قىتايدا اۋا رايىنا قاتىستى توتەنشە جاعدايدىڭ قىزىل بەلگىسى جاريالاندى

نۇر-سۇلتان.قازاقپارات - قىتايدا اۋا رايىنا قاتىستى توتەنشە جاعدايدىڭ قىزىل بەلگىسى ورنادى. ەلدىڭ مەتەورولوگيا ورتالىعى بۇرىن- سوڭدى بولماعان اپتاپ ىستىققا بايلانىستى دابىل قاعۋدا.

شىڭجاڭ، شانسي، حىبي، حىنان سياقتى ەلدىڭ ءبىرقاتار اۋماعىندا كۇننىڭ قاتتى ىسىعانى بايقالادى. مۇنداعى سىناپ باعاناسى 35 پەن 40 گرادۋس شاماسىن كورسەتىپ تۇر. ءتىپتى كەي وڭىردە 40 گرادۋستان اسادى. وسى رەتتە ەل بيلىگى سىرتتا وتەتىن ءىس- شارالارعا ۋاقىتشا توقتاۋ سالىپ، ساقتىق شارالارىن قولدانۋعا ۇندەپ وتىر. اسىرەسە ىستىققا توزە المايتىن جاندار بارىنشا اباي بولۋى ءتيىس.

فرانسيادا 7 مىڭ گەكتار ورمان ورتەنىپ كەتتى

كارى قۇرلىق تا جاھاندىق كليمات وزگەرىسىنىڭ بەلگىلەرىن بيىل جازدا انىق سەزدى. فرانسيانىڭ ورمان ورتىمەن كۇرەسىپ جاتقانىنا بىرنەشە اپتانىڭ ءجۇزى بولدى. ەۋرووداقتىڭ 1500 گە جۋىق ءورت ءسوندىرۋشىسى قىزىل جالىندى سوندىرۋگە جۇمىلعان. قازىردىڭ وزىندە ەلدە شامامەن 7 مىڭ گەكتار ورماندى القاپ ورتەنىپ كەتكەن.

بريتانيادا قۋاڭشىلىق جاريالاندى

ۇلى بريتانيا اۋماعىنىڭ 60 پايىزى قۇرعاپ جاتىر. قازىر ءورت سوندىرۋشىلەر ەلدىڭ وڭتۇستىگىندەگى ورمان ورتىمەن ارپالىسۋدا. بىلتىرعىمەن سالىستىرعاندا ءتىلسىز جاۋدان كەلگەن قاۋىپ 5 ەسەگە ارتقان. مۇندا قاۋىپتىڭ سارى بەلگىسى جاريالانعان. قورشاعان ورتا اگەنتتىگى 14 اۋماقتا قۇرعاقشىلىق جايلاعانىن جاريالادى. اگەنتتىكتىڭ حابارلاۋىنشا، قۋاڭشىلىق كەلەسى جىلعا دەيىن سوزىلۋى مۇمكىن.

يسپانيادا قۋاڭشىلىقتان شارۋالار قينالدى

قۋاڭشىلىق يسپان ەلىندە ابىگەرگە سالدى. اسىرەسە اۋىل شارۋاشىلىعى زارداپ شەگىپ جاتىر. ەلدىڭ اندالۋزيا وڭىرىندەگى فەرمەرلەر جۇزدەگەن اۆوكادو مەن مانگو اعاشىن تىرشىلىك ءنارىنسىز قالدىرۋعا ءماجبۇر. وزگە اعاشقا سۋ جەتكىزۋدىڭ جالعىز عانا امالى وسى بولسا كەرەك. يسپانيانىڭ وڭتۇستىگىندەگى ۆينۋەلا سۋ قويماسى تولىقاندى قىزمەت كورسەتە الماي، قۋاتىنىڭ 12 پروتسەنتىن عانا جاراتىپ وتىر.

ەلەنا سانچەس، سۋ شارۋاشىلىعىنىڭ يەسى:

- مۇناعى تروپيكالىق ءونىم شارۋاشىلىعى قيىن جاعدايعا قالدى. 10 مىڭ ادامدى جۇمىسپەن قامتىپ وتىرعان شارۋاشىلىقتار قىسقارسا بۇل جۇمىسشىلار قايدا بارماق؟ ەكوبەلسەندىلەر اكسياسى گەرمانيانىڭ گامبۋرگ قالاسىندا 150 گە جۋىق ەكوبەلسەندى نارازىلىق اكتسياسىن ۇيىمداستىردى. وسىلايشا ولار قاتتى وتىندى پايدالانۋعا قارسىلىق ءبىلدىردى. ەكوبەلسەندىلەر سۇيىق وتىنعا كوشىپ، قورشاعان ورتاعا كومىرتەگىن بولۋگە توقتاۋ سالۋدى تالاپ ەتۋدە. تەمىرجول رەلسىنە وتىرعانداردى پوليتسيا قىزمەتكەرلەرى كۇشتەپ اكەتۋگە ءماجبۇر بولدى.

www.24.kz