الماتى وبلىسىندا ۇلتتىق ۇلان ساربازى جارىلىستىڭ الدىن الدى
18 تامىز 12:38

الماتى وبلىسىندا ۇلتتىق ۇلان ساربازى جارىلىستىڭ الدىن الدى

نۇر-سۇلتان. قازاقپارات - قوعامدىق تاماقتانۋ ورنىنان قويۋ ءتۇتىن بۋداقتاپ جاتقانىن بايقاعان اسكەري قىزمەتشى جارىلىستىڭ الدىن الۋ ءۇشىن گاز بالوندارى مەن تەز تۇتاناتىن زاتتاردى سىرتقا شىعارىپ، ءورت سوندىرۋشىلەر كەلگەنشە جالىنمەن جالعىز كۇرەستى، دەپ حابارلايدى قازاقپارات ۆەدومستۆونىڭ باسپا ءسوز قىزمەتىنە سىلتەمە جاساپ.

وقيعا 13-تامىزدا الماتى وبلىسىنداعى قاراكەمەر اۋىلىنان بىرنەشە شاقىرىم جەردە بولعان. الايدا، اسكەري قىزمەتشىنىڭ بۇل ەرلىگى جۋىردا عانا كافە يەلەرىنىڭ اتىنان بولىمگە جەتكەن العىس حات ارقىلى ايان ەتىلەدى.

ۇلتتىق ۇلاننىڭ 6654 اسكەري ءبولىمىنىڭ قىزمەتشىسى، پودپولكوۆنيك باقىت تاشكەنبايەۆ وتباسىمەن ەسىك ەلدى مەكەنىنە بارا جاتقاندا جول بويىنداعى كافەدەن شىققان قالىڭ ءتۇتىندى بايقايدى. وفيتسەر توقتاي قالىپ، بىردەن كومەككە جۇگىرەدى.

«كافەدە تەك ايەل ادامدار عانا بولدى. ەڭ الدىمەن، تۇتىندەپ جاتقان اس ۇيگە جۇگىردىم. ەكى گاز بالونىن دالاعا شىعاردىم. وسىدان كەيىن ايەلدەر ءورت ەكىنشى قاباتقا وتەدى دەپ ايقايلادى. سالتانات زالى ەكەن. جيھازدى شىعاردىم، عيماراتتىڭ توبەسىنە وتتىڭ وتۋىنە جول بەرمەۋ ءۇشىن پەردەلەردى جۇلىپ الا باستادىم»، - دەيدى باقىت تاشكەنبايەۆ.

ۇلتتىق ۇلاننىڭ اسكەري قىزمەتشىسى قۇتقارۋشىلار جەتكەنگە دەيىن ءورتتى العاشقى ءسوندىرۋ قۇرالدارىمەن ءوز بەتىنشە ءوشىرىپ، ەۆاكۋاتسيالىق وتكەلدەردى بوگدە زاتتاردان بوساتادى. ءورت ءسوندىرۋ كومانداسى جەتكەننەن كەيىن دە باتىلدىعى مەن كاسىبيلىگىن كورسەتىپ، كومەگىن جالعاستىرادى.




جاڭالىقتار