ستۋدەنتتەردىڭ ءبىلىمىن باعالاۋ ءتاسىلى وزگەرەدى - ساياسات نۇربەك

نۇر-سۇلتان. قازاقپارات - ستۋدەنتتەرگە باعا قويۋ كەزىندە ونىڭ اكادەميالىق بىلىمىمەن بىرگە الەۋمەتتىك جانە زەرتتەۋ بەلسەندىلىگىن ەسكەرەتىن پيلوتتىق جوبا قولعا الىنادى، دەپ حابارلايدى قازاقپارات ءتىلشىسى.

ۇكىمەت وتىرسىندا عىلىم جانە جوعارى ءبىلىم ءمينيسترى ساياسات نۇربەك وسىنداي مالىمەت بەردى.

«ەڭبەك نارىعىن جوعارى ءبىلىم دەڭگەيىندە تاجىريبەلى ماماندارمەن قامتاماسىز ەتۋ جانە ولاردى موبيلدى دايارلاۋ ءۇشىن قولدانبالى باكالاۆريات مودەلى ەنگىزىلدى. وسى جىلدىڭ قىركۇيەك ايىنان باستاپ پيلوتتىق رەجيمدە 8 جوعارى وقۋ ورنىنىڭ بازاسىندا جاڭا باعدارلامالار ىسكە قوسىلادى.

سونداي-اق، 4 جوعارى وقۋ ورنىنىڭ بازاسىندا پيلوتتىق رەجيمدە ستۋدەنتتەردىڭ الەۋمەتتىك جانە زەرتتەۋ بەلسەندىلىگىن ەسكەرەتىن ءبىلىم الۋشىلاردى باعالاۋدىڭ جاڭا مودەلى، ياعني ينتەگرالدىق GPA پيلوتتىق جوباسىن باستاپ جاتىرمىز. ەندى ستۋدەنتتەردى باعالاۋ كەزىندە تەك اكادەميالىق كورسەتكىشتەر ەمەس، زەرتتەۋلەرگە، ۆولونتەرلىك، دەباتتىق قوزعالىستارعا قاتىسۋى دا ەسكەرىلەدى»، - دەدى مينيستر.

ونىڭ ايتۋىنشا، تامىزدىڭ سوڭىندا جوعارى ءبىلىم بەرۋ سالاسىنىڭ وكىلدەرى دەربەس تامىز كونفەرەنتسياسىن وتكىزبەك.

«تورتىنشىدەن، جوعارى وقۋ ورىندارى اكادەميالىق پروتسەسكە دايىندىقتى قامتاماسىز ەتۋ جونىندەگى جۇمىستى اياقتادى. رەكتورلارمەن ءۇش ۇلكەن كەزدەسۋ وتكىزدىك. ءبىلىم بەرۋ باعدارلامالارىن وقۋ- ادىستەمەلىك قامتاماسىز ەتۋ، كەستەنى بەكىتۋ، پەداگوگيكالىق جۇكتەمەنى انىقتاۋ، وقىتۋشى- پروفەسسورلىق قۇرامنىڭ بىلىكتىلىگىن ارتتىرۋدى قامتاماسىز ەتۋ جۇمىستارى اتقارىلدى.

24-25-تامىزدا تامىز كونفەرەنتسياسىن وتكىزەمىز. فورۋم اياسىندا فورسايت- سەسسيالار مەن ءبىرقاتار سەمينارلار ۇيىمداستىرىلادى»، - دەدى ۆەدومستۆو باسشىسى.

بۇعان دەيىن ج و و پراكتيك- ماماندار مەن توپ- مەنەدجەرلەردى ستۋدەنتتەر مەن ماگيسترانتتاردىڭ ديپلومدىق جانە زەرتتەۋ جۇمىستارىنا جەتەكشىلىك ەتۋگە تارتا الاتىنى ايتىلدى.