قازاقستاندىق فەرمەرلەر ءجۇن وندىرىسىنە مۇددەلى ەمەس - مامان

None
None
الماتى. قازاقپارات - ەلدە توقىما ءوندىرىسى بويىنشا كلاستەر قۇرۋ نەمەسە اياق كيىم فابريكاسىن تولىق سيكلدى اشۋ مۇمكىن ەمەس. مۇنداي پىكىردى قازاقستان مەن وزبەكستان كاسىپكەرلەرى كەزدەسۋىندە جەڭىل ونەركاسىپ كاسىپورىندارى قاۋىمداستىعىنىڭ قۇرىلتايشىسى ناتاليا احشابايەۆا ايتتى، دەپ حابارلايدى قازاقپارات ءتىلشىسى.

الماتى قالاسى كاسىپكەرلەر پالاتاسىنىڭ الاڭىندا وزبەكستاننىڭ «ۋزچارمسانوات» بىلعارى- اياق كيىم جانە ءجۇن- تەرى كاسىپورىندارى قاۋىمداستىعى ءتوراعاسىنىڭ ورىنباسارى ادحام مۋيدينوۆ باستاعان دەلەگاتسياسىمەن بيزنەس- كەزدەسۋ ءوتتى. ءىس- شاراعا قازاقستاننىڭ جەڭىل ونەركاسىپ قاۋىمداستىعى، الماتى وڭىرلىك پالاتاسىنىڭ وكىلدەرى مەن كاسىپكەرلەر قاتىستى.

كەزدەسۋدە كولىك- لوگيستيكا سالاسىنداعى ىنتىماقتاستىقتى كەڭەيتۋ، توقىما، بىلعارى گالانتەرەيا، قۇرىلىس ماتەريالدارى، تامشىلاتىپ سۋارۋ سالالارىنداعى ساۋدا- ەكونوميكالىق ىنتىماقتاستىقتى دامىتۋ ماسەلەلەرى تالقىلاندى. الماتى كاسىپكەرلەر پالاتاسى اپپاراتىنىڭ باسشىسى تيمۋر بەكەيەۆ قازاقستان مەن وزبەكستان اراسىنداعى ىنتىماقتاستىق عاسىرلار بويى جالعاسىپ جاتقانىن، بۇل بايلانىستى جاڭا دەڭگەيگە شىعارۋ قاجەتتىگىن ايتتى.

«اتامەكەن» ۇلتتىق كاسىپكەرلەر پالاتاسى قازاقستاندىق كومپانيالارمەن ىسكەرلىك جانە ساۋدا بايلانىستارىن ورناتۋدا بيزنەستىڭ سەنىمدى سەرىكتەسى بولادى»، - دەپ اتاپ ءوتتى تيمۋر بەكەيەۆ.

قازاقستاننىڭ جەڭىل ونەركاسىپ كاسىپورىندارى قاۋىمداستىعىنىڭ قۇرىلتايشىسى ناتاليا احشابايەۆا ەكى ەلدىڭ سالاداعى ىنتىماقتاستىعىنىڭ زور مۇمكىندىكتەرىن اتاپ ءوتتى. قازىر قاۋىمداستىق قۇرامىندا توقىما، تىگىن، اياق كيىم جانە تەرى باعىتتارىن بىرىكتىرەتىن 124 كومپانيا بار. قازاقستاندا بۇل سالادا 1100 كومپانيا جۇمىس ىستەيدى، سونىڭ ىشىندە 980 كومپانيا - شاعىن بيزنەس وكىلى.

«بۇل جەڭىلدەتىلگەن سالىق رەجيمى بار جەكە كاسىپكەرلەر ءۇشىن ىڭعايلى. ءىرى كومپانيالار نەگىزىنەن ۇلكەن تاپسىرىسقا باعىتتالعان، قازىر نارىقتاعى جاعداي وتە قيىن. وكىنىشكە قاراي، قازاقستاندىق جەڭىل ونەركاسىپتە وزبەكستانداعىداي مەملەكەتتىك قولداۋ مەن نازار ازداۋ. ءبىزدىڭ ءوندىرىس وڭدەۋ ونەركاسىبى كولەمىنىڭ تەك % 1- ىن عانا قۇرايدى»، - دەيدى ناتاليا احشابايەۆا.

قاۋىمداستىق قۇرىلتايشىسىنىڭ ايتۋىنشا، قازاقستاندا توقىما ءوندىرىسى بويىنشا كلاستەر قۇرۋ نەمەسە اياق كيىم فابريكاسىن تولىق سيكلدى اشۋ مۇمكىن ەمەس. ەلدە فەرمادان فابريكاعا دەيىن جەتكىزۋ تىزبەگى بۇزىلعان. فەرمەرلەر ءجۇن وندىرىسىنە مۇددەلى ەمەس، تەرى قابىلداۋ پۋنكتتەرى جۇمىس ىستەمەيدى. ءبىزدىڭ تاريحي قولونەرىمىز - بىلعارى ءوندىرۋ، تەرى يلەۋ، قوي ءجۇنىن وڭدەۋ جوعالعان.

«ستاتيستيكالىق مالىمەتتەردى كەلتىرە الامىن: جىل سايىن ءبىز 450 توننا ماقتا، 25-37 مىڭ توننا ءجۇن جانە 7,5 ميلليون تەرى وندىرەمىز. ءبىراق، دايىن ءونىمنىڭ % 95- ىن ءبىز يمپورتتايمىز، سەبەبى شيكىزات ءىس جۇزىندە قايتا وڭدەلمەيدى، بارلىق لوگيستيكا بۇزىلعان. 2019 -جىلى 36 مىڭ توننا ءجۇن جينادىق، 27 مىڭ توننا جويىلدى. جاي جينالىپ، بوسقا تاستالدى. ءجۇن دۇرىس ساقتالماعاندىقتان ءشىرىپ كەتتى. ءبىزدىڭ فەرمەرلەر جەڭىلدىكتى قويدىڭ سانىنا عانا الادى، ال ونىڭ تەرىسى مەن ءجۇنىن تاپسىرعانى ءۇشىن وعان ەشقانداي سۋبسيديا بەرىلمەيدى»، - دەپ مالىمدەدى قاۋىمداستىقتىڭ قۇرىلتايشىسى ناتاليا احشابايەۆا

سونىمەن قاتار، ول قازىر قاۋىمداستىق قارجى جانە يندۋستريالىق دامۋ مينيسترلىكتەرىمەن توقىما ءوندىرىسىنىڭ تولىق سيكلىنىڭ تىزبەگىن قالپىنا كەلتىرۋ قاجەتتىلىگى، ءجۇندى سۋبسيديالاۋ، لوگيستيكا، ساقتاۋ، تاپسىرۋ ماسەلەلەرى تۋرالى كەلىسسوزدەر جۇرگىزىپ جاتقانىن تىلگە تيەك ەتتى.

وزبەكستاننىڭ «ۋزچارمسانوات» بىلعارى- اياق كيىم جانە ءجۇن- تەرى كاسىپورىندارى قاۋىمداستىعىنىڭ ءتوراعاسى ادحام مۋيدينوۆ مەملەكەتتىك دەڭگەيدەگى جۇيەلى قولداۋ بىلعارى- اياق كيىم جانە ءجۇن- تەرى باعىتتارىن وزبەك ەكونوميكاسىندا ەڭ جىلدام دامىپ كەلە جاتقان باعىتتاردىڭ بىرىنە اينالدىرعانىن ايتتى.

كەزدەسۋ بارىسىندا ەكى ەلدىڭ كاسىپكەرلەرى ىنتىماقتاستىق جانە دايىن ءونىمدى قازاقستانعا تىكەلەي جەتكىزۋ، سونداي- اق الماتىنىڭ ارنايى ەكونوميكالىق ايماقتارىندا بىرلەسكەن كاسىپورىندار قۇرۋ ماسەلەلەرىن تالقىلادى.

اۆتور

الما مۇقانوۆا

سوڭعى جاڭالىقتار