ءبىز جاقتا اكەسىنەن جاسى كىشىگە اعا دەيدى- باۋىرجان مومىش ۇلىنان سۇحبات الۋعا بارعان ءتىلشى

نۇر- سۇلتان. قازاقپارات - قازاق حالقىنىڭ ابىزى، ۇلت ماقتانىشى باتىر باۋىرجان مومىش ۇلىنىڭ ءومىرىنىڭ كەزەكتى قىزىقتى ءساتىن وقىپ، باتىردىڭ جان دۇنيەسىنە ساپار شەگىڭىزدەر!

بۇل بەلگىلى جازۋشى مارحابات بايعۇتتىڭ ەستەلىگىنەن ءۇزىندى ەكەنىن ەستەرىڭىزگە سالامىز.

مارحابات بايعۇت:

اۋداندىق گازەتتەن وبلىستىق گازەتكە اۋىسقان كەزىم ەدى. باس رەداكتور شاقىرىپ اپ: - «ۆوسحود» قوناقۇيىندە باۋىرجان مومىش ۇلى جاتىر ەكەن. سودان بارىپ سۇحبات الىپ كەلەسىڭ؟ - دەدى. ۇلكەندەردىڭ ەشقايسىسى بارعىسى كەلمەگەن. شوشىپ كەتتىم. باۋكەڭنىڭ جۋرناليستەردى «قالاي قارسى العانى» تۋرالى تالاي ەستىگەنبىز. امال جوق بارۋعا تۋرا كەلدى. بارسام شاردارا جاقتىڭ ءبىر توپ ادامى باۋكەڭە ارنايى سالەم بەرۋگە كەلگەن ەكەن.

باۋكەڭ: - سەن كىمسىڭ؟ - دەپ گۇر ەتە قالدى.

- مەن «وڭتۇستىك قازاقستان» گازەتىنىڭ ءتىلشىسى ەدىم، - دەدىم.

- ءسىز تىلشىلەر اقىماقسىڭدار. حالىقتى جالعان سويلەپ الدايسىڭدار!- دەدى باۋكەڭ ءتۇسىن سۋىتىپ. مەن نە ايتسا دا كونەمىن دەپ بەكىنىپ وتىرمىن. تەك مىنا شاردارالىقتار كەتسە دەپ وتىرمىن. ءبىر كەزدە ولار كەتتى.

مەن: - اعا، - دەپ باستاي بەرىپ ەم: - قايداعى اعا؟ !مەن ساعان اعا ەمەسپىن، اتامىن، - دەدى باۋكەڭ ىزعارلى ۇنمەن. مەن: - ءبىز جاقتا اكەسىنەن جاسى كىشىگە اعا، اكەسىنەن جاسى ۇلكەنگە اتا دەپ سويلەيدى. ءسىزدىڭ جاسىڭىز مەنىڭ اكەمنەن كىشى ، - دەدىم. وسى سوزدەن كەيىن باۋكەڭنىڭ ءجۇزى جىلي باستادى. ايتقان ءسوزىم ۇنادى شاماسى. سۇحباتتاسىپ قايتتىم.

Massaget.kz