ەكىباستۇز قالاسىنىڭ جاڭا اكىمى تاعايىندالدى

ەكىباستۇز. قازاقپارات - پاۆلودار وبلىسىنىڭ اكىمى ءابىلقايىر سقاقوۆ ەكىباستۇز اكتيۆى الدىندا قالانىڭ جاڭا اكىمىن تانىستىردى، دەپ حابارلايدى قازاقپارات اكىمدىككە سىلتەمە جاساپ.

وبلىس اكىمى باسپا ءسوز قىزمەتىنىڭ مالىمەتىنشە، بۇل لاۋازىمعا وسىعان دەيىن ەرتىس اۋدانىنىڭ اكىمى بولعان ايان بەيسەكين تاعايىندالدى. ءوڭىر باسشىسى ءابىلقايىر سقاقوۆ قالا اكىمى الدىندا تۇرعان باستى مىندەتتەردى ايقىنداپ بەردى.

پاۆلودار وبلىسىنىڭ تۋماسى ايان بەيسەكين ءوزى تۋعان ەرتىس اۋدانىن 2019 -جىلدان بەرى باسقارعان. وعان دەيىن پاۆلودار قالاسى جانە جەلەزين اۋدانى اكىمىنىڭ ورىنباسارى بولدى. 2015 -جىلدان 2017 -جىلعا دەيىن بەيسەكين الماتى كاسىپكەرلىك جانە يندۋستريالدى- يننوۆاتسيالىق دامۋ باسقارماسى باسشىسىنىڭ ورىنباسارى قىزمەتىن اتقارعان. مەگاپوليسكە دەيىن سولتۇستىك قازاقستان وبلىسى اكىمدىگى، مەملەكەتتىك قىزمەت جونىندەگى اگەنتتىك جۇيەسى مەن جەكە مەنشىك سەكتوردا جۇمىس ىستەگەن.

ايان بەيسەكين - پرەزيدەنتتىك جاستار كادرلىق رەزەرۆىنىڭ مۇشەسى، «بولاشاق» باعدارلاماسىنىڭ تۇلەگى. 2008 -جىلى ل. ن. گۋميليەۆ اتىنداعى ەۇۋ مەملەكەتتىك جەرگىلىكتى باسقارۋ ماماندىعى بويىنشا ءتامامداپ، 2013 -جىلى م. ۆ. لومونوسوۆ اتىنداعى ممۋ مەملەكەتتىك اكىمگەرلىك ماگيسترى اتاعىنا يە بولدى.

ءابىلقايىر سقاقوۆ ەكىباستۇزدىڭ بىرەگەي قۇرىلىمدى ەكونوميكاسى مەن ەڭبەك داستۇرلەرىنە يە ەرەكشە قالا ەكەندىگىن اتاپ ءوتتى.

«ەكىباستۇزدى باسقا قالالاردان ەرەكشەلەيتىن، ارينە، ادامدار. مۇنداعى تۇرعىندار قالا دامۋىنا بەي- جاي قارامايدى، نىق ازاماتتىق پوزيتسياسى بار، ساياسي بەلسەندى. ەكىباستۇزدىقتار قالاسىنىڭ تاعدىرىنا قاشان دا جانى اشيدى جانە مەن ولاردى جاقسى تۇسىنەمىن. ماسەلەن، جول جوندەۋدى الايىق. قالانىڭ بىرنەشە كوشەسىن ارالاپ كوردىم: جول قازعان بويى سول كۇيىندە جاتىر. جوندەۋ جۇمىستارىنىڭ بىتەتىن ۋاقىتى بەلگىسىز» - دەدى وبلىس اكىمى.

ءوڭىر باسشىسىنىڭ ايتۋىنشا، قالا تۇرعىندارى قۇزىرەتتى قالا قىزمەتتەرىمەن بايلانىستىڭ جوقتىعىن ءجيى ايتادى. اكىمدىك پەن قالا تۇرعىندارى اراسىنداعى ءتيىمدى ديالوگتىڭ جەتىسپەۋشىلىگىن تۇرعىندارمەن كەزدەسكەن وبلىس اكىمىنىڭ ءوزى كوز جەتكىزگەن. ءابىلقايىر سقاقوۆ ايان بەيسەكينگە وسى ماسەلەنى تەز ارادا تۇزەتۋدى تاپسىردى.

«تۇرعىندار شىنايى اقپاراتتى ۋاقتىلى ءارى تولىق كولەمدە الىپ تۇرۋى كەرەك. شىندىق قانداي اشى بولسا دا، ادامدارعا دەر كەزىندە جەتكىزىلۋى ءتيىس. بۇل ماسەلەنى شەشۋگە ۋاقىت تىم از. جاڭا وقۋ جىلى، جىلۋ بەرۋ ماۋسىمى تايادى - تۇرعىنداردىڭ ساۋالدارى ارتا تۇسپەك. قازىرگى كەزدەگى ەڭ ماڭىزدى ماسەلەلەردىڭ ءبىرى - الداعى جىلۋ بەرۋ ماۋسىمى. بۇگىن جىلۋمەن قامتۋ ماسەلەسىنە بارلىق جاۋاپتى تاراپتاردىڭ قاتىسۋىمەن جەكە جيىن وتكىزىلەدى. وسىعان دەيىن اكتسيونەرلەرمەن سويلەستىم. بىردەن ايتامىن: قالانى جىلۋسىز قالدىرمايمىز. بارلىق قاجەتتى كۇشتى پايدالانىپ، ماسەلەنى شەشەمىز»، - دەدى ءوڭىر باسشىسى.

ءابىلقايىر سقاقوۆ الەۋمەتتىك، مادەني جانە سپورت سالاسىندا دا ءبىرقاتار مىندەتتەر قويدى. ول قالانىڭ جاڭا باسشىلىعىنان باستاماشىلدىقتى كۇتەتىن ايتتى.

ونىڭ ايتۋىنشا، بارلىق جۇمىس ەكىباستۇز وڭىرىندە تۇراتىن ادامداردىڭ ءومىر ءسۇرۋ ساپاسىن ارتتىرۋعا باعىتتالۋى ءتيىس. وبلىس اكىمى بۇل جۇمىستىڭ قانشالىقتى جۇزەگە اسىرىلىپ جاتقاندىعىن نازاردا ۇستايتىنىن ايتىپ، جوسپاردان تىس ساپارلارى كەزىندە دە باقىلاپ وتىراتىنىنا ۋادە بەردى.