الماتى وبلىسىنىڭ پوليتسيا عيماراتىن «بومبالاعان» ەر ادام ۇستالدى
17 تامىز 22:25

الماتى وبلىسىنىڭ پوليتسيا عيماراتىن «بومبالاعان» ەر ادام ۇستالدى

تالدىقورعان. قازاقپارات - تالدىقورعاندا پوليتسيا عيماراتىنا بومبا قويىلعانى تۋرالى جالعان اقپارات بەرگەن ەر ادام ۇستالدى، دەپ حابارلايدى قازاقپارات Polisia.kz سايتىنا سىلتەمە جاساپ.

«16- تامىز كۇنى تالدىقورعاننىڭ «102» شۇعىل جەلىسىنە وبلىستىق پوليتسيا دەپارتامەنتىنىڭ عيماراتىنا جارىلعىش زات قويىلعانى تۋرالى حابارلاما ءتۇستى. دابىل بويىنشا ارەكەت ەتكەن ساپەرلەر، كينولوگتار جانە ءارتۇرلى ماماندار بارلىق بولمەلەردى، سونىمەن قاتار جاقىن ورنالاسقان اۋماقتى تەكسەردى. حابارلاما جالعان بولىپ شىقتى.

وسى ارالىقتا جەدەل بولىمشەلەردىڭ قىزمەتكەرلەرى جالعان تەرروريستى شۇعىل انىقتاپ، ۇستاپ، ونى قالالىق پوليتسياعا جەتكىزدى»، - دەلىنگەن پوليتسيا مالىمەتىندە.

ۇستالعان كۇدىكتى تالدىقورعان قالاسىنىڭ 44 جاستاعى تۇرعىنى. ول جاساعان ىسىنە وكىنەتىنىن ايتىپ، قالا تۇرعىندارىنان مۇنداي ءازىلى ءۇشىن كەشىرىم سۇرادى. «ماس بولىپ، بومبا تۋرالى حابارلادىم. ماس كۇيىمدەگى ارەكەتىم ءۇشىن زاڭ الدىندا جاۋاپ بەرۋىم كەرەك»، - دەدى ۇستالعان ەر ادام.

پوليتسەيلەر تەرروريزم اكتىسى تۋرالى كورىنەۋ جالعان حابارلاعاندار قىلمىستىق جاۋاپكەرشىلىككە تارتىلاتىنىن ەسكە سالادى.

قولدانىستاعى زاڭنامادا ءىرى كولەمدە اقشالاي ايىپپۇل، باس بوستاندىعىن شەكتەۋ نەمەسە بەس جىلعا دەيىن بوستاندىعىنان ايىرۋ تۇرىندەگى جازا كوزدەلگەن.



جاڭالىقتار