جاڭا قۇرىلعان ءۇش وبلىستا ەكونوميكالىق تەرگەۋ دەپارتامەنتىنىڭ باسشىلارى تاعايىندالدى

نۇر-سۇلتان. قازاقپارات - ق ر پرەزيدەنتى اكىمشىلىگىنىڭ كەلىسىمى بويىنشا، قارجىلىق مونيتورينگ اگەنتتىگى ءتوراعاسىنىڭ بۇيرىعىمەن اباي، جەتىسۋ جانە ۇلىتاۋ وبلىستارى بويىنشا ەكونوميكالىق تەرگەۋ دەپارتامەنتتەرىنىڭ باسشىلارى تاعايىندالدى، دەپ حابارلايدى قازاقپارات ۆەدومستۆونىڭ باسپا ءسوز قىزمەتىنە سىلتەمە جاساپ.

اباي وبلىسى بويىنشا ەكونوميكالىق تەرگەۋ باسقارماسى باسشىسىنىڭ ۋاقىتشا مىندەتىن اتقارۋشى بولىپ نۇرلان كارىموۆ تاعايىندالدى.

نۇرلان كارىموۆ 1981 -جىلى 11-مامىردا باتىس قازاقستان وبلىسىندا دۇنيەگە كەلگەن. قارجى پوليتسياسى اكادەمياسىن، «ەۋرازيا» باتىس قازاقستان باسقارۋ جانە تىلدەر ينستيتۋتىن بىتىرگەن.

ەكونوميكالىق تەرگەۋ قىزمەتىنىڭ پولكوۆنيگى.

ەڭبەك جولىن 2002 -جىلى باستادى. ءار جىلدارى قارجى پوليتسياسىندا تەرگەۋشى، اعا تەرگەۋشى قىزمەتتەرىن اتقارعان. ەكونوميكالىق قىلمىسقا جانە سىبايلاس جەمقورلىققا قارسى كۇرەس اگەنتتىگىندە، قارجى مينيسترلىگىندە، ەكونوميكالىق تەرگەۋ ورگاندارىندا باسشىلىق قىزمەتتەردى اتقارعان.

جەتىسۋ وبلىسى بويىنشا ەكونوميكالىق تەرگەپ- تەكسەرۋ دەپارتامەنتىنىڭ باسشىسى قىزمەتىنە تالعات تاڭاتاروۆ تاعايىندالدى.

تالعات تۇرعاۋىت ۇلى 1966 -جىلى 20-اقپاندا قاراعاندى وبلىسىندا دۇنيەگە كەلگەن. ءنوۆوسىبىر جوعارى اسكەري- ساياسي قۇراما قارۋلار ۋچيليشەسىن، ە. بوكەتوۆ اتىنداعى قاراعاندى مەملەكەتتىك ۋنيۆەرسيتەتىن، رف پرەزيدەنتى جانىنداعى رەسەي حالىق شارۋاشىلىعى جانە مەملەكەتتىك قىزمەت اكادەمياسىن بىتىرگەن.

ەكونوميكالىق تەرگەۋ قىزمەتىنىڭ پولكوۆنيگى.

ەڭبەك جولىن 1989 -جىلى قارۋلى كۇشتەر قاتارىندا باستادى. ءار جىلدارى ق ر ىشكى اسكەرلەرىنىڭ تەرگەۋشىسى، اسكەري پروكۋرورىنىڭ كومەكشىسى، قاراعاندى گارنيزونىنىڭ اسكەري پروكۋرورى جانە قر باس اسكەري پروكۋرورىنىڭ ورىنباسارى قىزمەتتەرىن اتقاردى. ەكونوميكالىق قىلمىسقا جانە سىبايلاس جەمقورلىققا قارسى كۇرەس ورگاندارىندا، قارجى مينيسترلىگىندە، ەكونوميكالىق تەرگەۋ ورگاندارىندا باسشىلىق قىزمەتتەردى اتقارعان.

ۇلىتاۋ وبلىسى بويىنشا ەكونوميكالىق تەرگەپ- تەكسەرۋ دەپارتامەنتىنىڭ باسشىسى قىزمەتىنە ەرىك ەسەنوۆ تاعايىندالدى.

ەرىك ەسەنوۆ 1983 -جىلى 26-ساۋىردە كوكشەتاۋ وبلىسىندا دۇنيەگە كەلگەن. قارجى پوليتسياسى اكادەمياسىن بىتىرگەن، ەكونوميكالىق تەرگەۋ قىزمەتىنىڭ پولكوۆنيگى.

ەڭبەك جولىن 2004 -جىلى باستادى. قارجى پوليتسياسىندا تەرگەۋشى، دەپارتامەنت باستىعىنىڭ ورىنباسارى، دەپارتامەنت باستىعى، سىبايلاس جەمقورلىققا قارسى ءىس- قيمىل اگەنتتىگى دەپارتامەنتى باسشىسىنىڭ ورىنباسارى، ب ق و بويىنشا ەكونوميكالىق تەرگەۋ دەپارتامەنتى باستىعىنىڭ ورىنباسارى قىزمەتتەرىن اتقاردى.