الاياق ءوزىن پوليتسيا دەپارتامەنتى باستىعىنىڭ ورىنباسارىمىن دەپ تانىستىرعان - جاڭا ءتاسىل
12 تامىز 22:42

الاياق ءوزىن پوليتسيا دەپارتامەنتى باستىعىنىڭ ورىنباسارىمىن دەپ تانىستىرعان - جاڭا ءتاسىل

نۇر-سۇلتان. قازاقپارات - الاياق ءوزىن پوليتسيا دەپارتامەنتى باستىعىنىڭ ورىنباسارىمىن دەپ تانىستىرىپ، س ق و تۇرعىنىن الداماق بولعان، دەپ حابارلايدى قازاقپارات Polisia.kz سايتىنا سىلتەمە جاساپ.

م. جۇمابايەۆ اۋدانىنىڭ تۇرعىنىنا جەلى الاياعى قوڭىراۋ شالىپ، ءوزىن س ق و پ د باستىعىنىڭ ورىنباسارى رۋسلان نازاروۆپىن دەپ تانىستىرعان. ەر ادام ونىڭ ايتقانىنا سەنبەي، اڭگىمەنى جازىپ الىپ، بولعان جاعداي تۋرالى پوليتسياعا حابارلاعان.

«وسىنداي جاعدايلار ءجيى كەزدەسەدى. الاياقتار ادامعا پسيحولوگيالىق قىسىم كورسەتۋگە تىرىسادى، ويلانۋعا مۇمكىندىك بەرمەي اسىقتىرادى. كريمينالدىق پوليتسيا قىزمەتكەرلەرى تەلەفونمەن مۇنداي سويلەسۋگە بارمايتىنىن ەستە ساقتاعان ءجون. ولار كۋاگەر نەمەسە كۇدىكتى رەتىندە ادامنان جاۋاپ الادى، بۇل ارەكەت تەك الدىن الا حابارلاما جىبەرىلىپ، جەكە كەزدەسۋ كەزىندە جۇزەگە اسادى. كۇماندى قوڭىراۋ تۇسسە، «102» ارناسىنا حابارلاڭىز. پوليتسەيدىڭ اتىن جامىلىپ، ءوزىن تانىستىرعان الاياق بويىنشا قىزمەتكەردىڭ جەكە قابىلداۋىنا جازىلۋعا بولادى. سونىمەن قاتار، ەگەر الاياق ءوزىن بانك قىزمەتكەرىمىن دەپ حابارلاسسا، بانكتىڭ رەسمي تەلەفونىنا قوڭىراۋ شالىپ، قوڭىراۋ شالۋ فاكتىسىن تەكسەرىڭىز. ءوز قورىڭىزدىڭ ساقتالۋىنا كوز جەتكىزۋ ءۇشىن بانككە جەكە جۇگىنىڭىز»، - دەيدى س ق و پ د باستىعىنىڭ ورىنباسارى رۋسلان نازاروۆ.

بەلگىلى بولعانىنداي، سولتۇستىك قازاقستان وبلىسىندا ينتەرنەتتەگى الاياقتار جاڭا ءتاسىلدى بەلسەندى قولدانا باستاعان. «بانكتەن قوڭىراۋ شالۋ تۋرالى» بۇرىنعى ادىستەرىن قولدانار الدىندا، وزدەرىن پوليتسيا نەمەسە پروكۋراتۋرا قىزمەتكەرىمىز دەپ تانىستىرادى. سونىمەن قاتار، ولار قىزمەتتەگى لاۋازىم يەلەرىنىڭ اتىن جامىلىپ، قوڭىراۋ سوعادى. بانكتىڭ جوسىقسىز قىزمەتكەرلەرىنە قاتىستى تەرگەۋ جۇرگىزىلىپ جاتىر دەپ، قۇرباندارىن الدايدى. ءىرى كولەمدە نەسيە رەسىمدەۋگە تىرىسىپ جاتقاندارىن ايتىپ، بۇل جاعدايدان ساقتانۋ ءۇشىن «نۇسقاۋلار» بەرىپ، اقشانى قىلمىسكەرلەر ۇسىنعان شوتقا اۋدارۋعا ماجبۇرلەيدى. مۇنداي تاسىلگە الدانعان ادامدار ميلليونداپ شىعىنعا باتادى.

بيىلعى 7 ايدا س ق و- دا 464 ينتەرنەتتەگى الاياقتىق تىركەلگەن، ونىڭ 129 ى «بانكتەن قوڭىراۋ شالۋ» سحەماسى بويىنشا.

جاڭالىقتار