قازاقستان شىعاراتىن «شاعالا- م» درونىن سەربيا ساتىپ الدى

None
None
نۇر- سۇلتان. قازاقپارات - «قازاقستان ينجينيرينگ» ۇلتتىق كومپانياسى پيلوتسىز ۇشاتىن «شاعالا- م» اپپاراتىنىڭ سەريالى ءوندىرىسىن جولعا قويىپ جاتىر، دەپ حابارلايدى قازاقپارات ءتىلشىسى.

بۇل تۋرالى اكسيونەرلىك قوعامنىڭ باسقارما ءتوراعاسى تەمىرجان ءابدىراحمانوۆ قازاقپارات ساۋالىنا جولداعان جاۋابىندا ايتتى.

«شىنىمدى ايتسام، مەن اسكەري عىلىممەن اينالىساتىنداردىڭ بارلىعىن بىرىكتىرگىم كەلەدى. قۇزىرەتتىلىك ورتالىعى قۇرىلدى. مىسالى، عالىمدارىمىز بەن كونسترۋكتورلارىمىز «شاعالا» ۇشقىشسىز ۇشۋ اپپاراتىن جاساپ شىعارسا، قازىر ونى جاڭارتىپ، «شاعالا- م» سەريالى ءوندىرىسىن جولعا قويىپ جاتىرمىز. ول كوپ فۋنكتسيالى بارلاۋ ۇشقىشسىز ۇشۋ اپپاراتى بولادى. جاقىندا ءبىز ءوز ماماندارىمىزدىڭ ازىرلەمەسىن سەربيادان كەلگەن سەرىكتەستەرگە ساتتىق. بۇل جاڭا ونىمدەردىڭ العاشقى ەكسپورتتىق مامىلەسى»، - دەيدى كومپانيا باسشىسى.

ۇلتتىق كومپانيا بازاسىندا قورعانىس سالاسىنا قاجەتتى ونداعان جوبا پىسىقتاۋدان ءوتىپ جاتقان كورىنەدى.

«قازىرگى تاڭدا ءبىز ءبىر مەزگىلدە 70-تەن استام اسكەري جانە ازاماتتىق جوبانى ازىرلەپ جاتىرمىز. الداعى 5 جىلدىڭ ىشىندە نارىققا جاڭا ونىمدەر شىعاراتىنىمىزعا سەنىمدىمىن. جاڭا دامۋ تۇجىرىمداماسى اياسىندا ءوندىرىس پەن ەكسپورتتى ءارتاراپتاندىرۋ جوسپارلانۋدا»، - دەيدى تەمىرجان ءابدىراحمانوۆ.

ايتا كەتەيىك، بۇعان دەيىن قورعانىس مينيسترلىگى تۇركيالىق بروندى تەحنيكانى ساتىپ الۋ ءۇشىن سىناقتان وتكىزەتىنىن حابارلاعان بولاتىن.

فوتو : gov.kz

اۆتور

ەسىمجان ناقتىباي

سوڭعى جاڭالىقتار