اكىمدىكتەردىڭ گرانتىنا قۇجات قابىلدانىپ جاتىر – ق ر ع ج ب م

نۇر-سۇلتان. قازاقپارات - اكىمدىكتەردىڭ گرانتىنا قۇجات قابىلداۋ ءجۇرىپ جاتىر، دەپ حابارلايدى قازاقپارات ق ر عىلىم جانە جوعارى ءبىلىم مينيسترلىگىنىڭ باسپا ءسوز قىزمەتىنە سىلتەمە جاساپ.

جەرگىلىكتى اتقارۋشى ورگانداردىڭ ءبىلىم بەرۋ گرانتتارىنا قۇجات قابىلداۋ 10- تامىزدا باستالدى. وتىنىشتەردى جوعارى وقۋ ورىندارىنىڭ قابىلداۋ كوميسسيالارى قارايدى. قۇجاتتاردى قابىلداۋ مەرزىمى تۋرالى اقپاراتتى اكىمدىكتەن نەمەسە ولاردىڭ رەسمي سايتىنان الۋعا بولادى.

جىل سايىن مامانداردى ماقساتتى دايارلاۋعا جەرگىلىكتى اتقارۋشى ورگانداردىڭ (اكىمدىكتەردىڭ) بيۋجەتىنەن ءبىلىم بەرۋ گرانتتارى بولىنەدى.

اكىمدىكتەردىڭ گرانتتارى كونكۋرستىق نەگىزدە تاعايىندالادى. بۇل رەتتە حالىقتىڭ الەۋمەتتىك وسال توپتارىنا جاتاتىن تالاپكەرلەرگە ەرەكشە كوڭىل بولىنەدى.

ەلىمىز بويىنشا جەرگىلىكتى اتقارۋشى ورگاندار 3 مىڭعا جۋىق گرانت ءبولدى. نەگىزىنەن، اكىمدىكتەرگە پەداگوگتەر، مەديتسينا قىزمەتكەرلەرى جانە اۋىل شارۋاشىلىق سالاسىنىڭ ماماندارى قاجەت. بيىل ەلوردا اكىمدىگى باكالاۆريات دەڭگەيى بويىنشا مامانداردى دايارلاۋعا ەڭ كوپ تاپسىرىس بەردى.

نۇر-سۇلتان قالاسىنىڭ اكىمدىگى پەداگوگيكالىق جانە مەديتسينالىق ماماندىقتار ءۇشىن 1200 گە جۋىق گرانت ءبولدى. شىعىس قازاقستان وبلىسى اباي وبلىسىمەن بىرلەسىپ 450 گرانت، اقمولا وبلىسى 229 گرانت تاعايىندادى.

ۇلت ۇستازى احمەت بايتۇرسىن ۇلىنىڭ 150 جىلدىعىن تويلاۋعا وراي قوستاناي وبلىسىنىڭ اكىمدىگى ا. بايتۇرسىنوۆ اتىنداعى قوستاناي وڭىرلىك ۋنيۆەرسيتەتىندە وقۋعا 15 گرانت ءبولدى. ونەر سالاسىنىڭ ماماندارىن دايارلاۋعا تەك سولتۇستىك قازاقستان وبلىسىنىڭ اكىمدىگى گرانت ءبولىپ وتىر، ولار جەرگىلىكتى بيۋجەت ەسەبىنەن 15 مامان وقىتۋعا دايىن.

شىمكەنت قالاسى مەن تۇركىستان وبلىسىنىڭ اكىمدىكتەرى بيىل باكالاۆرياتتا مامانداردى وقىتۋعا تاپسىرىس جاساماعان. الماتى جانە پاۆلودار وبلىسىنىڭ اكىمدىكتەرى ءوڭىردىڭ جوعارى وقۋ ورنىنان كەيىنگى مەديتسينالىق ءبىلىمى بار مامانداردى دايارلاۋ قاجەتتىلىگىن ەسكەرە وتىرىپ، وبلىستىق بيۋجەت قاراجاتىنان تەك ماگيستراتۋرا مەن رەزيدەنتۋرانىڭ ءبىلىم بەرۋ باعدارلامالارى بويىنشا گرانتتار بولەدى.

ءبىلىم بەرۋ گرانتىن تاعايىنداۋ كونكۋرسىنا قاتىسۋ ءۇشىن ۇمىتكەر جوعارى وقۋ ورنىنىڭ قابىلداۋ كوميسسياسىنا كەلەسى قۇجاتتاردى تاپسىرادى: ءبىلىمى تۋرالى قۇجات؛ ۇ ب ت سەرتيفيكاتى؛ جەكە باسىن كۋالاندىراتىن قۇجاتتىڭ كوشىرمەسى؛ جەڭىلدىك ساناتىن راستايتىن قۇجاتتار.

«گرانتتى تاعايىنداۋ تۋرالى شەشىمدى اكىمدىك جانىنان قۇرىلعان ارنايى كوميسسيا قابىلدايدى. جوعارى وقۋ ورىندارىنا قابىلداۋ 25- تامىزعا دەيىن جۇزەگە اسىرىلادى»، - دەلىنگەن ق ر ع ج ب باسپا ءسوز قىزمەتىنىڭ حابارلاماسىندا.