اسحات ايماعامبەتوۆ ۇلىنا مەكتەپ فورماسىن قانشا تەڭگەگە الدى

نۇر-سۇلتان. قازاقپارات – ق ر وقۋ- اعارتۋ ءمينيسترى اسحات ايماعامبەتوۆ ۇلىنىڭ مەكتەپ فورماسىن قايدان جانە قانشا تەڭگەگە العانىن ايتتى، دەپ حابارلايدى قازاقپارات ءتىلشىسى.

ءمينيستردىڭ ايتۋىنشا، ازىرگە مەكتەپ جاسىنداعى ءبىر بالاسى بار.

«وسى دەمالىستا بالامدى ەرتىپ دۇكەنگە باردىم. بىرنەشە اق جەيدە، شالبار، كوستيۋم، گالستۋك الدىق. باعاسىنا كەلسەك، 35 مىڭعا جۋىق اقشا كەتتى. قايدان دەسەڭىزدەر، «گلاسمان» اتتى دۇكەنگە بارىپ، جۇرتپەن بىرگە كەزەككە تۇرىپ، 36-ولشەمدى كيىم الىپ قايتتىق. بارلىق وتباسىلار سەكىلدى ءبىز دە مەكتەپكە دايىندىقتى باستادىق»، - دەپ جاۋاپ بەردى مينيستر ۇكىمەت كۋلۋارىندا تىلشىلەردىڭ سۇراعىنا.

سونىمەن بىرگە، مينيستر الەۋمەتتىك جاعدايى تومەن وتباسىلارعا مەكتەپ جاراعىن الۋعا كومەك كورسەتىلەتىنىن ەسكە سالدى.

«بيىل وتە ماڭىزدى ەكى شەشىم قابىلدادىق. بۇل ماسەلەنى اتا-انالار ءۇش جىل بويى كوتەرگەن ەدى. بىرىنشىدەن، وقۋشىلارعا شاق ەمەس، جەڭى سالبىراپ تۇراتىن مەكتەپ فورمالارى تاراتىلاتىن. بۇل ماسەلەنى شەشۋ ءۇشىن فورماعا قاجەتتى قاراجاتتى اتا-انانىڭ جەكە شوتىنا اۋدارۋدى ۇيعاردىق. بۇل جۇمىستار جۇرگىزىلىپ جاتىر. ەكىنشىدەن، مىسالى سولتۇستىك قازاقستاندا بىلتىر ءبىر وقۋشىعا 17 مىڭ تەڭگە عانا بولىنەتىن. كەي وڭىرلەردە 20 مىڭ، كەي وڭىرلەردە 25 مىڭ تەڭگە بەرىلىپ كەلگەن. ەندى بيىل قاراجاتتىڭ ەڭ تومەنگى دەڭگەيىن 37 مىڭعا دەيىن كوتەردىك. كەي وڭىرلەردە، مىسالى الماتى قالاسىندا 43 مىڭ تەڭگەگە دەيىن كوبەيتىلدى. ءبىز مۇنى قولدايمىز. بۇل شەشىمدەر 475 مىڭ بالانىڭ ماسەلەسىن شەشۋگە كومەكتەستەدى»، - دەدى اسحات ايماعامبەتوۆ.