قازاقستان ەكونوميكاسى ءۇشىن دوللاردىڭ وڭتايلى باعامى قانداي

نۇر-سۇلتان. قازاقپارات - ەكونوميست باۋىرجان يسابەكوۆ قازاقستاندىق ەكونوميكا ءۇشىن دوللارعا قاتىستى تەڭگەنىڭ ەڭ قولايلى باعامىن اتادى، دەپ حابارلايدى قازاقپارات ءتىلشىسى.

«قازىرگى كەزەڭدە ەكونوميكامىز ءۇشىن ەڭ قولايلى، وڭتايلى جانە تەڭدەستىرىلگەن باعام 1 دوللارعا 450-470 تەڭگەگە دەيىنگى باعام سانالادى. ويتكەنى بۇل ەكسپورتتاۋشىلار مەن يمپورتتاۋشىلار، سونداي-اق ءىرى، ورتا جانە شاعىن بيزنەس سۋبەكتىلەرى ءۇشىن ءتيىمدى»، - دەدى باۋىرجان يسابەكوۆ قازاقپارات تىلشىسىنە تەلەفون ارقىلى بەرگەن سۇحباتىندا.

ونىڭ ايتۋىنشا، بۇل بەلگىلەنگەن باعامدى ەكى جاعدايدا قولدانۋعا بولادى. اتاپ ايتقاندا، بىرىنشىدەن، ك س ر و- دا ستالين بيلىگى كەزىندەگىدەي (التىن رۋبل) نەمەسە ۇكىمەت ۇلتتىق ۆاليۋتانىڭ كەز كەلگەن باعامىن تولەي الاتىن پارسى شىعاناعىنداعى ءبىرقاتار اراب ەلدەرىندەگىدەي التىن-ۆاليۋتا رەزەرۆتەرىنىڭ ۇلكەن كولەمى بولۋى كەرەك. ەكىنشىدەن، تۇتىنۋ نارىعىنىڭ ورنىنا وندىرىستىك تاۋارلار نارىعى بولۋى ءتيىس.

«ايتپاقشى، ۇلتتىق ۆاليۋتانىڭ دوللارعا قاتىستى قازىرگى باعامى جانە ەكونوميكانىڭ جاي-كۇيى شاعىن جانە ورتا بيزنەس سۋبەكتىلەرى ءۇشىن وتە قاۋىپتى. سونداي-اق، اقشا-كرەديت ساياساتىن وڭتايلاندىرۋ ماقساتىندا حالىقتى دا، ۆاليۋتانى ساتىپ الۋشىلاردى دا، ساتۋشىلاردى دا حاباردار ەتۋ ءۇشىن اقپاراتتىق جۇمىس جۇرگىزۋ قاجەت. ۇلتتىق بانك پەن ق ر ۇكىمەتى دەڭگەيىندە ۆاليۋتا نارىعىنا قاتىسۋشىلاردىڭ الىپساتارلىعىن بولدىرماۋ بويىنشا وزىق شارالار قابىلداۋ قاجەت»، - دەدى ساراپشى.