باتالون كومانديرى وعاش قىلىق كورسەتتى دەگەن قىزمەتكەردىڭ شاعىمى راستالمادى - مينيسترلىك
قورعانىس مينيسترلىگىنىڭ كوميسسياسى ازاماتشا ا. ب. ەلشىبايەۆانىڭ ايتقان تۇجىرىمى مەن ايعاقتارىن قايتادان مۇقيات زەردەلەدى. كوميسسيانىڭ جان-جاقتى تەكسەرىسىنىڭ ناتيجەسىندە ا. ب. ەلشىبايەۆانىڭ ارىزىندا كورسەتىلگەن فاكتىلەر قۇجاتپەن راستالماعانىن جانە شىندىققا جاناسپايتىنىن انىقتادى، دەپ حابارلايدى قازاقپارات ق و قورعانىس مينيسترلىگىنىڭ باسپا ءسوز قىزمەتىنە سىلتەمە جاساپ.
بۇعان دەيىن، 2022-جىلدىڭ 6- مامىرىندا قونايەۆ گارنيزونىنىڭ اسكەري پوليتسيا ءبولىمى اتالعان اسكەري قىزمەتشىنىڭ جازباشا ءوتىنىشى بويىنشا تەكسەرۋ جۇمىستارىن جۇرگىزگەن. باتالوننىڭ بارلىق جەكە قۇرامى ا. ب. ەلشىبايەۆاعا قاتىستى 54179 اسكەري ءبولىمىنىڭ لاۋازىمدى تۇلعالارى تاراپىنان زاڭسىز ءىس-ارەكەت فاكتىلەرىنىڭ بولعانىن راستامادى.
جاڭا كوميسسيا جۇمىسىنىڭ ناتيجەلەرى جانە قونايەۆ گارنيزونىنىڭ اسكەري پوليتسيا ءبولىمى جيناعان ماتەريالداردى قاراۋ، سونداي-اق 54179 اسكەري ءبولىمى قىزمەتشىلەرىنىڭ تۇسىندىرمەلەرىن تالداۋ بويىنشا ازاماتشا ا. ب. ەلشىبايەۆا ۇسىنعان ايىپتاۋلار راستالمادى.
ايتا كەتۋ كەرەك، بۇرىنعى اسكەري قىزمەتشى قىزمەت اتقارۋ بارىسىندا باتالون قولباسشىلىعى تاراپىنان بىرنەشە مارتە ەسكەرتۋ العان جانە اسكەري ءبولىمنىڭ اۋماعىنا ۇيالى تەلەفوندى زاڭسىز الىپ كىرگەنى ءۇشىن تارتىپتىك جاۋاپقا تارتىلعان بولاتىن.
بيىلعى جىلدىڭ 3- مامىرىندا اتتەستاتتاۋ كوميسسياسىنىڭ شەشىمىنە سايكەس ا. ب. ەلشىبايەۆا جاۋىنگەرلىك دايارلىق باعدارلاماسىن تومەن مەڭگەرگەنى جانە ءتارتىپتى بۇزعانى ءۇشىن ق ر قارۋلى كۇشتەرى قاتارىنان تەرىس پيعىلى بويىنشا شىعارىلدى.
«سونىمەن قاتار قازاقستان رەسپۋبليكاسىنىڭ قولدانىستاعى زاڭىنا سايكەس ا. ب. ەلشىبايەۆا اتتەستاتتاۋ كوميسسياسىنىڭ قورىتىندىسىمەن كەلىسپەگەن جاعدايدا سوت ورگاندارىنا جۇگىنۋگە قۇقىلى ەكەنىن حابارلايمىز»، - دەلىنگەن ق ر قورعانىس مينيسترلىگىنىڭ باسپا ءسوز قىزمەتىنىڭ حابارلاماسىندا.