قازاقستاندا ازىق- تۇلىك باعاسى قانشالىقتى قىمباتتادى
بۇل جايىندا ۇلتتىق ستاتيستيكا بيۋروسىنان ءمالىم ەتتى، دەپ حابارلايدى قازاقپارات ءتىلشىسى.
«2022 -جىلعى شىلدەدە 2021 -جىلعى جەلتوقسانمەن سالىستىرعاندا تۇتىنۋ باعاسىنىڭ يندەكسى 111,7 پايىزدى قۇرادى. ازىق- تۇلىكتىك تاۋارلارعا باعالار - 16,9، ازىق- تۇلىكتىك ەمەس تاۋارلارعا – 10، حالىققا ارنالعان اقىلى كورسەتىلەتىن قىزمەتتەرگە 6,2 پايىز ءوستى. ونەركاسىپ ونىمدەرىنە ءوندىرۋشى كاسىپورىندار باعاسى 2022 -جىلعى شىلدەدە 2021 -جىلعى جەلتوقسانمەن سالىستىرعاندا 18,5 پايىز ارتتى»، - دەلىنگەن بيۋرو اقپاراتىندا.
ۆەدومستۆونىڭ مالىمەتىنشە، 2022 -جىلعى شىلدەدە باعانىڭ ءوسۋى باستى پيازعا - 9,8، قانتقا - 6,1، كۇرىشكە - 4,4، جارمالارعا - 4,1، ۇنعا، مينەرالدى جانە اۋىز سۋعا - 3,5، كونسەرۆىلەنگەن سۇتكە - 3,3، ماكارون ونىمدەرىنە - 3,1، توقاش جانە ۇن ونىمدەرىنە - 2,8، جۇمىرتقاعا، جەمىس جانە كوكونىس شىرىندارىنا - 2,4، كونديتەرلىك ونىمدەرگە، جىلقى ەتىنە - 2,2، قۇس ەتىنە 2,1 پايىز بولعان. ال كارتوپ - 7,5، جاڭادان جينالعان جەمىستەر – 6، جاڭا جينالعان كوكونىستەر 5,2 پايىز ارزانداعان.