تۇركىتىلدەس ەلدەردىڭ بىرلەسكەن انيماتسيالىق جوباسىن جاساۋ ۇسىنىلدى
بۇل تۋرالى ق ر اقپارات جانە قوعامدىق دامۋ ءمينيسترى اسقار وماروۆ پەن ازەربايجان رەسپۋبليكاسى پرەزيدەنتىنىڭ كومەكشىسى - پرەزيدەنت اكىمشىلىگى سىرتقى ساياسات ءبولىمىنىڭ جەتەكشىسى حيكمەت گادجيەۆتىڭ ونلاين كەزدەسۋىندە ايتىلدى، دەپ حابارلايدى قازاقپارات ۆەدومستۆو سايتىنا سىلتەمە جاساپ.
كەزدەسۋ بارىسىندا قازاقستاننىڭ ازەربايجانمەن ىنتىماقتاستىعى جانە دامۋ پەرسپەكتيۆالارى، اتاپ ايتقاندا قازاقستاندىق انيماتسيالىق-مۋلتيپليكاتسيالىق فيلمدەردى ديستريبۋتسيالاۋ، سەريالدىق جانە دەرەكتى ونىمدەرمەن الماسۋ، قازاقستاندىق تەلەارنالاردى ازەربايجان اۋماعىندا تاراتۋ ماسەلەلەرى تالقىلاندى.
«ءبىز ءوز تاجىريبەمىزدى ورتاعا سالامىز جانە ازەربايجاندىق ارىپتەستەر ءۇشىن انيماتسيالىق-مۋلتيپليكاتسيالىق فيلمدەر جاساۋ بويىنشا وقىتۋ كۋرستارىن ۇيىمداستىرۋعا دايىنبىز»، - دەدى اسقار وماروۆ.
سونداي-اق، مينيستر الداعى ءىس-شارالار اياسىندا تۇركىتىلدەس ەلدەردىڭ جاستار ساياساتىنىڭ پرەزەنتاتسياسىن جاساپ، ىنتىماقتاستىقتى نىعايتۋدى ۇسىندى. سونىمەن بىرگە، ازەربايجاندىق مامانداردى ورتا ازياداعى باستى شارا - Astana Media Week-كە شاقىردى.
ءوز كەزەگىندە ازەربايجان تاراپى تۇركىتىلدەس ەلدەردىڭ بىرلەسكەن انيماتسيالىق جوباسىن جاساۋدى ۇسىندى، سونداي-اق قازاقستان تاراپىنا ءوزىنىڭ تەلەۆيزيالىق كونتەنتىن بەرۋگە دايىن ەكەندىگىن ءبىلدىردى. قازاقستاننىڭ انيماتسيالىق فيلمدەر شىعارۋ جونىندەگى تاجىريبەسىنە قىزىعۋشىلىق تانىتتى. سونىمەن قاتار، حيكمەت گادجيەۆ قازاقستان مەن ءازىربايجان اراسىنداعى جاستار ىنتىماقتاستىعىن دامىتۋ جونىندەگى بىرلەسكەن ءىس-شارالار جوسپارىن ازىرلەۋدى ۇسىندى.