اقتوبەدە يت تالاپ ولتىرگەن بالانىڭ ولىمىنە قاتىستى قىلمىستىق ءىس توقتاتىلدى
پوليتسيا قايعىلى وقيعادا قىلمىستىق قۇرامنىڭ بولماۋىنا بايلانىستى ءىستى توقتاتتى، دەپ حابارلايدى قازاقپارات ءتىلشىسى.
«2022 -جىلى 9-ماۋسىم كۇنى ساعات 23:52-دە «ەسەت باتىر» تۇرعىن ءۇي الابىنىڭ ءۇشىنشى ىقشام اۋدانىنداعى قۇرىلىس نىسانىندا 2010 -جىلى تۋعان بالانىڭ دەنەسى تابىلدى. بالا كوپ قان جوعالتقان، باس، دەنە، اياق- قولى جاراقاتتانعان. سوت- مەديتسينالىق ساراپتاما ناتيجەسىندە بالانىڭ ءولىمى يتتەردىڭ تالاعانىنان بولعاندىعى انىقتالدى. قىلمىستىق قۇقىقبۇزۋشىلىق قۇرامىنىڭ بولماۋىنا بايلانىستى ءىس توقتاتىلدى»، - دەدى اقتوبە وبلىسى پ د تەرگەۋ باسقارماسى باستىعىنىڭ ورىنباسارى نۇربولات سۇلتانوۆ.
ەسكە سالساق، وقيعا بولعان كۇنى وبلىستىق پوليتسيا دەپارتامەنتى كامەلەت جاسقا تولماعان بالانىڭ كوپ قان جوعالتۋ، باستىڭ، دەنەنىڭ، قول مەن اياقتىڭ كوپتەگەن جاراقاتتارى تۇرىندەگى زورلىقپەن ءولۋ بەلگىلەرى بار دەنەسى تابىلعانىن حابارلادى. كەيىن يت تالاپ ولتىرگەن وقۋشىنىڭ اتا-اناسى، جاقىندارى ءيتتىڭ يەسىن تاۋىپ، جازالاۋدى سۇرادى. ال، وبلىس اكىمىنىڭ ورىنباسارى جاقسىعالي يمانقۇلوۆ باسپا ءسوز ءماسليحاتىندا قاراۋسىز يت پەن مىسىقتىڭ كوزىن جويۋ باعىتىنداعى جۇمىستار تۋرالى باياندادى. سونداي-اق، جاعدايدىڭ قيىن بولىپ تۇرعانىن ايتتى. يت سانى كوبەيمەسە، ازايماعان. ول وسى جۇمىستى اتقارا المادىڭ دەسە، قىزمەتىنەن كەتۋگە ءازىر ەكەنىن مالىمدەدى.
ايتا كەتەيىك، بيىل وبلىستا يت اۋلاۋ جۇمىستارىنا 51 ميلليون تەڭگە بولىنگەن.
اۆتور التىناي ساعىندىقوۆا