پرەزيدەنت ماڭعىستاۋ وبلىسىنىڭ اكىمىن قابىلدادى
16 تامىز 17:58

پرەزيدەنت ماڭعىستاۋ وبلىسىنىڭ اكىمىن قابىلدادى

نۇر-سۇلتان. قازاقپارات - پرەزيدەنت قاسىم-جومارت توقايەۆ ماڭعىستاۋ وبلىسىنىڭ اكىمى نۇرلان نوعايەۆتى قابىلدادى، دەپ حابارلايدى اقوردا.

قاسىم-جومارت توقايەۆقا ماڭعىستاۋ وبلىسىنىڭ الەۋمەتتىك-ەكونوميكالىق دامۋى مەن بيىلعى 7 ايدا اتقارىلعان جۇمىستىڭ قورىتىندىلارى تۋرالى باياندالدى.

وبلىس اكىمىنىڭ مالىمەتىنە سايكەس وڭىردەگى وزەكتى ماسەلەنىڭ ءبىرى - سۋ قورىمەن، سونىڭ ىشىندە اۋىز سۋمەن قامتاماسىز ەتۋ. اتاپ ايتقاندا «استراحان - ماڭعىشلاق» سۋقۇبىرى ارقىلى كەلەتىن جانە باسقا دا سۋ تۇشىتۋ قورلارىنان الىناتىن سۋ مولشەرى مامىر ايىنان باستاپ قىركۇيەكتىڭ سوڭىنا دەيىنگى ارالىقتا تۇتىنۋشىلاردىڭ قاجەتتىلىگىن تولىق وتەي الماي كەلگەن.

نۇرلان نوعايەۆ مەملەكەت باسشىسىنىڭ ماڭعىستاۋ وڭىرىنە بارعان ساپارىندا وبلىستاعى اۋىز سۋ ماسەلەسىن شەشۋ تۋرالى تاپسىرماسىنا سايكەس اتقارىلعان جۇمىس ناتيجەلەرىن جەتكىزدى. قازىر «قاراجانباس» كەن ورنىندا تاۋلىگىنە 17 مىڭ تەكشە مەتر سۋ تۇشىتاتىن قوندىرعىلار ىسكە قوسىلىپ، وسى باعىتتاعى ءبىرقاتار ماسەلەنىڭ شەشىمى تابىلعان. اقتاۋ قالاسىنداعى سۋ تۇشىتۋ زاۋىتىندا جىل سوڭىنا دەيىن 20 مىڭ تەكشە مەتر سۋدى تازارتاتىن قوندىرعى ىسكە قوسىلۋ كەرەك بولسا، سونىڭ 5 مىڭ تەكشە مەترى ءقازىردىڭ وزىندە تۇشىتىلىپ بەرىلىپ جاتقانى ايتىلدى. وبلىس اكىمىنىڭ ايتۋىنشا، جەكە ينۆەستيتسيالار ەسەبىنەن تازا سۋ كولەمى ءالى دە ۇلعايتىلادى.

قاسىم-جومارت توقايەۆقا اۋىلشارۋاشىلىعى سالاسىندا وڭ وزگەرىستەر تۋرالى باياندالدى. ماڭعىستاۋ وبلىسىنىڭ اكىمىنىڭ مالىمەتتەرىنە قاراعاندا بىلتىرعى قۋاڭشىلىقتان كەيىن ۇكىمەت پەن جەرگىلىكتى اتقارۋشى ورگاننىڭ بىرلەسىپ اتقارعان شارالارىنىڭ جانە بيىل مولىنان تۇسكەن جاۋىننىڭ ارقاسىندا شارۋالاردىڭ جەم-ءشوپ دايىنداۋ جۇمىستارىندا قيىندىق جوق.

ءوڭىر باسشىسى وبلىستا وتاندىق جانە شەتەلدىك تۋريستەر سانىنىڭ ارتقانىن جەتكىزدى.

كەزدەسۋ سوڭىندا پرەزيدەنت اتالعان باعىتتار بويىنشا جۇمىستاردى ودان ءارى جەتىلدىرىپ، وبلىستاعى تۇراقتى الەۋمەتتىك-ەكونوميكالىق دامۋدى قامتاماسىز ەتۋدى تاپسىردى.

جاڭالىقتار