ەۋروپا قۇرعاقشىلىققا بايلانىستى سۋدى ۇنەمدەۋگە كوشتى

نۇر- سۇلتان. قازاقپارات - فرانسيادا اپتاپ ىستىق پەن تۋريستىك ماۋسىمنىڭ قىزعان شاعىندا سۋدى پايدالانۋعا شەكتەۋلەر ەنگىزىلدى.

ەلدە قۇرعاقشىلىق قاۋپى جاريالاندى، ءبىراق جاعداي ءار ايماقتا ءارتۇرلى جانە سوعان قاراي قابىلدانىپ جاتقان شارالار دا ءبىر- بىرىنەن وزگەشە، دەپ حابارلايدى قازاقپارات.

ماسەلەن، ليوندا ازىرگە كوگالدى سۋارۋعا نەمەسە ماشينا جۋۋعا بولمايدى. تىيىمدى بۇزعانعا ايىپپۇل سالىنۋى مۇمكىن. وڭتۇستىكتەگى لازۋرنىي جاعالاۋىندا جۇزگە جۋىق كوممۋنا سۋ تاپشىلىعىنا ۇشىرادى. جەرگىلىكتى جاعاجايلارداعى دۋش باعانالارىندا سۋ توقتاتىلدى.

قۇرعاقشىلىق كورسەتكىشتەرىنىڭ ءبىرى - سۋ قويمالارىنىڭ تارتىلۋى. ساۆويداعى انسي كولىندە جاز باستالعالى بەرى سۋ دەڭگەيى 33 س م- گە تومەندەدى. ازىرگە بۇل جاعداي فلورا مەن فاۋناعا اسەر ەتپەگەن. ءبىراق، ادامدار قازىردىڭ وزىندە، اتاپ ايتقاندا سۋ كولىگىنە بايلانىستى ءبىراز قيىندىققا تاپ بولىپ جاتىر.

سۋ تاپشىلىعى ەۋروپانىڭ كوپتەگەن ايماقتارى ءۇشىن كۇردەلى ماسەلەگە اينالىپ وتىر. ماجارستاندا مەتەورولوگتار 1901 -جىلدان بەرى، ياعني ءبىر عاسىردان استام ۋاقىتتا بولماعان ەڭ قۇرعاق جەتى ايدى تىركەدى. سۋ رەسۋرستارى باس باسقارماسىنىڭ ءمالىم ەتۋىنشە، بيىل جاۋىن- شاشىننىڭ ورتاشا مولشەرىنىڭ جارتىسى عانا جاۋعان.

ۇلى بريتانيادا اپتاپ ىستىق اۋىل شارۋاشىلىعىنا قيىندىق تۋعىزدى. فەرمەرلەر مالعا كوك ءشوپتىڭ قالماعانىن جانە ەگىندى سۋارۋ ءۇشىن سۋ جەتكىلىكسىزدىگىن ايتادى.

بيلىك سۋ تۇتىنۋدى شەكتەپ جاتسا، ەكولوگتار باتپاقتاردى قالپىنا كەلتىرۋدى ۇسىنىپ وتىر. مامانداردىڭ ايتۋىنشا، بۇل شارا قۇرعاقشىلىقپەن ۇزاق مەرزىمدى كۇرەسۋ ءۇشىن جەتكىلىكتى ىلعال جيناۋعا مۇمكىندىك بەرەدى.

فوتو:euronews.com

اۆتور

اياۋلىم التىنبەك