ەلەكتروموبيلدەر ادامداردى جۇمىسسىز قالدىرۋى مۇمكىن

None
None
نۇر-سۇلتان. قازاقپارات - ساراپشىلار ەلەكترموبيلدەرگە بايلانىستى الەمگە جاڭا جۇمىسسىزدىق قاۋپى ءتونىپ تۇرعانىن ەسكەرتەدى.

كەيىنگى ۋاقىتتا كولىكتىڭ بۇل تۇرىنە دەگەن سۇرانىس ارتىپ بارادى. ال كادىمگى تەمىر تۇلپارعا قاراعاندا ونىڭ ءوندىرىسى از ەڭبەكتى قاجەت ەتەدى. سوندىقتان ماسەلەن فورد كومپانياسى 8 مىڭ قىزمەتكەرىن قىسقارتۋدى جوسپارلاپ وتىر. ەگەر ا ق ش نارىعىندا ەلەكترموبيلدەردىڭ ۇلەسى 50 پروتسەنتتەن اسسا، جەرگىلىكتى كولىك وندىرۋشىلەرگە 75 مىڭ جۇمىس ورنىن قىسقارتۋعا تۋرا كەلەدى. 2030 -جىلعا تامان ەۋروپا ەلدەرى دە ەلەكترموبيلدەرگە كوشۋدى جوسپارلاپ وتىر. ساراپشىلار بۇل ءبىراز ادامنىڭ جۇمىسسىز قالۋىنا اسەر ەتەنىن ايتادى. ەڭبەك نارىعىنداعى احۋالعا كوروناۆيرۋس قاتتى اسەر ەتتى.

پاندەميانىڭ العاشقى جىلى 34 ميلليون جاس ادام جۇمىسسىز قالعان ەكەن. ويتكەنى كەيبىرەۋلەر ءبىلىم الۋىن جالعاستىرۋ مۇمكىندىگىنەن ايىرىلدى. كوپ مەكەمە قىزمەتىن توقتاتقاندا، ەندى عانا وقۋىن اياقتاعان تاجىريبەسى از ازاماتتاردىڭ جۇمىستا قالۋ مۇمكىندىگى ازايعانى تۇسىنىكتى. حالىقارالىق ەڭبەك نارىعىنىڭ بيىلعا جاساپ وتىرعان بولجامى كوڭىل كونشىتپەيدى. ولار ەكى قولعا ءبىر كۇرەك تاپپاي جۇرگەن جاستاردىڭ سانى 73 ميلليونعا جەتە مە دەپ الاڭدايدى. بۇل پاندەمياعا دەيىنگى 2019- جىلمەن سالىستىرعاندا، 6 ميلليون ادامعا كوپ.

«جاستاردىڭ ەكى قولعا ءبىر كۇرەك تاپپاي وتىرۋىنىڭ ءبىر سەبەبى - ءبىلىم دەڭگەيىنىڭ تومەندىگى جانە تاجىريبەسىنىڭ ازدىعى. كوروناۆيرۋس سالدارىنان وقۋىن جالعاستىرا الماي قالعاندار قانشاما. جاستار اراسىنداعى جۇمىسسىزدىق ماسەلەسىندە ءبىزدى اسىرەسە ايەلدەردىڭ جاعدايى الاڭداتىپ وتىر. ويتكەنى پاندەميا كەسىرىنەن قىزمەتىنەن ايىرىلعانداردىڭ كوبى قىز- كەلىنشەكتەر»، دەيدى حالىقارالىق ەڭبەك ۇيىمىنىڭ وكىلى مارتا نيۋتون.

قىتايدا جاستار اراسىنداعى جۇمىسسىزدىق دەڭگەيى رەكوردتىق 20 پروتسەنتكە جۋىقتادى. ساراپشىلار وعان كوروناۆيرۋس پاندەمياسى سەبەپ بولعانىن ايتادى. ويتكەنى بيلىك ىندەتپەن كۇرەستە «نولدىك توزىمدىلىك» ساياساتىن ۇستانادى. ياعني ۆيرۋستى جۇقتىرۋدىڭ ءبىرلى- جارىم وقيعاسى ءۇشىن قاتاڭ شەكتەۋ شارالارىن قولدانادى. سونىڭ سالدارىنان كوپتەگەن كاسىپورىن مەن تاماقتانۋ ورنى جابىلىپ، بۇگىندە جوعارى وقۋ ورنىنىڭ 11 ميلليون تۇلەگى جۇمىس تاپپاي سەندەلىپ ءجۇر. جاقىندا جۇرگىزىلگەن ساۋالناماعا سايكەس، كومپانيالاردىڭ ۇشتەن ءبىرى تاجىريبەسى از جاستاردى جۇمىسقا الۋعا اسىقپايتىنىن جاسىرماي ايتقان. سول سەبەپتى بيلىك جۇمىسسىزدىقپەن كۇرەسكە 400 ميلليارد دوللار ءبولۋدى كوزدەپ وتىر.

«مەن ۋنيۆەرسيتەتتە وقىپ جۇرگەندە، بوس ورىندار بولعان. ءبىراق وقۋىمدى اياقتاعاننان كەيىن جۇمىس تاپپاي ۇلكەن قيىندىققا تاپ بولدىم. مەنىمەن بىرنەشە كومپانيا سۇحبات وتكىزدى. ولار جاڭالارىن الماق تۇگىل، بۇرىنعى قىزمەتكەرلەرىن قىسقارتقالى جاتقانىن ايتتى. بۇرىن بولاشاققا زور ۇمىتپەن قاراۋشى ەدىم. قازىر ونداي سەنىم جوق»، دەيدى ج و و تۇلەگى ليۋ چيان.

«ەڭبەك نارىعىنداعى جاعداي تۇراقسىز. بيىل كوكتەمدە ءبىراز كومپانيانىڭ ءوندىرىس كولەمىن قىسقارتقانىن كوردىك. سوندىقتان ولاردا جاڭادان قىزمەتكەرلەر الۋ قاجەتتىلىگى جوق. نارىقتاعى تۇراقسىزدىق ءالى دە ساقتالادى دەپ ويلايمىن. سوندىقتان جاستار جاعى وزگەرىستەرگە تەز بەيىمدەلىپ ۇيرەنۋ كەرەك»، دەيدى ەكونوميكا جانە بيزنەس ۋنيۆەرسيتەتىنىڭ دوتسەنتى جان چەنگان.

پولشانىڭ ەڭبەك نارىعىنداعى جاعداي كەرىسىنشە قۋانتارلىق. مۇندا شىلدەدە جۇمىسسىزدىق 5 پروتسەنتكە جۋىقتاعان. ول كەيىنگى 32 جىلدا بولماعان ەڭ تومەنگى كورسەتكىش. بۇعان ۋكرايناداعى جاعداي اسەر ەتكەن. كورشى ەلدە شيەلەنىس باستالعالى كوپ ادام وسى پولشاعا بوسىپ كەتكەن. سولاردىڭ 372 مىڭى وسىندا جۇمىسقا ورنالاستىرىلعان. سونداي-اق الەمدە ينفلياتسيانىڭ ورشۋىنە بايلانىستى جەرگىلىكتى تۇرعىندار بۇرىن وزگە ەلدەردەن كەلەتىن ەڭبەك ميگرانتتارىنىڭ ىستەيتىن جۇمىستارمەن وزدەرى اينالىساتىن بولعان. بۇل اسىرەسە تاماق ونەركاسىبى مەن لوگيستيكا سالاسىندا بايقالىپ وتىرعان جاعداي.



24.kz

سوڭعى جاڭالىقتار