تۇركيادا «قازىرگى موڭعوليا. قازاق اڭگىمەسى» اتتى كىتاپ جارىق كوردى - شەتەلدەگى قازاق ءتىلدى ب ا ق- قا شولۋ
14 تامىز 14:58

تۇركيادا «قازىرگى موڭعوليا. قازاق اڭگىمەسى» اتتى كىتاپ جارىق كوردى - شەتەلدەگى قازاق ءتىلدى ب ا ق- قا شولۋ

نۇر- سۇلتان. قازاقپارات - «قازاقپارات» ح ا ا ادەتتەگىدەي شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

قارتتىقتىڭ باقىتتى كەزەڭىندەگى ءانۋار اقساقال - «حالىق گازەتى»

ىلە قازاق اۆتونوميالىق وبلىسى كۇنەس اۋدانىنىڭ تۇرعىنى 90 جاستاعى ءانۋار نۇربەك ۇلى اتامىزدىڭ كۇندەلىكتى ەرمەگى ەسىك الدىنداعى اعاشتىڭ ساياسىندا وتىرىپ، ويناعان بالالاردىڭ قىلىعىن تاماشالاۋ جانە اتالىق اقىل- كەڭەسىن ايتۋ، دەپ حابارلايدى قىتايدىڭ «حالىق گازەتى» اقپاراتتىق پورتالى.

«حالىق گازەتىنىڭ» مالىمەتىنشە، ءانۋار قارت ۇنەمى ەكى نەمەرەسىن ەرتىپ اتقا ءمىنىپ، ات ابزەلدەرىن جاساپ، كەيدە ءتىپتى ولارعا ءۇي تاپسىرمالارىن ورىنداۋىنا كومەكتەسەدى.

ايتا كەتەيىك، ءانۋار اقساقال اۋىلدا بەدەلى بار قارت. تۋىس- تۋعان، دوس- جاراندارى دا كۇن قۇرعاتپاي كەلىپ اتانىڭ ءحالىن سۇراپ تۇرادى. قازىر جاسى 90 عا كەلسە دە اتامىزدىڭ دەنساۋلىعى جاقسى، بالا- شاعاسى وپالى، كورشى- قولاڭدارى قايىرىمدى، تۇرمىسى باقىتتى. ول ءوزىنىڭ قارتتىق كەزەڭىن باقىتتى سەزىنەدى ەكەن.

قازاقستان مەن تۇركيا اراسىنداعى ىنتىماقتاستىق - TRT

قازاقستان ۇكىمەتى 10-مامىردا تۇركيامەن قول قويىلعان اسكەري بارلاۋ سالاسىنداعى ىنتىماقتاستىق تۋرالى حاتتامانى بەكىتتى. قازاقستان ۇكىمەتى جاريالاعان قاۋلىدا 10 -مامىردا تۇركيامەن قول قويىلعان اسكەري بارلاۋ سالاسىنداعى ىنتىماقتاستىق تۋرالى حاتتاما بەكىتىلگەنى ايتىلعان، دەپ حابارلايدى تۇركيا راديو تەلەديدار اگەنتتىگى.

تۇركيالىق ب ا ق- تىڭ دەرەگىنشە، جارلىقتا ء«تيىستى حاتتاما اياسىندا تاراپتار اسكەري بارلاۋ اقپاراتىمەن الماسۋ جانە وزەكتى ماسەلەلەر بويىنشا ساراپتامالىق قۇجاتتارمەن الماسۋ، ايماقتاعى قاۋىپسىزدىككە قاتەر توندىرەتىن اسكەري جانە ساياسي جاعدايعا قاتىستى وقيعالاردى باقىلاۋ، سونداي- اق حالىقارالىق تەرروريستىك جانە باسقا دا ۇيىمدار تۋرالى ءوزارا اقپارات الماسۋ سياقتى سالالاردا ىنتىماقتاسادى» دەپ جازىلعان.

يران مەن قازاقستان ەكىجاقتى ارىپتەستىكتى دامىتۋ كەرەكتىگىن قۋاتتادى - Parstoday

يراننىڭ اقپاراتتىق جانە كوممۋنيكاتسيالىق تەحنولوگيالار ءمينيسترى يسا زارەپۋر مەن قازاقستاننىڭ سيفرلىق دامۋ، يننوۆاتسيالار مەن اەروعارىش ونەركاسىبى ءمينيسترى باعدات مۋسين ەكىجاقتى ارىپتەستىكتى دامىتۋ كەرەگىن قۋاتتادى.

بۇل تۋرالى وسى اپتادا يراننىڭ «Parstoday» اقپاراتتىق اگەنتتىگى دە حابارلادى.

يراندىق ب ا ق- تىڭ مالىمەتىنە سۇيەنسەك، يسا زارەپۋر قازاقستانعا ساپارىنىڭ ەكىنشى كۇنىندە مينيستر باعدات مۋسينمەن كەزدەسىپ، ەكىجاقتى ارىپتەستىكتى دامىتۋ كەرەگىن باسا ايتىپ، كوممۋنيكاتسيا جانە عارىشتىق تەحنولوگيالار سالالارىندا ورتاق تاقىرىپتاردى تالقىلادى.

وسى كەزدەسۋدە اقىلدى ۇكىمەتتى دامىتۋ سالاسىندا ارىپتەستىك جاساۋ (قازاقستان - ەلەكتروندى ۇكىمەت سالاسىندا دامىعان ەلدەردىڭ ءبىرى) جانە عارىش ونەركاسىبى سالاسىندا دا بىرلەسىپ، ەكى ەلدىڭ عارىش ينفراقۇرىلىمىن بىرلەسە پايدالانۋ، عارىش سالاسىندا عىلىمي زەرتتەۋلەردى دامىتۋ جانە جەرسەرىكتەردى بىرلەسە جاساۋ تاقىرىپتارى تالقىلاندى.

ايتا كەتەيىك، يراندىق كومپانيالاردىڭ قازاقستان نارىعىندا جۇمىس ىستەۋى دە قاراستىرىلىپ، قازاقستاننىڭ تسيفرلىق دامۋ ءمينيسترىنىڭ قولداۋىنا يە بولدى. ءبىر اي بۇرىن قازاقستاندا وتكەن كورمەدە يراندىق كومپانيالار ءوز ونىمدەرىن تانىستىرعان بولاتىن.

قىتايداعى قازاقستاندىق دارىگەر: ناۋقاستارمەن قىتاي تىلىندە اڭگىمەلەسكىم كەلەدى - CNR

حەيلۋڭجيان پروۆينتسياسىنىڭ داچيڭ كوز اۋرۋلار ەمحاناسىنداعى شەتەل ماماندارىنىڭ ەمدەۋ بولىمىندە قازاقستاننان كەلگەن كوز اۋرۋلار مامانى كاپەرابەكوۆ سىبليۆبەك ساداۆيچ(لاقاپ اتى بەك دەپ اتالادى - اۆت.) 24 جىلدا قىتايداعى 200 مىڭعا جۋىق كوز اۋرۋىنا دۋشار بولعان ناۋقاستارعا دياگنوز قويدى جانە ولاردى ەمدەگەن، دەپ حابارلايدى قىتايدىڭ CNR باسىلىمى.

قىتايلىق ب ا ق- تىڭ كەلتىرگەن دەرەگىنە سۇيەنسەك، 1993 -جىلدان 1998 -جىلعا دەيىن بەك تالاي رەت قىتايعا قىزمەتكە ۇسىنىس ەتىپ شاقىرىلعان. سونىمەن 1998 -جىلدان باستاپ ول داچيڭ كوز اۋرۋلار ەمحاناسىندا قىزمەتكە تۇرادى ءارى سول ەمحانانىڭ شەتەلدىك ماماندار توبىنداعى تانىمال مامانعا اينالادى.

«كوز اۋرۋىن ەمدەۋمەن اينالىسقانىنا كوپ جىل بولعان بەكتىڭ تەحنيكاسى وزىق، كاسىبي جاقتان شەبەر بولىپ، كوز اۋرۋىندا ۇنەمى كەزىگەتىن اۋرۋ تۇرلەرى مەن ەمدەۋى قيىن اۋرۋلارعا دياگنوز قويۋ، ەمدەۋ جاعىندا مول تاجىريبەلەرگە يە. اسىرەسە، كوز ءتۇبى اۋرۋىن ەمدەۋدە ءوزىنىڭ ەرەكشە ءادىسى بار»، دەپ جازادى قىتايدىڭ CNR باسىلىمى.

دارىگەر رەتىندە، ناۋقاستى كوز اۋرۋىنان ايىقتىرۋمەن بىرگە، بەك جۇمىستان سىرتقى ۋاقىتتارىندا قىتاي ءتىلىن قۇلشىنا ۇيرەنەدى. قىتايداعى 24 جىلدىق ۋاقىتىندا ول قازىر قىتايلىقتارمەن حانزۋ تىلىندە جەتىك سويلەسىپ، ەش كەدەرگىسىز قارىم- قاتىناس جاساي الاتىن بولدى.

«كۇندەردىڭ بىرىندە ناۋقاسپەن تەك قانا قىتاي تىلىندە سويلەسىپ قانا قويماي، اۋرۋ تاريحىن قىتايشا جازا الاتىن بولامىن»، دەيدى بەك.

تۇركيادا «قازىرگى موڭعوليا. قازاق اڭگىمەسى» اتتى كىتاپ جارىق كوردى - Kaznews

تۇركيادا «GـNـMـZ moğolistan kazak ضYKـSـ» (قازىرگى موڭعوليا قازاق اڭگىمەسى) دەگەن كىتاپ جارىق كوردى. ايگىلى HECE باسپاسىنان شىققان كىتاپتى دايىنداپ، تۇرىك تىلىنە اۋدارعان - اشۋر وزدەمير، دەپ حابارلايدى موڭعوليالىق Kaznews اقپارات اگەنتتىگى.

اتالعان كىتاپقا موڭعوليادا تۋىپ وسكەن وتىز ءۇش قازاق جازۋشىسىنىڭ وتىز ءۇش اڭگىمەسى ەنگەن.

موڭعوليالىق ب ا ق- تىڭ كەلتىرگەن دەرەگىنە سۇيەنسەك، توپتاماعا ەنگەن جازۋشىلار مىنالار: ماقفۋز قۇلىبەك، بايات جانات ۇلى، سويان قاجىباي ۇلى، ەلەۋسىز مۇقامادي ۇلى، ءجامليقا شال ۇلى، اقىن الاقان ۇلى، سۇلتان تاۋكە ۇلى، شىناي راقمەت ۇلى، كاكەي جاڭجۇڭ ۇلى، بوداۋقان توقان ۇلى، رىسبەك زۇرعانباي ۇلى، اباي ماۋقارا ۇلى، بۋراقان ساعيدەن ۇلى، باقىتبەك ءبامىش ۇلى، سۇراعان راحمەت ۇلى، قۋاندىق شاماحاي ۇلى، ازاتقان مۇقان ۇلى، داعجان بەلدەۋباي، امانتاي تويشىباي ۇلى، ەربولات بايات، ەرباقىت ءنۇسىپ ۇلى، اسىلبەك بايتان ۇلى، ەربول بەيىلحان، جاناربەك اقبي، نۇرلان قابداي ۇلى، نۇرعايىپ قاۆسەمەتۇلى، قولعانات مۇرات، الپىسباي ءابدى ۇلى، باقىتبەك قادىر، ماناربەك قادىرباي، قابىلەت بادەلحان، اۋعانباي ساناق ۇلى، نۇريسلام ءابدىل.

ال، كىرىسپە ءسوز رەتىندە ا. حاۋتايدىڭ موڭعوليا قازاقتارى جانە موڭعولياداعى قازاق ادەبيەتى تۋرالى ماقالاسى بەرىلگەن.

اقساقالدار باس قوستى - TRT


قىرعىز ەلورداسى بىشكەكتە بيىل 13-رەت ۇيىمداستىرىلعان تۇرىك مەملەكەتتەرى ۇيىمىنىڭ اقساقالدار كەڭەسىنىڭ جينالىسى باستالدى. اقساقالدار كەڭەسى قۇرامىنا تۇرىكمەنستاننىڭ بۇرىنعى پرەزيدەنتى قۇربانق ۇلى بەردىمۇحامەدوۆ قوسىلدى.

بۇل تۋرالى وسى اپتادا تۇركيا راديو تەلەديدار اگەنتتىگى حابارلادى.

تۇركيادان ادىلەت جانە دامۋ پارتياسىنىڭ ءتوراعاسىنىڭ ورىنباسارى بينالي يىلدىرىم باسشىلىق جاساعان جينالىسقا ت م ۇ باس حاتشىسى باعدات امىرەيەۆ، قىرعىزستان وكىلى مەدەتحان شەرىمقۇلوۆ، ازەربايجان وكىلى حاسان حاسانوۆ، قازاقستان وكىلى يكرام ادىربەك، وزبەكستان وكىلى باحتيار سايفۋللايەۆ قاتىسۋدا. تۇرىكمەنستان اتىنان رەجەپ بازاروۆ كەلدى.

وزبەكستاندا 11-قاراشا كۇنى وتەتىن تمۇ سامميتىنە توقتالعان بينالي يىلدىرىم جينالىستاعى سوزىندە، 29-قىركۇيەك-2-قازان كۇندەرى اراسىندا تۇركيانىڭ بۋرسا قالاسىنىڭ يزنيك اۋدانىندا بۇكىل الەمدىك كوشپەندى ويىندارى وتكىزىلەدى. ونداعى ماقسات - وسى ويىنداردى الەم ەلدەرىنە ناسيحاتتاۋ، مادەني بىرلىكتى نىعايتۋ.

يىلدىرىم وسى ويىنداردىڭ الداعى ۋاقىتتا تۇرىك مەملەكەتتەرى جانە تۇرىك الەمى ءۇشىن وليمپيادا ەرەكشەلىگىندە بولاتىنىن ايتقان.

يىلدىرىم تۇرىكمەنستاننىڭ بۇرىنعى پرەزيدەنتى قۇربانق ۇلى بەردىمۇحامەدوۆتىڭ اقساقالدار كەڭەسىنە قوسىلعانىن ايتقان. «بۇل - اقساقالدار كەڭەسىنە كۇش- قۋات بەرەتىن ماڭىزدى قادام. ونىڭ كەڭەس قۇرامىندا ورىن الۋى بىزگە كۇش بەرەدى» دەدى تۇركيادان ادىلەت جانە دامۋ پارتياسىنىڭ ءتوراعاسىنىڭ ورىنباسارى بينالي يىلدىرىم.

ت م ۇ باس حاتشىسى باعدات امىرەيەۆ تە ەۋرازيا اۋماعىنىڭ ءتۇرلى سىناقتان ءوتىپ جاتقانىن ايتىپ، الەمدە جانە ايماعىمىزدا بولىپ جاتقان قيىنشىلىقتار مەن ەمتيحاندار تۇرىك مەملەكەتتەرىنىڭ ىنتىماقتاستىعىنىڭ ارتۋى كەرەكتىگىن كورسەتەتىن شىندىق، دەدى.

تاشكەنتتە ەكونوميكالىق فورۋم وتەدى - « ءو زا «

2022 -جىلدىڭ 16-17-تامىز كۇندەرى تاشكەنت قالاسىندا وزبەكستان رەسپۋبليكاسىنىڭ شانحاي ىنتىماقتاستىق ۇيىمىنا ءتوراعالىعى اياسىندا ەكونوميكالىق فورۋم وتەدى، دەپ حابارلايدى «ءو ز ا» اقپاراتتىق اگەنتتىگى.

2021 -جىلدىڭ ماۋسىم ايىندا تاجىكستاننىڭ دۋشانبە قالاسىندا العاش رەت وتكەن فورۋم شىۇ اياسىنداعى قارىم- قاتىناستاردى دامىتۋ جانە ودان ءارى نىعايتۋ ءۇشىن ءتيىمدى كوممۋنيكاتسيالىق الاڭعا اينالدى.

وزبەكستاندىق ب ا ق- تىڭ مالىمەتىنە سۇيەنسەك، ءىس- شارانىڭ نەگىزگى ماقساتى - تاراپتاردىڭ نازارىن ءوزارا ءتيىمدى ساۋدا- ەكونوميكالىق، ينۆەستيتسيالىق، مادەني- گۋمانيتارلىق ىنتىماقتاستىقتى دامىتۋدىڭ پروبلەمالارى مەن پەرسپەكتيۆالارىنا اۋدارۋ. سونداي- اق ش ى ۇ كەڭىستىگىندەگى قارىم- قاتىناستاردى كەڭەيتۋ بويىنشا ءتيىمدى شارالاردى ازىرلەۋ.

پلەنارلىق وتىرىستاردان، پانەلدىك پىكىرتالاستار، ەكىجاقتى كەزدەسۋلەر، B2B كەلىسسوزدەردەن تۇراتىن فورۋمنىڭ كۇن ءتارتىبى سيفرلىق ەكونوميكانىڭ الەۋەتىن كوتەرۋ. «جاسىل» تەحنولوگيالاردى، ءوڭىرارالىق ىنتىماقتاستىقتى، ينۆەستيتسيالىق، ونەركاسىپتىك كووپەراتسيانى كەڭەيتۋ جانە باسقا دا باسىم باعىتتاردى اشۋعا ارنالعان.

ايتا كەتۋ كەرەك، ش ى ۇ ەكونوميكالىق فورۋمى ۇكىمەتارالىق ديالوگتى ورناتۋدىڭ عانا ەمەس، سونىمەن قاتار ىسكەر توپتار مەن كاسىپورىندار وكىلدەرىنىڭ ءوزارا ىنتىماقتاستىعىن ورناتۋدىڭ، سونداي- اق ش ى ۇ كەڭىستىگىنىڭ ايماقتارىنا ينۆەستورلاردى تارتۋدىڭ ءتيىمدى الاڭىنا اينالادى دەپ كۇتىلۋدە.

حالىقارالىق ونەر سايىسىندا تىلەكتەس اقىلبەك ۇلى 1 ورىندى يەلەندى - Kaznews

شەتەلدەن كەلگەن قازاق ونەرپازدارى تاراز جۇرتىن ءوز ونەرلەرىمەن ءتانتى ەتتى، دەپ حابارلايدى Kaznews.mn وتانداستار قورىنىڭ باسپا ءسوز قىزمەتىنە سىلتەمە جاساپ.

Kaznews اقپاراتتىق پورتالىنىڭ مالىمەتىنە سۇيەنسەك، 2022 -جىلعى 11-12-تامىز كۇندەرى تاراز قالاسىنداعى «بالاساعۇن» اتىنداعى مادەنيەت سارايىندا «قاسيەتتى قازاق ەلى» حالىقارالىق ونەر فەستيۆالى ءوتتى. فەستيۆالعا شەتەلدەگى 8 ەلدەن كەلگەن ونەرپاز قانداستارىمىز قاتىستى.

فەستيۆال 11-تامىزدا جۇمىسىن باستادى. 12-تامىزدا قاتىسۋشىلاردىڭ بارلىعى ءار اتالىم بويىنشا ونەر كورسەتتى. اتاپ ايتقاندا، فەستيۆال اياسىندا ۆوكال- ءداستۇرلى ءان ايتۋ، جىر ءمۇشايراسى، تەرمە مەن كۇي سايىسى جانە قولونەر نوميناتسيالارى بويىنشا 35 ۇمىتكەر باق سىناسقان. ايتا كەتۋ كەرەك، بۇل فەستيۆلگە قاتىسۋعا بارلىعى 140 ۇمىتكەر تىركەلدى. ونەر فەستيۆالىنە تۇركيا، يران، موڭعوليا، قىتاي، رەسەي، ۋكراينا، وزبەكستان، قىرعىزستان سياقتى مەملەكەتتەردەن كەلگەن ونەرپازدار ىرىكتەلدى.

حالىقارالىق ونەر سايىسىنىڭ باس جۇلدەسىن رەسەيدەن كەلگەن قولونەرشى ايناگۇل بارامبايەۆا (500000 تەڭگە جانە تەليەۆيزور) يەلەندى.

ال ارنايى ءتورت اتالىم بويىنشا وتكەن حالىقارالىق ونەر فەستيۆالىندە تىلەكتەس اقىلبەك ۇلى اباي اتىنداعى «ءمۇشايرا» اتالىمى بويىنشا I ورىندى جەڭىپ العان.

اۆتور

بەيسەن سۇلتان

جاڭالىقتار