قازاقستاندا وقۋ قۇرالدارى نەلىكتەن قىمباتتادى - شولۋ

نۇر-سۇلتان. قازاقپارات - جاڭا وقۋ جىلى جاقىنداپ كەلەدى جانە قازاقستاندىقتار مەكتەپكە قاجەتتى تاۋار ساتىپ الا باستادى.

مەكتەپ فورماسىنان بولەك، بالالارعا بازالىق كەڭسە تاۋارلارىن دا الۋ قاجەت. قازاقپارات اگەنتتىگى وقۋ قۇرالدارىنىڭ باعاسى قانشالىقتى وسكەنىنە جانە قىمباتتاۋدىڭ سەبەبىنە شولۋ ۇسىنادى.

وقۋ قۇرالدارى قانشالىقتى قىمباتتادى

كەڭسە تاۋارى دۇكەندەرىنىڭ بىرىندە ايتىلعانداي، وقۋ قۇرالدارىنىڭ نەگىزگى تۇرلەرى قاعازدان (داپتەر، كۇندەلىك، سۋرەت سالۋ البومدارى)، ءتۇرلى سورتتى پلاستيكتەن (قالام، قارىنداش، سىزعىش) جانە تەمىردەن (قاعاز قىستىرعىش، باتىرما، قىسقىشتار) جاسالادى. مۇنىڭ ءبارى قازىر بىرنەشە ەسە قىمباتتادى. وعان قازاقستان مەن ت م د قاعاز نارىعىنداعى رەسەيلىك قاعاز مونوپولياسى ىقپال ەتەتىن كورىنەدى.

«داپتەرلەر جانە باسقا دا تاۋارلاردى شىعارۋ ءۇشىن وراما قاعاز قولدانىلادى. مۇنداي قاعاز قازىر تاپشى، ونىڭ قۇنى ءوستى، ال ءبىرىنشى جارتىجىلدىقتا رۋبل باعامى 5,5 تەڭگەدەن رەكوردتى كورسەتكىش - 9 تەڭگەگە دەيىن ءوستى. پلاستيك مۇنايدان نەمەسە گازدان الىنادى. ەنەرگيا باعاسى دا شارىقتاۋدا. ارزان كەڭسە تاۋارى قايدان كەلەدى؟»، - دەيدى دۇكەن وكىلى.

كەڭسە تاۋارلارىنىڭ بولشەك ساۋدا باعاسىنا ەلدەگى ۇلكەن باعامدىق ايىرماشىلىق، لوگيستيكالىق شىعىندار (كولىك قىزمەتتەرى 3-4 ەسە قىمباتتاعان) سەكىلدى جەرگىلىكتى ينفلياتسيالىق پروتسەستەر دە اسەر ەتەدى. تاۋار كوپ جاعدايدا جاقىن جانە الىس شەتەلدەن يمپورتتالادى، سوندىقتان ونىڭ باعاسى بيىل ورتا ەسەپپەن 40-50 پايىزعا وسكەن.

قىمباتتاۋدىڭ سەبەبى نەدە

«قازاقستاندىق وندىرۋشىلەر وقۋ مەن كەڭسە تاۋارلارىنىڭ ازداعان ءتۇرىن عانا شىعارادى. وندا دا قازاقستان حالقىنىڭ قاجەتتىلىكتەرى ءۇشىن جەتكىلىكسىز كولەمدە كۇندەلىكتەر، قاعاز، ءتۇرلى- ءتۇستى قاعاز عانا وندىرىلەدى. ادەتتە، وتاندىق كەڭسە تاۋارلارىنىڭ باعاسى يمپورتتالاتىن تاۋارلارعا قاراعاندا ارزان ەمەس. وتاندىق كەڭسە تاۋارلارىن وندىرەتىن شيكىزات تا شەتەلدەن اكەلىنەدى. ءبىزدىڭ كومپانيا كەڭسە تاۋارلارىنىڭ 95 پايىزىن ەۋروپادان، رەسەيدەن، قىتايدان اكەلەدى»، - دەپ ءتۇسىندىردى «ابدي كومپاني» ا ق پرەزيدەنتى ابدىبەك بيمەنديەۆ.

سونىمەن بىرگە كومپانيا ءبىرىنشى سىنىپ وقۋشىسى مەن ورتا سىنىپ وقۋشىلارىنا ارنالعان جيىنتىقتار تۋرالى اقپارات بەردى.

باستاۋىش سىنىپ وقۋشىلارىنا تەك قاجەتتى كەڭسە تاۋارلارىن ساتىپ الۋ ۇسىنىلادى، مىسالى: - 12 پاراقتىق داپتەرلەر (50 دانا)، شاريكتى قالامدار (5 دانا)، قارا گرافيت قارىنداشتار (2 دانا)، ءتۇرلى- ءتۇستى قارىنداشتار (6 ءتۇس)، سۋرەت سالاتىن البومدار (2 دانا)، اكۆارەل بوياۋلارى (6 ءتۇس)، قىلقالامدار (جيىنتىق)، سۋ وتكىزبەيتىن ستاقان، ەرمەكساز (6 ءتۇس)، ەرمەكسازعا ارنالعان تاقتا، داپتەر مەن كىتاپقا ارنالعان مۇقابالار (جيىنتىق)، ءتۇرلى-ءتۇستى قاعاز، اق جانە ءتۇرلى-ءتۇستى كارتون، سىزعىش، وشىرگىش، ۇشتاعىش، قايشى، جەلىم-قارىنداش، پەنال، ورتوپەديالىق ريۋكزاك.

ورتا سىنىپ وقۋشىلارى ءۇشىن كومپانيا ماماندارى وسىنداي تاۋارلاردى ۇسىنادى، ءبىراق جاس وسپىرىمدەر ريۋكزاكتارىن، سىزعىشتار جيىنتىعىن، اۆتوماتتى قارىنداشتى، سونداي-اق ءتۇرلى- ءتۇستى قارىنداشتار، اكۆارەلدەر، پلاستيليندەر جيىنتىعىنداعى 12 ءتۇستىسىن تاڭداۋعا كەڭەس بەرەدى.

ۇسىنىلاتىن تۇستەر مەن تاۋار سانىن ەسكەرە وتىرىپ، تومەنگى سىنىپتار ءۇشىن ەڭ تومەنگى سەبەت قۇنى 17 مىڭ تەڭگەدەن، ورتا سىنىپتار ءۇشىن - 20 مىڭ تەڭگەدەن باستالادى. گلوبۋس، كونسترۋكتور، پاپكالار، اياق كيىم سومكەلەرى جانە ت. ب. سياقتى قوسىمشا كەڭسە تاۋارلارىن اتا-انالار ءوز قالاۋىمەن الا الادى.

اتالعان دۇكەندەردە 12 بەت داپتەر قۇنى- 45 تەڭگە. شاريكتى كوك سيالى قالام - 50 تەڭگە. قارا گرافيت قارىنداش - 55 تەڭگە. قالا ورتالىعىنداعى بىرنەشە دۇكەندە دە 12 بەت داپتەردىڭ ورتاشا باعاسى 40-45 تەڭگەنى قۇرايدى.

جالپى، كومپانيا باسشىسى تۇسىندىرگەندەي، 12 بەت داپتەر باعاسى قازىرگى ۋاقىتتا نارىق بويىنشا 30 دان 80 تەڭگەگە دەيىن وزگەرىپ وتىرادى. ءبىراق كوپتەگەن كومپانيالاردىڭ كەيبىر كەڭسە تاۋارلارىنىڭ باعاسىن تومەندەتۋى - ماركەتينگتىك قادام عانا.

«كوپتەگەن ساۋدا ورىندارى مەن كومپانيالار داپتەرگە وزىندىك قۇنىنان دا تومەن نەگىزسىز باعانى قويادى. بۇل، ارينە، باسەكەلەستەرىنەن باسىم ءتۇسۋ ءۇشىن، تۇتىنۋشىلاردىڭ نازارىن اۋدارۋ ماقساتىندا جاسالادى. 12 بەتتىك داپتەردى ارزانداتۋ ءۇشىن پلاستيلين، بوياۋ، ءتۇرلى-ءتۇستى قارىنداش سياقتى باسقا دا سۇرانىسقا يە تاۋارلاردىڭ باعاسىن كوتەرىپ جىبەرەدى. تۇپتەپ كەلگەندە تۇتىنۋشىعا داپتەر تومەن باعامەن ساتىلمايدى. تۇرعىندار 12 بەتتىك داپتەر 40-45 تەڭگەدەن تومەن ساتىلمايتىنىن ءتۇسىنۋى ءتيىس، ويتكەنى داپتەردىڭ وزىندىك قۇنى مەن رەسەيدەن قازاقستانعا جەتكىزۋ قۇنى بار»، - دەپ ەسەپتەيدى كومپانيا پرەزيدەنتى.

قانداي وقۋ قۇرالدارى كوپ قىمباتتادى

وقۋ قۇرالدارىنىڭ جالپى جيىنتىعىنىڭ 50 پايىزدان استامى - كۇندەلىكتەر، 12 پاراق داپتەرلەر، جالپى داپتەرلەر، سۋرەت سالۋ البومدارى، سىزۋ قاعازى، اق كارتون، ءتۇرلى-ءتۇستى كارتون، ءتۇرلى-ءتۇستى قاعاز جانە ت. ب. قاعازدان جاسالادى.

مەكتەپكە ارنالعان قاعاز ونىمدەر رەسەيدەن اكەلىنەدى، سوندىقتان 2022-جىلى كەڭسە تاۋارلارىنىڭ وسى ساناتى باسقالارعا قاراعاندا كوبىرەك قىمباتتادى.

وتباسى ءۇشىن كەڭسە تاۋارلارىن ساتىپ الۋعا كومەك تۋرالى

جىل سايىن «جالپىعا مىندەتتى وقۋ» باعدارلاماسى شەڭبەرىندە مەكتەپ كيىمىن، اياق كيىم، وقۋ قۇرالدارىن ساتىپ الۋ كوزدەلگەن. بيىل 8- تامىزدا ق ر ۇكىمەتىنىڭ 2008-جىلعى 25- قاڭتارداعى 64№ قاۋلىسىنا ەنگىزىلگەن وزگەرىستەرگە سايكەس، ءبىلىم الۋشىلار مەن تاربيەلەنۋشىلەرگە كيىم، اياق كيىم، مەكتەپ كەرەك-جاراقتارىن ساتىپ الۋ ءۇشىن ماتەريالدىق كومەك اتا-اناسىنىڭ نەمەسە ولاردى الماستىراتىن ادامداردىڭ نە كامەلەتكە تولعان ءبىلىم الۋشىنىڭ وتىنىشىنە سايكەس، اقشالاي بەرىلەدى. ماتەريالدىق كومەك الۋشى وتىنىشتەن بولەك، بانك كارتاسىنىڭ 20 تاڭبالى ءنومىرىن ۇسىنادى، ونىڭ يەسىنىڭ نەسيەلىك بەرەشەگى بولماۋى ءتيىس جانە كارتا بۇعاتتالماۋى قاجەت. نەمەسە ول ماتەريالدىق كومەكتى اۋدارۋ ءۇشىن بانكتە ارنايى شوت اشادى.

نۇر- سۇلتان اكىمدىگىندە مىنا ساناتتاعى وقۋشىلارعا كومەك كورسەتىلەدى:

- ا ا ك الۋعا قۇقىعى بار وتباسىلاردان شىققان بالالار؛

- ا ا ك المايتىن، جان باسىنا شاققانداعى تابىسى ەڭ تومەنگى كۇنكورىستەن تومەن وتباسىلاردان شىققان بالالار (37389)؛

- جەتىم بالالار جانە اتا-اناسىنىڭ قامقورلىعىنسىز قالعان بالالار؛

- توتەنشە جاعداي سالدارىنان شۇعىل جاردەمدى تالاپ ەتەتىن وتباسىلاردان شىققان بالالار؛

- باسقا ساناتتار (ومىرلىك قيىن جاعدايعا تاپ بولعان وتباسىلار جانە كەمتار بالالاردى تاربيەلەپ وتىرعان وتباسىلار).

ماتەريالدىق كومەك مولشەرى ءبىر بالاعا 40 مىڭ تەڭگەنى قۇرايدى (ەڭ تومەنگى كۇنكورىس دەڭگەيى - 37389 تەڭگە).

مىسالى، ەلوردادا 16720 دان استام ءبىلىم الۋشىنى قامتۋ جوسپارلانۋدا. ەلوردالىق ءبىلىم باسقارماسىنىڭ مالىمەتىنشە، قالا مەكتەپتەرىنە 8 مىڭنان استام ءوتىنىش تۇسكەن.

سونىمەن قاتار 1- تامىزدا ءداستۇرلى «مەكتەپكە جول» رەسپۋبليكالىق اكسياسى باستالدى. ناۋقان اياسىندا مۇقتاج وتباسىلاردىڭ بالالارىنا (از قامتىلعان، كوپ بالالى وتباسىلار، جەتىم بالالار جانە اتا-اناسىنىڭ قامقورلىعىنسىز قالعان بالالار)، سونداي-اق الەۋمەتتىك سەبەپتەر بويىنشا بالالاردىڭ مەكتەپكە بارماۋىنىڭ الدىن الۋ ماقساتىندا دەمەۋشىلىك قاراجات ەسەبىنەن كومەك كورسەتىلەدى. جاڭا 2022-2023 وقۋ جىلىندا نۇر-سۇلتان اۋداندارىنىڭ اكىمدىكتەرىمەن بىرلەسىپ، الەۋمەتتىك وسال ساناتتاعى 10 مىڭعا جۋىق بالاعا دەمەۋشىلىك قاراجات ەسەبىنەن كەرەك-جاراقتارى بار مەكتەپ ريۋكزاكتارى تاراتىلادى.