ينفلياتسيانى تەجەۋ قۇرالدارى بار، ولاردى ءتيىمدى پايدالانۋ كەرەك - ۇكىمەت باسشىسى

نۇر- سۇلتان. قازاقپارات – ق ر پرەمەر-ءمينيسترى ءاليحان سمايىلوۆ جەتى ايداعى قازاقستاننىڭ الەۋمەتتىك- ەكونوميكالىق دامۋىنا باعا بەردى، دەپ حابارلايدى قازاقپارات ءتىلشىسى.

«جەتى ايدىڭ قورىتىندىسى بويىنشا جالپى ىشكى ءونىمنىڭ ءوسىمى 3,3 پروتسەنتكە جەتتى. ەل ەكونوميكاسىنىڭ وسۋىنە نەگىزىنەن ناقتى سەكتور ۇلەس قوسىپ وتىر. ماسەلەن، وڭدەۋ ونەركاسىبى سالاسىندا تاماق ونىمدەرىن ءوندىرۋ شامامەن 3 پروتسەنتكە، سۋسىن ءوندىرۋ 9 پروتسەنتتەن استام ءوستى. جەڭىل ونەركاسىپتە ءوسىم 5 پروتسەنتتەن جوعارى بولدى. حيميا ونەركاسىبىندە 11 پروتسەنتكە جۋىق، مۇناي وڭدەۋدە 4 پروتسەنت، ماشينا جاساۋ ونىمدەرىن شىعارۋدا 8 پروتسەنتكە جۋىق ءوسىم تىركەلدى»، - دەدى پرەمەر- مينيستر ۇكىمەتتىڭ بۇگىنگى وتىرىسىندا.

سونىمەن بىرگە، ەلدەگى مەتاللۋرگيا ءوندىرىسى 5 پروتسەنت، قۇرىلىس سالاسىندا 8,6 پروتسەنت دەڭگەيىندە ءوسىم بار. 7,7 ميلليون شارشى مەتر تۇرعىن ءۇي پايدالانۋعا بەرىلدى. قىزمەت كورسەتۋ سالاسى بويىنشا ساۋدا 6 پروتسەنتكە، كولىك 5,5 پروتسەنتكە جانە بايلانىس سالاسى 6,5 پروتسەنتتەن استام وسكەن.

«جەتى ايدىڭ قورىتىندىسىندا قاراعاندى مەن سولتۇستىك قازاقستان وبلىستارىندا جانە شىمكەنت قالاسىندا بارلىق كورسەتكىشتەر بويىنشا وڭ ديناميكا قالىپتاسقان.

جاۋاپتى مەملەكەتتىك ورگاندار مەن ءوڭىر اكىمدىكتەرى جۇمىستى جانداندىرىپ، ماقساتتى ماكروەكونوميكالىق كورسەتكىشتەردى قامتاماسىز ەتۋى كەرەك. ءوسۋ ديناميكاسىن ساقتاپ تۇرۋ ءۇشىن ەكونوميكانى ودان ءارى ءارتاراپتاندىرۋ، ينۆەستيتسيالىق جوبالاردى ىسكە اسىرىپ، جۇمىس ورىندارىن قۇرۋدى كۇشەيتىپ، جالعاستىرۋ قاجەت»، - دەدى ءا. سمايىلوۆ.

وعان قوسا، شىلدە ايىنىڭ قورىتىندىسى بويىنشا ەلدەگى جىلدىق ينفلياتسيا 15 پروتسەنت بولعان.

«ماسەلەن، وتكەن اپتادا مونوپولياعا قارسى اگەنتتىككە قانتتىڭ قىمباتتاۋى مەن تاپشىلىعىنا قاتىسى بولۋى مۇمكىن كومپانيا قىزمەتىن تەكسەرۋگە تاپسىرما بەردىم. بۇل پروبلەمانىڭ كوتەرىلگەنىنە ءبىراز بولدى. سوندىقتان، مۇنداي جاعدايدى جاۋاپتى ورگاندار ەرتەرەك انىقتاپ، الدىن الۋ كەرەك.

ينفلياتسيانى تەجەۋ ءۇشىن قاجەتتى قۇرالدار بار. مەملەكەتتىك ورگاندار مەن اكىمدىكتەر ولاردى ءتيىمدى پايدالانۋى ءتيىس.

تاعى دا نازار اۋداراتىن جاعداي - وڭىرلەردەگى دەلدالدىق سحەمالاردى تەكسەرۋ كوميسسيالارىنىڭ جۇمىسىن جانداندىرىپ، الەۋمەتتىك ماڭىزى بار ازىق- تۇلىككە باعا ۇستەمەسىنىڭ 15 پروتسەنت مولشەرىندە بولۋىن ەرەكشە باقىلاۋدا ۇستاۋ كەرەك. سونداي-اق، اكىمدىكتەر اۋىل شارۋاشىلىعى ونىمدەرىن فورۆاردتىق ساتىپ الۋ ءۇشىن كەلىسىم- شارتتاردىڭ ۋاقىتىلى جاسالۋىنا دا باقىلاۋدى كۇشەيتۋى كەرەك»، - دەدى ۇكىمەت باسشىسى.