انا ءسۇتى - بالا دەنساۋلىعىنىڭ نەگىزى

None
None
نۇر- سۇلتان. قازاقپارات - انا ءسۇتى ءسابيدىڭ العاشقى 2 جىل ومىرىندە تەڭدەسى جوق تاعام بولىپ تابىلادى. انا ءسۇتى عانا ءسابيدىڭ تولىققاندى فيزيكالىق ءوسۋىن، اقىل- ويىنىڭ قالىپتاسۋىن، پسيحولوگيالىق دامۋىن قامتاماسىز ەتە الادى. سونداي- اق، ونىڭ قۇرامىندا بالانىڭ ءوسىپ- دامۋىنا قاجەتتى قورەكتىك زاتتار تولىق، ۇيلەسىمدى قاتىناستا بولادى.

اناسىنىڭ تاماقتانۋى دۇرىس بولعان جاعدايدا ەمشەك ءسۇتىنىڭ قۇرامىنداعى اقۋىزدار، مايلار، كومىرسۋلار، دارۋمەندەر مەن مينەرالدىق زاتتەكتەر نارەستەنىڭ قاجەتتىلىگىنە قاراي بەيىمدەلىپ، جاس مولشەرىنە بايلانىستى وزگەرىپ وتىرادى. اس قورىتۋ فەرمەنتتەرىنىڭ تولىق جەتىلمەۋىنە بايلانىستى نارەستە باسقا تاعام تۇرلەرىن ءالى قورىتا المايدى. سوندىقتان، انا ءسۇتى قورىتۋ، ءسىڭىرۋ، الماسۋ پروتسەسىنىڭ ەرەكشەلىگىنە ساي قاجەتتى فەرمەنتتەرمەن قامتاماسىز ەتەدى. ودان باسقا، ۋىز بەن انا ءسۇتى دۇنيەگە كەلگەن بالانىڭ جاڭا تىرشىلىك جاعدايلارىنا تەز بەيىمدەلۋىنە اسەر ەتەدى.

بوسانعاننان كەيىنگى العاشقى 2-3 تاۋلىكتە ايەلدە ۋىز تۇزىلەدى. ۋىزعا جارىماعان بالا دەپ كىمدى ايتادى؟ تەك قانا ءجيى اۋىراتىن، سالماعى تومەن بالالاردى عانا ەمەس، سونىمەن قاتار ءالسىز، ءالجۋاز، وزىنە سەنىمسىز بالالاردى دا وسىلاي ايتىپ جاتادى. ونىڭ وزىندىك ۇلكەن ءمانى جانە سەبەبى بار. ۋىزبەن ءسابيدى تويدىرىپ ەمىزۋ، دۇنيەگە كەلگەن بويدا اناسىنىڭ كەۋدەسىنە سالۋ، ونى ەمىرەنىپ ەمىزۋ - بالانىڭ بولاشاعىنا، ياعني دەنساۋلىعىنىڭ مىقتى بولۋىنا، اناسىمەن اراسىنداعى پسيحولوگيالىق- ەموتسيونالدىق بايلانىستىڭ قالىپتاسۋىنا، شىمىر، ەركىن وسۋىنە وڭتايلى ىقپال ەتەدى. شاقالاقتىڭ العاشقى يممۋنيزاتسياسى ۋىزدى ەمۋدەن باستالادى، ول قۇرامىنداعى بەلسەندى انتيدەنەلەردىڭ جانە باسقا دا پايدالى زاتتاردىڭ ەسەبىنەن جۇزەگە اسىرادى. ۋىزدى تويىپ ەمگەن بالالار ەمبەگەن نەمەسە از ەمگەن بالالارعا قاراعاندا سيرەك، جەڭىل تۇردە اۋىرادى.

انا ءسۇتىنىڭ قۇرامى باكتەريالارعا، جۇقپالى اۋرۋلارعا قارسى، يممۋندىق، جاسۋشالىق، فەرمەنتتىك قورعاۋشى فاكتورلار كەشەنىن قۇرايدى جانە كوپتەگەن اۋرۋلاردان ساقتايدى. مىسالى، تەك انا سۇتىمەن قورەكتەنەتىن سابيلەر قوسپالارمەن تاماقتاناتىن بالالارعا قاراعاندا ديارەيامەن 3-4 ەسە، پنيەۆمونيامەن 17 ەسە، سوزىلمالى برونحيتپەن 2 ەسە، راحيت جانە انەميامەن بىرنەشە ەسە از اۋىرادى. انا ءسۇتىن ەمگەن سابيلەر سەمىزدىككە، ديابەتكە، گيپەرحولەستەرينەمياعا، اسقازان- ىشەك جولدارىنىڭ اۋرۋلارىنا، قاتەرلى ىسىكتەرگە، قۇلاقتىڭ، ءتىستىڭ، قىزىل يەكتىڭ قابىنۋىنا جانە رەسپيراتورلى- ۆيرۋستىق اۋرۋلارعا سيرەك شالدىعادى. ەمشەكتى ۇزاق ەمگەن بالالاردا پسيحوموتورلىق، الەۋمەتتىك، ەموتسيونالدىق دامۋ الدەقايدا جاقسى جۇرەدى.

قورىتا كەلە، ءسابي ءۇشىن انا ءسۇتى - مىڭ ءبىر دەرتكە داۋا جانە دەنساۋلىعىنىڭ نەگىزگى كەپىلى ەكەنىن بولاشاق انالار ۇمىتپاعانى ءجون.

م. قايناربايەۆا


سوڭعى جاڭالىقتار