پرەزيدەنتكە «بايتەرەك» حولدينگىنىڭ اتقارعان جۇمىسى باياندالدى

نۇر-سۇلتان. قازاقپارات - مەملەكەت باسشىسى قاسىم-جومارت توقايەۆ «بايتەرەك» حولدينگىنىڭ باسقارما ءتوراعاسى قانات شارلاپايەۆتى قابىلدادى، دەپ حابارلايدى قازاقپارات اقورداعا سىلتەمە جاساپ.

قاسىم-جومارت توقايەۆقا حولدينگتىڭ بيىلعى ءبىرىنشى جارتىجىلدىقتاعى قىزمەتىنىڭ قورىتىندىسى مەن اگروونەركاسىپتىك كەشەندى قولداۋ، حالىقتى تۇرعىن ۇيمەن قامتاماسىز ەتۋ باعىتىندا اتقارىلىپ جاتقان جۇمىستار تۋرالى باياندالدى.

پرەزيدەنتكە بەرىلگەن مالىمەتتەرگە سايكەس ءىرى بيزنەستى قارجىلاندىرۋعا 143 ميلليارد تەڭگە، شاعىن جانە ورتا بيزنەسكە 510 ميلليارد تەڭگە، اگروونەركاسىپ كەشەنىنە 241,3 ميلليارد تەڭگە جۇمسالعان.

حولدينگتىڭ قولداۋىمەن جەكە قۇرىلىس سالۋشىلار جالپى اۋدانى 759 مىڭ شارشى مەتر ءۇيدى پايدالانۋعا بەردى. جەرگىلىكتى اتقارۋشى ورگانداردىڭ وبليگاتسيالارىن ساتىپ الۋ ارقىلى اۋدانى 56 مىڭ شارشى مەتر تۇرعىن ءۇي سالىنىپ، قولدانىسقا بەرىلدى. بۇل رەتتە 39 مىڭ وتباسى، سونىڭ ىشىندە 7,2 مىڭ كەزەكتە تۇرعان ازاماتتار جەڭىلدىگى بار يپوتەكامەن تۇرعىن ءۇي ساتىپ الدى.

مەملەكەت باسشىسىنىڭ تاپسىرمالارىن ورىنداۋ اياسىندا حولدينگ «جاسىل-دامۋ» ا ق قاراجاتى ەسەبىنەن وتاندىق اۋىل شارۋاشىلىعى تەحنيكاسىنىڭ جەڭىلدەتىلگەن ليزينگى باعدارلاماسىنا قاتىسۋعا وتىنىشتەر قابىلداي باستادى. جەكە تۇرعىن ءۇي قورىنىڭ جالداۋ اقىسىن سۋبسيديالاۋ تەتىگى ەنگىزىلدى.

ودان بولەك قانات شارلاپايەۆ ۇسىنعان اقپاراتقا سايكەس 2022-جىلى حولدينگتىڭ قولداۋ كورسەتۋىمەن 2 ميلليون شارشى مەتر تۇرعىن ءۇي نەمەسە 29,6 مىڭ پاتەر پايدالانۋعا بەرىلەدى. جالپى، اتالعان شارالار 250 مىڭ ادامنىڭ تۇرمىس جاعدايىن جاقسارتۋعا مۇمكىندىك بەرەدى.

قاسىم-جومارت توقايەۆ قانات شارلاپايەۆقا بيزنەستى دامىتۋدى جاقسارتۋ جانە الەۋمەتتىك تۇرعىن ءۇي ساياساتىن جەتىلدىرۋ باعىتىندا ءبىرقاتار ناقتى تاپسىرما بەردى.