ءتورت وڭىردە مەكتەپتەر جاڭا وقۋ جىلىنا كەشىكتىرىپ بەرىلۋى مۇمكىن
«جاڭا وقۋ جىلىنىڭ باستالۋىنا ەكى اپتا قالدى. وعان دەيىن 81 جاڭا مەكتەپ اشۋ جوسپارلانۋدا. 213 مەكتەپ تولىق جوندەۋدەن وتەدى. سونىمەن قاتار، باتىس قازاقستان، تۇركىستان، الماتى وبلىستارىندا جانە الماتى قالاسىنداعى ءبىرقاتار ءبىلىم وشاقتارىندا جوندەۋ جۇمىستارىنىڭ اياقتالماي قالۋ ءقاۋپى بار. سوندىقتان، اتالعان وڭىرلەر شۇعىل شارالار قابىلداپ، جاڭا وقۋ جىلىنا دايىندىقتى تولىق كولەمدە قامتاماسىز ەتۋى كەرەك. بۇل جوسپارلانعان مەكتەپ قۇرىلىسىنا دا قاتىستى»، - دەدى ۇكىمەت باسشىسى.
سونداي-اق ول ءوڭىر اكىمدىكتەرىنە ءبىلىم بەرۋ ۇيىمدارىنىڭ بەينە باقىلاۋ جۇيەلەرىن ىشكى ىستەر ورگاندارىنىڭ جەدەل باسقارۋ ورتالىقتارىنا شىعارۋدى جەدەلدەتۋدى تاپسىردى.
«سونىمەن قاتار، مەكتەپتەردى كۇزەتۋگە ليتسەنزيالانعان ۇيىمداردى تارتۋ جونىندەگى تالاپتاردىڭ ساقتالۋىن قامتاماسىز ەتسىن. وقۋ- اعارتۋ مينيسترلىگى ىشكى ىستەر مينيسترلىگىمەن بىرلەسىپ، ءبىلىم بەرۋ باعدارلاماسىنا جول قوزعالىسى ەرەجەلەرىن ۇيرەتۋدى مىندەتتى تۇردە ەنگىزۋ جانە جۇمىس ىستەپ جۇرگەن ينسپەكتورلاردى وسى جۇمىسقا تارتۋ ماسەلەسىن قاراسىن»، - دەدى ءاليحان سمايىلوۆ