ساياسات نۇربەك جاتاقحانا ماسەلەسىن شەشۋدىڭ ءۇش جولىن ۇسىندى

None
نۇر-سۇلتان. قازاقپارات – ق ر عىلىم جانە جوعارى ءبىلىم ءمينيسترى ساياسات نۇربەك ۇكىمەت وتىرىسىندا جاتاقحانا تاپشىلىعىن شەشۋدى كوزدەيتىن ءۇش ۇسىنىس كوتەردى، دەپ حابارلايدى قازاقپارات ءتىلشىسى.

«2018 -جىلدان باستاپ جاتاقحانالار قۇرىلىسى باستالدى. «AMANAT» پارتياسىنىڭ سايلاۋالدى تۇعىرناماسىنا سايكەس، 2025 -جىلعا دەيىن 50 مىڭ توسەك ورىن ەنگىزىلۋى كەرەك. جىل سايىن توسەك- ورىن پايدالانۋعا بەرىلەدى. سوعان قاراماستان، قازىرگى تاڭدا جۇيەلى ءۇش ۇلكەن ۇسىنىسىمىز بار. بىرىنشىدەن، قازىرگى تاڭدا «قارجى ورتالىعى» اق جەكە ينۆەستورلارمەن جۇمىس ىستەيتىن قارجى وپەراتورى بولىپ سانالادى. ءبىراق، جەكە ينۆەستورلار ءقازىر جاتاقحانالار سالۋ ماسەلەسىنە كۇمانمەن قارايدى. قۇرىلىس ماتەريالدارىنىڭ باعاسى ءوسىپ كەتتى، «قارجى ورتالىعىنىڭ» شارتتارى دا ينفلياتسيانى كوزگە العاندا قولايلى ەمەس»، - دەگەن مينيستر ۆەدومستۆو تاراپىنان بىرنەشە باستاما قولعا الىناتىنىن اتادى.

«ءبىز «قارجى ورتالىعىمەن» بىرنەشە شارتتى وزگەرتىپ جاتىرمىز. مىندەتتەمەلەردى 8 جىلدان 6 جىلعا قىسقارتامىز. ايلىق كورسەتكىشتەردى كوتەرەمىز، بۇل - قارجى مينيسترلىگىمەن پىسىقتايتىن شارۋا. ەكىنشىدەن، قازىرگى تاڭدا ءال- فارابي اتىنداعى قازاق ۇلتتىق ۋنيۆەرسيتەتىنىڭ جاقسى ءبىر ۇلگىسى بار. الماتىدا ورنالاسقان جەكە قوناقۇيلەر مەن حوستەلدەردى جيناپ، ولارمەن ارنايى كەلىسىمشارتقا وتىرىپ جاتىر. قوناقۇيلەر مەن حوستەلدەرگە دە ىڭعايلى. ءبىز مىندەتتى تۇردە ولارعا 100 پايىزدىق تاپسىرىس بەرەمىز. ولارمەن قارجى مودەلدەرى دە تۇزەلەدى. وسى جوبانى ءبىز قازىر بۇكىل وڭىرلىك ۋنيۆەرسيتەتتەرمەن پىسىقتايمىز»، - دەدى ۆەدومستۆو باسشىسى.

سونداي-اق، ول جاتاقحانا قۇرىلىسىن مەملەكەت پەن جەكەمەنشىك ارىپتەستىگى ارقىلى جانداندىرۋعا بولاتىنىن ايتتى.

«ۇشىنشىدەن، ارينە، جەكە ينۆەستورلارسىز بۇل ماسەلە تولىققاندى شەشىلمەيدى. سوندىقتان، ءىرى-ءىرى قۇرىلىس كومپانيالارىمەن، وڭىرلىك قۇرىلىس كومپانيالارىمەن جەكە-جەكە جۇمىس ىستەيمىز. مەملەكەت- جەكەمەنشىك ارىپتەستىگى اياسىندا، باسقا دا شارتتار ارقىلى وڭىرلىك ۋنيۆەرسيەتتەرمەن بىرىگىپ جاتاقحانالار قۇرىلىسىن قولعا الامىز»، - دەدى مينيستر.

سوڭعى جاڭالىقتار