كىتاپحانالاردا زاماناۋي سيفرلىق قۇرالدار بولۋى قاجەت - داۋرەن ابايەۆ

نۇر-سۇلتان. قازاقپارات - كىتاپحانالاردىڭ زاماناۋي سيفرلىق قۇرالدارمەن قامتاماسىز ەتىلۋى ماڭىزدى. بۇل تۋرالى اقتوبە وبلىسىنا جۇمىس ساپارى بارىسىندا مادەنيەت جانە سپورت ءمينيسترى داۋرەن ابايەۆ ايتتى، دەپ حابارلايدى قازاقپارات ۆەدومستۆونىڭ باسپا ءسوز قىزمەتىنە سىلتەمە جاساپ.

مينيستر الدىمەن م. لومونوسوۆ اتىنداعى ورتالىق قالالىق كىتاپحانادا بولدى. مەكەمە قورىندا شامامەن 28 مىڭ كىتاپ بار. داۋرەن ابايەۆ كىتاپحانالار وقىرماندارعا قولايلى جاعداي جاساپ، زاماناۋي سيفرلىق قۇرالدارعا قول جەتكىزۋدى قامتاماسىز ەتۋى جانە كىتاپ قورىن بايىتۋى قاجەتتىگىن ايتتى.

سونداي-اق، مينيستر مۇمكىندىگى شەكتەۋلى جاندارعا ارنالعان دەنە شىنىقتىرۋ-ساۋىقتىرۋ كەشەنىنىڭ قۇرىلىس بارىسىمەن تانىستى. جاڭا ورتالىقتا باسسەين، ۇستەل تەننيسىن ويناۋعا ارنالعان زال جانە امبەباپ سپورت زالى بولادى. نىسان قۇرىلىسىن جىل سوڭىندا اياقتاۋ جوسپارلانعان.

داۋرەن ابايەۆ ينۆەستيتسيالار تارتۋعا ىقپال ەتەتىن جانە ءوڭىردى حالىقارالىق نارىق پەن ەل ىشىندە ىلگەرىلەتۋمەن اينالىساتىن Visit Aktobe تۋريستىك اقپاراتتىق ورتالىعىندا بولدى. مينيسترگە تۋريستىك ينفراقۇرىلىمدى جاقسارتۋ جانە سالاعا شەتەلدىك ينۆەستورلاردى تارتۋ جوسپارلارى تۋرالى اقپارات بەرىلدى.

سونىمەن قاتار، داۋرەن ابايەۆ رەسپۋبليكالىق ماڭىزى بار «ابات بايتاق قورىمى» ەسكەرتكىشى مەن وبلىستىق «ءاليا» پاتريوتتىق تاربيە بەرۋ ورتالىعىندا بولدى.

بۇگىن مينيستر ازاماتتاردى جەكە ماسەلەلەرى بويىنشا قابىلدايدى جانە Baqytty Bala-2022 ІV اشىق بالالار ۆوكالدىق فەستيۆال-بايقاۋىنىڭ قاتىسۋشىلارىمەن كەزدەسەدى.