استانادا گاز قۇبىرىن تارتۋ جۇمىستارى قاي دەڭگەيدە

None
نۇر- سۇلتان. قازاقپارات - 200 مىڭ ەلوردالىق كوگىلدىر وتىننىڭ قىزىعىن كورەدى. بۇل تۋرالى نۇر- سۇلتان قالالىق وتىن- ەنەرگەتيكالىق كەشەنى جانە كوممۋنالدىق شارۋاشىلىق باسقارماسى وتىن- ەنەرگەتيكالىق رەسۋرستار ءبولىمىنىڭ باسشىسى ماقسات ەسماعۇلوۆ ايتتى، دەپ حابارلايدى قازاقپارات ءتىلشىسى.

«گاز جەلىلەرى تۇگەل تارتىلعان جانە قوسىلۋ مۇمكىندىگى بار تۇرعىن ءۇي الاپتارىنا كوكتال-1، كوكتال-2، اگروگورودوك، تەمىرجولشىلار، پرومىشلەننىي، وڭتۇستىك شىعىس الابىنىڭ وڭ جانە سول جاعى، كۇيگەنجار، اقبيداي، قازاق اۋىلى، موسكوۆسكايا، پوتانين كوشەسى بويىنداعى ءۇش شاعىن اۋدان كىرەدى. قازىرگى ۋاقىتتا گازعا قوسىلۋ مۇمكىندىگى بار ابونەنتتەردىڭ سانى 14 مىڭعا جەتتى. ولاردا 200 مىڭ ادام تۇرادى. گازعا قوسىلعان ابونەنتتەردىڭ سانى 5 مىڭعا تايادى»، - دەدى ول ەلوردا اكىمدىگىندە وتكەن باسپا ءسوز ءماسليحاتىندا.

ونىڭ اتاپ وتۋىنشە، نۇر- سۇلتان قالاسىنىڭ اكىمدىگى جەكە سەكتورمەن قاتار ج ە و-1، ج ە و-2 جانە ج ە و-3- ءتى گازعا اۋىستىرىپ جاتىر.

«قازىرگى ۋاقىتتا ج ە و-2-دە بۇل جۇمىس اياقتالىپ، ورتالىق گازبەن جۇمىس ىستەۋ مۇمكىندىگىنە يە بولدى. ج ە و-1-دەگى 10 قازاندىقتىڭ 7-ەۋى گازعا قوسىلدى. قالعان 3 قازاندىقتا قۇرىلىس- مونتاجداۋ جۇمىستارىن اياقتاپ جاتىرمىز. كەلەسى جىلىتۋ ماۋسىمىنا دەيىن بۇل قازاندىقتار تولىعىمەن گازعا كوشىرىلەدى، ياعني ورتالىقتى گازعا كوشىرۋ جۇمىسى اياقتالادى. كەلەشەكتە ىسكە قوسىلاتىن ج ە و-3 جوباسىنا قاجەتتى وزگەرىس ەنگىزىلدى. ول گازبەن جۇمىس ىستەيتىن بولادى»، - دەدى ماقسات ەسماعۇلوۆ.

بۇعان دەيىن حابارلاعانىمىزداي، استاناداعى تۇرمىسى تومەن وتباسىلاردىڭ ۇيىنە گاز تارتۋعا بولىنەتىن سوما 2 ەسە ۇلعايدى، ەسەپتەگىشتەر تەگىن بەرىلەدى.

اۆتور

مارلان جيەمباي

سوڭعى جاڭالىقتار