قازاقستاندا ينتەرنەت الاياقتىقتىڭ قانداي ءتۇرى كەڭ تاراعان
17 تامىز 08:10

قازاقستاندا ينتەرنەت الاياقتىقتىڭ قانداي ءتۇرى كەڭ تاراعان

نۇر-سۇلتان. قازاقپارات - ەلىمىزدە ينتەرنەت ارقىلى قانداي الاياقتىق ارەكەتتەردىڭ ءجيى جاسالاتىنى بەلگىلى بولدى، دەپ حابارلايدى قازاقپارات ءتىلشىسى.

«بۇگىندە ەلىمىزدە ونلاين ساۋدا پلاتفورمالارى ارقىلى الاياقتىق ارەكەتتەر ءجيى جاسالادى. ياعني، تاۋاردىڭ اقىسىن الدىن الا تولەۋىن سۇرايدى. ءسويتىپ، اقشا تۇسكەن سوڭ بايلانىس ءنومىرىن ءوشىرىپ نەمەسە بۇعاتتاپ تاستايدى. بيىل 7 ايدىڭ ىشىندە ونلاين ساۋدا پلاتفورمالاردىڭ قىزمەتىنە قاتىستى 4 مىڭداي قىلمىس تىركەلىپ وتىر. ينتەرنەت الاياقتىقتىڭ كەلەسى كەڭ تاراعان ءتۇرى پوليتسيا قىزمەتكەرلەرىنىڭ اتىن جامىلىپ تۇرعىندارعا حابارلاسۋ. سول ارقىلى ازاماتتارعا قاتىستى جەكە مالىمەتتەردى بىلۋگە تىرىسادى»، - دەدى ق ر ءى ءى م كريمينالدىق پوليتسيا دەپارتامەنتى كيبەرقىلمىسقا قارسى كۇرەس ورتالىعىنىڭ باسشىسى جاندوس ءسۇيىنباي «Atameken Business» تەلەارناسىنا بەرگەن سۇحبات بارىسىندا.

مينيسترلىك وكىلىنىڭ مالىمدەۋىنشە، ەلىمىزدە ينتەرنەت ارقىلى جالعان حابارلاما بەرىپ حالىقتى الداۋ دا بار. اتالعان الاياقتىق ارەكەت اسىرەسە Olx.kz-تە ءجيى بايقالادى.

«ينتەرنەت ارقىلى بەلگىلى ءبىر زاتتىڭ ساتىلاتىنىن ايتىپ، سۋرەتىن جاريالايدى. سودان سوڭ ساتىپ الۋشىدان تولەمدى الدىن الا جاساۋىن سۇراپ، تاۋاردى جەتكىزىپ بەرەتىندىگىنە سەندىرەدى. الاياق تولەم تۇسكەن سوڭ ينتەرنەتتەگى حابارلامانى ءوشىرىپ تاستايدى. اتالعان فاكتى بويىنشا بيىل 7 ايدا 2 مىڭداي قىلمىس تىركەلدى»، - دەيدى ول.

بۇعان دەيىن ەلىمىزدە بيىل 7 ايدىڭ ىشىندە 11 مىڭداي ينتەرنەت قىلمىستىڭ جاسالعانى تۋرالى حابارلاعان ەدىك.


جاڭالىقتار