ەلوردا ۆەنەتسياعا اينالماۋى ءۇشىن كارىز جۇيەسى قالىپتى جۇمىس ىستەيتىن ۋاقىت اتالدى
ءبىراق سالا ماماندارى وعان كىرىسپەس بۇرىن ەڭ الدىمەن جەردىڭ استىنداعى سۋدىڭ كولەمى مەن اعاتىن باعىتتارىن انىقتاپ الۋ كەرەك. ايتپەسە مۇنداي قۇرىلىستان ەش پايدا بولمايدى.
وسىدان ءبىر اي بۇرىن ەلوردا اكىمى ەسەپ بەرگەندە جۇرتقا وسىلاي دەپ ۋادە ەتكەن. ايتىلعان ءسوزدىڭ شىندىققا جاناسپايتىنىن قالا تۇرعىندارى اپتانىڭ باسىندا ءوز كوزىمەن كوردى. جاۋاتىن جاڭبىر كولەمى نورمادان ءسال اسقاندا شاھاردىڭ تەڭ جارتىسىن سۋ باستى. جۇمىسشىلار قالا كوشەلەرىنەن 1 مىڭ تەكشە مەتر سۋ سورىپ الدى. گيدروگەولوگيا سالاسى ماماندارىنىڭ پىكىرىنشە، بۇل ماسەلەنى شەشۋ وڭايعا سوقپايدى.
ۆياچەسلاۆ پەتۋحوۆ، گيدروگەولوگ:
- ءبىز قالانىڭ استى سۋعا تولى ەكەنىن بىلەمىز. ءبىراق جەراستى سۋلارىنىڭ كولەمى بەلگىسىز. سوندىقتان الدىمەن ۇڭعىما قازىپ، ىشىنە سۋدى قابىلدايتىن قۇدىق سالعان ءجون. جاڭبىر جاۋعاندا بۇكىل سۋ سوعان جينالادى. كەيىن ول جەردىڭ استىمەن تالدىكول وزەنىنە اعىپ كەتەدى. ياعني ءبىز وسىنداي تاسىلمەن 3-4 ميلليون تەكشە مەتر سۋدان قۇتىلامىز.
جاقىن ارادا قالانىڭ 7 ۋچاسكەسىندە نوسەرگە ارنالعان كارىزدەر جوندەۋدەن وتكىزىلەدى. ءار جوبانىڭ مەردىگەرى بەلگىلەندى. الايدا بۇل باستاما ماسەلەنى شەشە الارىنا كىم كەپىل؟
اسقار ءمۇسىلوۆ، قالا اكىمدىگىنىڭ نوسەر، كارىز جانە سۋمەن قامتۋ ءبولىمىنىڭ باس مامانى:
- جاستار شاعىن اۋدانىندا تازارتۋ قۇرىلىستارى سالىنۋدا. ترياتلون پاركىنىڭ ىشىندە تازارتۋ قۇرىلىستارى، رەكونسترۋكتسيا بار. نۇرلى جول ۆوكزالىنىڭ ماڭىندا ا-86 جانە ب-12 كوشەلەرى بويىنشا بىزدە نوسەر كارىزدەرى سالىنىپ جاتىر.
مامانداردىڭ پىكىرىنشە، مۇنداي جۇمىستاردى باستاماس بۇرىن جەر استىندا قانداي قۇبىلىستار بولىپ جاتقانىن انىقتاپ الۋ قاجەت. ونسىز سۋ باسۋ قاۋپىنەن قۇتىلا المايتىنىمىز انىق.
ۆياچەسلاۆ پەتۋحوۆ، گيدروگەولوگ:
- ەڭ الدىمەن، شاھارداعى سۋدىڭ دەڭگەيىن باقىلاپ وتىراتىن مونيتورينگ جۇيەسىن ازىرلەۋ كەرەك. سول ارقىلى جەراستى سۋلارى قايدا جىلجىپ جاتقانىن كورىپ وتىرامىز. ەسىل وزەنىنە قانشا تەكشە مەترى جەتەتىنىن انىقتاۋ قاجەت. كەي جەرلەردە ەسىلدىڭ دەڭگەيى جەراستى سۋلارىنان جوعارى ورنالاسادى. سول سەبەپتى قالانى ءجيى سۋ باسادى. وعان جول بەرمەۋ ءۇشىن 30 شاقىرىمدىق كانال سالعان ءجون. ءبىز بۇل ۇسىنىستاردى گەولوگيالىق كوميتەتتىڭ وتىرىسىندا ايتقانبىز. ءبىراق ازىرگە مۇنداي جوسپاردى ورىنداۋعا قاراجات جوق.
قالانى سالۋعا اتسالىسقان ينجەنەر ماماندار دا پىكىرىمەن ءبولىستى. ولاردىڭ ايتۋىنشا، كارىز جۇيەسىن بۇلايشا قالدىرۋعا بولمايدى. ياعني ونى ءارى قاراي كەڭەيتىپ، جەر استىنداعى سۋدى تارتۋدىڭ يننوۆاتسيالىق تاسىلدەرىن قولدانۋ قاجەت بولىپ تۇر. سونداي- اق قولدانىستاعى كارىز جۇيەسىن ۋاقىتىلى تازارتۋدى ۇمىپتاعان ابزال دەيدى.