ كەتتى.

ونى ىزدەستىرۋ جۇمىستارى جۇرگىزىلىپ جاتىر، دەپ حابارلايدى قازاقپارات ءتىلشىسى.

وبلىستىق پوليتسيا دەپارتامەنتىنىڭ باسپا ءسوز قىزمەتىنەن ءمالىم ەتكەندەي، جول-كولىك وقيعاسى كەشە، 17-تامىزدا بولعان.

«جەرگىلىكتى ۋاقىتپەن ساعات 22:40 شاماسىندا ماركاسى «ۆاز-2114» اۆتوكولىگىنىڭ جۇرگىزۋشىسى اتىراۋ قالاسىندا ەكى جاس ءوسپىرىمدى قاعىپ كەتكەنى بەلگىلى بولدى. ول ساتپايەۆ كوشەسىندە ورنالاسقان «اتىراۋ» ويىن- ساۋىق ورتالىعى تۇسىندا رەتتەلمەگەن جاياۋ جۇرگىنشىلەر وتكەلىنەن ءوتىپ بارا جاتقان 2004 جانە 2005 -جىلعى جاسوسپىرىمدەردى كولىگىمەن قاعىپ قۇلاتقان»، - دەپ حابارلادى دەپارتامەنتتىڭ باسپا ءسوز قىزمەتىنەن.

الايدا، جول-كولىك وقيعاسىنا كىنالى جۇرگىزۋشى اۆتوكولىگىن وقيعا ورنىندا قالدىرىپ، قاشىپ كەتكەن. قازىر «ۆاز-2114» اۆتوكولىگى ارنايى تۇراققا قويىلدى. ال، كىم ەكەنى ءالى انىقتالماعان جۇرگىزۋشى ىزدەستىرىلىپ جاتىر.

بۇدان بۇرىن اتىراۋدا قوعامدىق كولىك جاياۋ جۇرگىنشىنى قاعىپ كەتكەن ەدى. كولىكتىڭ رولىندە 59 جاستاعى جۇرگىزۋشى بولعان. ول قۇرمانعازى كوشەسىمەن قوزعالىپ كەلە جاتىپ، جول قاۋىپسىزدىگىن قاداعالاماعان.

ال، ەسىرتكى شەگىپ، كولىك جۇرگىزگەن جىگىت پوليتسيادان قاشپاق بولدى. پوليتسەيلەر كولىك رولىندە اتىراۋ قالاسىنىڭ 33 جاستاعى تۇرعىنى بولعانىن انىقتادى. جۇرگىزۋشىنىڭ كولىك قۇرالىن جۇرگىزۋ قۇقىعى بولماعان. ونىڭ ەسىرتكىلىك زات قابىلداپ، كولىك جۇرگىزگەنى بەلگىلى بولدى. سونى جاسىرۋ ءۇشىن جۇرگىزۋشى پوليتسەيلەردەن قاشقانمەن، الىسقا ۇزاماي ۇستالدى.