قاڭتار وقيعاسىندا ادامدى دەمونستراتسيالىق تۇردە ۇرۋ، ءولتىرۋ قولدانىلعان
16 تامىز 18:56

قاڭتار وقيعاسىندا ادامدى دەمونستراتسيالىق تۇردە ۇرۋ، ءولتىرۋ قولدانىلعان

نۇر-سۇلتان. قازاقپارات - قاڭتار وقيعاسى كەزىندە دەمونستراتسيالىق ۇرىپ-سوعۋلار، توناۋلار جانە ادام ءولتىرۋ كەڭىنەن قولدانىلدى.

بۇل تۋرالى ق ر باس پروكۋراتۋراسى 1-قىزمەت باستىعىنىڭ ورىنباسارى ەلدوس قيلىمجانوۆ ايتتى، دەپ حابارلايدى قازاقپارات ءتىلشىسى.

«سول كۇندەرى الماتى، شىمكەنت قالالارىندا، اقتوبە، اتىراۋ، الماتى، جامبىل، قىزىلوردا جانە شىعىس قازاقستان وبلىستارىندا قىلمىسكەرلەر قارۋدى قولدانۋ ارقىلى ماقساتتى تۇردە ستراتەگيالىق مەملەكەتتىك جانە ازاماتتىق نىسانداردى باسىپ الىپ، قيراتقان. ونىڭ ىشىندە - اكىمدىكتەر، اۋەجايلار، پوليتسيا عيماراتتارى، ۇلتتىق قاۋىپسىزدىك كوميتەتىنىڭ دەپارتامەنتى، تەلەۆيدەنيە جانە بايلانىس، سونداي-اق ساۋدا ۇيلەرى، قارۋ دۇكەندەرى جانە ازاماتتاردىڭ مۇلىكتەرى بار»، - دەدى ول ورتالىق كوممۋنيكاتسيالار قىزمەتىندەگى بريفينگ بارىسىندا.

ە. قيلىمجانوۆتىڭ اتاپ وتۋىنشە، قاڭتار وقيعاسى كەزىندە دەمونستراتسيالىق ۇرىپ-سوعۋلار، توناۋلار جانە ادام ءولتىرۋ كەڭىنەن قولدانىلدى. بۇل ارەكەتتەردىڭ ماقساتى كوشەلەردە ۇرەي تۋعىزۋ، قىلمىسكەرلەردىڭ جولىندا بولعان ادامداردى قورقىتۋ، جالعان اقپارات تاراتۋ ارقىلى ەلدەگى جاعدايدىڭ تۇراقسىزدانۋىنا قول جەتكىزۋ بولدى.

«قيراتۋعا قاتىسۋشىلار پوليتسيا قىزمەتكەرلەرىنە، اسكەريلەرگە جانە قاراپايىم ادامدارعا شابۋىل جاسادى. جولداردىڭ ءجۇرۋ بولىگىن جاۋىپ تاستاپ، كولىك قۇرالدارىن ورتەدى. ازاماتتاردى قورقىتۋ ارقىلى جاپپاي تارتىپسىزدىكتەرگە قاتىسۋعا شاقىردى، توناۋلار، ۇرلىق جانە زورلىق-زومبىلىق جاسادى. قىلمىسكەرلەر قارۋ دۇكەندەرىن تونادى، ۇرلانعان قارۋدىڭ كومەگىمەن بەينەجازبا كامەرالارىن جويدى. سالدارىنان 100 ميلليارد تەڭگەدەن استام سوماعا زالال كەلتىرىلدى، ونىڭ ىشىندە بيزنەس سۋبەكتىلەرىنە - 92 ميلليارد تەڭگە. جۇزدەگەن عيمارات پەن كولىك قۇرالدارى ورتەندى. جاپپاي تارتىپسىزدىكتەردى ۇيىمداستىرۋداعى قىلمىستىق ارەكەتتەر ادام ولىمىنە اكەپ سوقتى»، - دەدى ەلدوس قيلىمجانوۆ.

جاڭالىقتار