قازاق دەتەكتيۆىنىڭ نەگىزىن قالاعان جازۋشى كەمەل توقايەۆتىڭ كىتابى ازەربايجان تىلىندە جارىق كوردى
18 تامىز 08:10

قازاق دەتەكتيۆىنىڭ نەگىزىن قالاعان جازۋشى كەمەل توقايەۆتىڭ كىتابى ازەربايجان تىلىندە جارىق كوردى

نۇر- سۇلتان. قازاقپارات - قازاق دەتەكتيۆىنىڭ نەگىزىن قالاۋشى، ايگىلى جازۋشى كەمەل توقايەۆتىڭ «نوچنوي ۆىسترەل» اتتى جيناعى ازەربايجاندىق «گانۋن» باسپاسىنان، اسەم ەتىپ بەزەندىرىلگەن مۇقابامەن جارىق كوردى، دەپ حابارلايدى قازاقپارات ازەرتادج اگەنتتىگىنە سىلتەمە جاساپ.

اگەنتتىكتىڭ حابارلاۋىنشا، كىتاپتى ازەربايجان تىلىنە جازۋشى- اۋدارماشى ناريمان ابدۋلراحمانلى اۋدارعان. كىتاپتىڭ رەتسەنزەنتى فيلولوگيا عىلىمدارىنىڭ دوكتورى، پروفەسسور باديرحان احمەدلي، رەداكتورى ماحير گارايەۆ.

كىتاپتىڭ العى ءسوزىن دەتەكتيۆ جانرىندا جازىلعان شىعارمالاردىڭ تانىمال اۆتورى، ازەربايجان جازۋشىلار وداعىنىڭ ءبىرىنشى حاتشىسى، كەمەل توقايەۆتىڭ شىعارمالارىمەن ەتەنە تانىس حالىق جازۋشىسى چينگيز ابدۋللايەۆ جازدى.

ونىڭ «قاسيەتتى پارىز» اتتى بولىمىندە كەمەل توقايەۆتىڭ شىعارماشىلىعىنا اۋقىمدى ءارى ءدال باعا بەرىلگەن جانە شەبەر جازۋشىنىڭ رۋحاني قۇندىلىقتارعا ەرەكشە ءمان بەرەتىنى ايتىلعان.

كىتاپتىڭ تاعى ءبىر ەرەكشەلىگى - «اكە تۋرالى بىرەر ءسوز» اتتى باسىلىمنىڭ العى ءسوزى. ونى كەمەل توقايەۆتىڭ بالاسى قازاقستان رەسپۋبليكاسىنىڭ پرەزيدەنتى قاسىم-جومارت توقايەۆتىڭ ءوزى جازعان.

ءوزىنىڭ مەمۋارلىق ەسسەسىندە قاسىم-جومارت توقايەۆ جازۋشىنىڭ ءومىر جولى تۋرالى باياندايدى، ونىڭ تۋىپ- وسكەن ورتاسىن سۋرەتتەيدى، مايدانداعى قيىندىقتارى تۋرالى اڭگىمەلەيدى. سونداي-اق كەمەل توقايەۆتىڭ جازۋشى رەتىندە قالىپتاسۋى جونىندە سىر شەرتىپ، ونىڭ شىعارمالارىنا دەگەن ءوزىنىڭ كوزقاراسى، شىعارماشىلىق ۇستانىمى مەن جولداستارى تۋرالى جۇرەكجاردى پىكىرىن بىلدىرەدى.

جيناققا «زولوتو س تامگوي»، «نوچنوي ۆىسترەل» جانە «تاينستۆەننىي سلەد» پوۆەستەرى ەنگەن. اۆتور بۇل تۋىندىلارىندا الىپساتارلارمەن كۇرەس، ارنايى قىزمەتتەردىڭ شەتەلدىك جانسىزدارمەن قاقتىعىسى، جاۋدىڭ بارلاۋشىلارىنىڭ قىلمىستارىن اشۋداعى وتە جوعارى كاسىبي دەڭگەيى، سوعىس جىلدارىنداعى قيىن- قىستاۋ كۇندەردى وتە شەبەر باياندايدى.

بۇل كىتاپتىڭ قازاقستان مەن ازەربايجان حالقى اراسىنداعى مادەني جانە ادەبي بايلانىستىڭ نىعايۋىنا زور ۇلەس قوسىپ، وقىرمانداردىڭ كىتاپتى رەكشە قىزىعۋشىلىقپەن وقيتىنى ءسوزسىز.


جاڭالىقتار