ساۋدا ءمينيسترى جۋرناليستەردەن ءبىر اپتا ۋاقىت سۇرادى
ۇكىمەت وتىرىسىنان كەيىن ب ا ق وكىلدەرى كەشە عانا ساۋدا جانە ينتەگراتسيا ءمينيسترى بولىپ تاعايىندالعان سەرىك جۇمانعاريننەن قانت باسى قاشان ازراندايتىنى، بۇرىنعى مينيستر باقىت سۇلتانوۆتىڭ قانداي قاتەلىكتەر جىبەرگەنى تۋرالى سۇرادى.
«مەنىڭ ارىپتەسىم باقىت تۇرلىحان ۇلى - تاجىريبەلى، بەلسەندى، كاسىبي مامان. ارينە، قيىن ۋاقىت بولدى. ەكى ۇلكەن پروبلەما قايدان شىققانىن بىلەسىزدەر. ءبىرىنشى - COVID، ەكىنشى - ۋكراينا داعدارىسى بولىپ جاتىر. ول، ارينە باعالارعا دا، لوگيستيكاعا دا اسەر ەتتى. سول سەبەپتى، قازىر بىرەۋدى جامانداپ، بىرەۋدى ماقتايتىن جاعدايىم جوق. مەنىڭ قازىرگى مىندەتىم - ەرتەڭ وسىنداي جاعدايدىڭ قايتالانباۋى»، - دەدى ۆەدومستۆو باسشىسى.
ونىڭ ايتۋنىشا، قازىر كوتەرمە ساۋدادا قانتتىڭ باعاسى 700-800 تەڭگەگە جەتكەن. ال، زاۋىتتان شىققان باعا - 450 تەڭگە.
«ءدال قازىر قانت باعاسى ارزاندايدى دەپ ايتا المايمىن. بۇگىن ءبىرىنشى كۇن جۇمىسقا شىعىپ تۇرمىن. ءبىر اپتا بەرىڭىزدەر»، - دەدى مينيستر.
سونداي-اق، ول قانت نارىعىن رەتتەۋ ءۇشىن ءىرى-ءىرى زاۋىت سالۋ قاجەت ەمەس دەگەن پىكىر ايتتى.
«قىزىلشا نەگە وسپەيدى؟ قىزىلشا ءوسىرۋ دەگەن وڭاي شارۋا ەمەس. وعان سۋ، ەلەكتر ەنەرگياسى كەرەك. بىزدە بۇكىل زاۋىتتار وڭتۇستىكتە. نەگە ولاي؟ قازىر وندا ەلەكتر ەنەرگياسى تاپشى، سۋ قىمبات، ءتىپتى جوق تا. جاقىندا ساراپشىلارمەن سويلەستىم. قىزىلشا سولتۇستىكتە دە، باتىستا دا وسەدى. ساراپشىلار ۇلكەن، ءىرى زاۋىتتار ءتىپتى قاجەت ەمەس شىعار دەپ وتىر. وسى ماسەلەلەردى تالقىلايمىز. مەنىڭ بىلۋىمشە، اۋىل شارۋاشىلىعى ءمينيسترى وسى قانت سالاسىن دامىتۋ ءۇشىن كەشەندى جوسپار دايىندادى. ولاردىڭ دا ۇسىنىستارىن قارايمىز»، - دەدى سەرىك جۇمانعارين.