اۋعانستاندا ايەلدەر شەرۋگە شىقتى

نۇر-سۇلتان.قازاقپارات -تالىپتەر ميتينگكە شىققان ايەلدەردى اسپانعا وق اتىپ تاراتتى. كابۋلدا نارازىلىق اكسياسى ءوتتى.

قاتىسۋشىلار كوشەلەرگە شىعىپ، «جۇمىس جانە بوستاندىق» دەپ ايقايلادى. نارازىلىق بىلدىرۋشىلەر ايەلدەردىڭ جۇمىسقا، وقۋعا جانە ەلدىڭ ساياسي ومىرىنە قاتىسۋ قۇقىعىن قايتارۋدى تالاپ ەتتى. ءبىر جىل بۇرىن اۋعانستاندا بيلىككە كەلگەن تالىپتەر ميتينگتى تاراتۋ ءۇشىن اۋەگە وق اتتى. بەلسەندىلەر كەيبىر ايەلدەردىڭ ۇستالعانىن ايتتى. بۇقارالىق اقپارات قۇرالدارىنىڭ حابارلاۋىنشا، ميتينگ تۋرالى حابار تاراتقان بىرنەشە جۋرناليست سوققىعا جىعىلعان.

جوليا پارسي، بەلسەندى:

- بۇل وسىدان ءبىر جىل بۇرىن بيلىككە كەلگەن تالىپتەرگە قارسى نارازىلىق. ويتكەنى ولاردا ءالى كۇنگە ناقتى باعدارلاما جوق. قىزدارعا ارنالعان مەكتەپتەر جابىق، ايەلدەر سەبەپسىز جۇمىستان شىعارىلادى، كەدەيشىلىك كۇشەيىپ بارادى. مۇنىڭ ءبارى وسى نارازىلىققا تۇرتكى بولدى.

ب ۇ ۇ مالىمەتتەرى بويىنشا قارۋلى زورلىق- زومبىلىق دەڭگەيىنىڭ ايتارلىقتاي تومەندەۋىنە قاراماستان ەلدە 10 اي ىشىندە 2106 بەيبىت تۇرعىن كوز جۇمعان. 1400 دەن استام ادام جارالاندى. حالىقارالىق ۇيىم وكىلدەرىنىڭ ايتۋىنشا، ايەلدەر مەن قىزداردىڭ، مۇمكىندىگى شەكتەۋلى ادامداردىڭ جانە جۋرناليستەردىڭ قۇقىقتارى ءجيى بۇزىلادى. ولار اۋعانستانداعى ادام قۇقىقتارىن قورعاۋ بويىنشا شۇعىل شارالار قابىلداۋعا شاقىردى.

www.24.kz