دوكتورانتتار وسى وقۋ جىلىنان باستاپ قانشا تەڭگە شاكىرتاقى الاتىنى ايتىلدى

نۇر-سۇلتان. قازاقپارات - ق ر عىلىم جانە جوعارى ءبىلىم ءمينيسترى ساياسات نۇربەك جاڭا وقۋ جىلىندا شاكىرتاقى كولەمى قانداي بولاتىنىن ايتتى، دەپ حابارلايدى قازاقپارات ءتىلشىسى.

«رەسپۋبليكالىق كونكۋرستىق كوميسسيانىڭ شەشىمى بويىنشا 56375 گرانت تاعايىندالدى. بۇدان باسقا، جاڭا وقۋ جىلىنان باستاپ باكالاۆريات دەڭگەيىندە ستيپەنديا % 20 وسەدى. ال، ماگيستراتۋرا جانە دوكتورانتۋرا ستيپەندياسى %15 وسەدى. ەندى جىل سايىن 15-20 پايىز ءوسىپ تۇرادى. مىسالى، دوكتورانتتار وسى وقۋ جىلىنان باستاپ 195 مىڭ تەڭگە شاكىرتاقى الادى. بۇل نورما شامامەن 161 مىڭ ءبىلىم الۋشىعا قاتىستى بولادى»، - دەدى ۆەدومستۆو باسشىسى.

سونداي-اق، ول پرەزيدەنت قاسىم-جومارت توقايەۆتىڭ تاپسىرماسى بويىنشا باتىس جانە حالىق تىعىز قونىستانعان وڭىرلەردىڭ جاستارى ءۇشىن 10 مىڭ گرانت، «سەرپىن» جوباسىنا 3653 گرانت، شەتەل ازاماتتارىنا 490 گرانت بولىنگەنىن ەسكە سالدى. ونىڭ ىشىندە ورتالىق ازيا ەلدەرىنىڭ ازاماتتارىنا 150 گرانت، يسلام ىنتىماقتاستىعى ۇيىمدارى ەلدەرىنىڭ ازاماتتارىنا 100 ورىن قاراستىرىلعان.

ايتا كەتسەك، ستۋدەنتتەرگە باعا قويۋ كەزىندە ونىڭ اكادەميالىق بىلىمىمەن بىرگە الەۋمەتتىك جانە زەرتتەۋ بەلسەندىلىگىن ەسكەرەتىن پيلوتتىق جوبا قولعا الىنادى.

سونداي-اق، ندۋستريا ماماندارى مەن توپ- مەنەدجەرلەر ستۋدەنتتەردىڭ ديپلومدىق جۇمىستارىنا جەتەكشىلىك ەتەدى.