تەحنيكالىق اقاۋدان گرانتقا ىلىنبەي قالعان شىمكەنتتىك تالاپكەردىڭ ماسەلەسى شەشىلدى
ءمينيستردىڭ كەڭەسشىسى تۇلەكتىڭ اتا-اناسىمەن سويلەسىپ، كەتكەن قاتەلىك ءۇشىن ۆەدومتسۆو اتىنان كەشىرىم سۇرادى، دەپ حابارلايدى قازاقپارات عىلىم جانە جوعارى ءبىلىم مينيسترلىگىنىڭ باسپا ءسوز قىزمەتىنە سىلتەمە جاساپ.
«مەكتەپ تۇلەگى تاستان جاسمين قۋانىش قىزى مەملەكەتتىك ءبىلىم گرانتىنىڭ كونكۋرسىنا قاتىسۋ ءۇشىن م. اۋەزوۆ اتىنداعى وڭتۇستىك قازاقستان ۋنيۆەرسيتەتىنە قۇجات تاپسىرعان. قابىلداۋ كوميسسياسىنىڭ مامانى ۇبت سەرتيفيكاتتارىن تاڭداۋ كەزىندە تەحنيكالىق قاتەلىك جىبەرىپ العان. وسىدان كەيىن گرانت يەگەرلەرىنىڭ ءتىزىمى جاريالانعاندا بالاسىنىڭ وقۋعا تۇسپەگەنىن بىلگەن اتا-انا اتالعان وقۋ ورنىنىڭ باسشىلىعىنا، مينيسترلىككە ارىزداندى.
عىلىم جانە جوعارى ءبىلىم مينيسترلىگى وكىلدەرى بۇگىن بۇل ماسەلەنى نازارعا الىپ، شۇعىل شەشىم قابىلدادى. ءمينيستردىڭ كەڭەسشىسى تۇلەكتىڭ اتا-اناسىمەن سويلەسىپ، كەتكەن قاتەلىك ءۇشىن مينيستر مەن مينيسترلىكتىڭ اتىنان كەشىرىم سۇرادى. تەز ارادا تەحنيكالىق قاتەلىك تۇزەتىلىپ، تالاپكەر تاستان جاسمين قۋانىش قىزى ءۇشىن سۇلەيمەن دەميرەل اتىنداعى ۋنيۆەريسيتەتكە گرانت بولىنەتىن بولدى. سونداي-اق، ول جاتاقحانامەن قامتىلادى.
ال، قۇجات قابىلداۋدا قاتەلىك جىبەرگەن م. اۋەزوۆ اتىنداعى وڭتۇستىك قازاقستان ۋنيۆەرسيتەتى قابىلداۋ كوميسسياسىنىڭ مامانىنا «سوگىس» بەرىلدى.
عىلىم جانە جوعارى ءبىلىم ءمينيسترى ساياسات نۇربەك اپپارات باسشىلارىنا جانە جوعارعى وقۋ ورىندارى رەكتورلارىنا تالاپكەرلەردىڭ قۇجاتتارىن قابىلداۋ بارىسىندا مۇقيات بولۋدى ەسكەرتتى»، - دەلىنگەن رەسمي حابارلامادا.