اجەنىڭ ايتار اقىلى

نۇر- سۇلتان. قازاقپارات - شاڭىراقتا اتا مەن اجەنىڭ ءرولى قاشاندا زور. ولار نەمەرەسىنىڭ جاقسى ادام بوپ قالىپتاسۋىنا بىردەن ءبىر سەبەپكەر جاندار دەسەك ارتىق ايتقاندىق ەمەس.

اتا- اجەنىڭ تاربيەسىن كورگەن بالا جامان بولمايدى. اتانىڭ وسيەتى مەن اجەنىڭ اقىلىن تىڭداعان بالادان ەل تۇتقاسىن ۇستار ۇلكەن ازامات شىعادى. بالا بۇگىن بالا بولعانىمەن، ەرتەڭگى شاڭىراققا يە ادام سول. ونىڭ قانشالىقتى شاڭىراقتى ۇستاپ قالۋى بۇگىنگى بەرىلەر تاربيەگە بايلانىستى. اجە نەمەرەسىنە قانداي اقىل ايتادى؟

1. جار قىلىپ الار قىزىڭنىڭ شەشەسىنە قارارسىڭ. شەشە كورگەندى ال. الما اعاشىنان الىسقا تۇسپەيدى.

2. سونان سوڭ اكەسىنە قارا. اكە قاتال، ءارى مەيىرىمدى بولۋى كەرەك. بيلىگى ەركەكتە بولعان ءۇي بەرەكەلى. وسىنى ۇمىتپا.

3. العانىڭ باسقانى ەمەس، اۋەلى سەنى سىيلاسىن. كۇيەۋىن ەرىم، بالالارىمنىڭ اكەسى، بولاشاعىم دەپ سىيلاعان ايەل عانا سەنىمەن قوسا بۇكىل اۋلەتىڭدى قۇرمەتتەيدى. ونىڭ قۇرمەتى ساعان اۋلەتىڭنىڭ الدىندا ابىروي سىيلايدى.

4. ونى قادىر تۇت. بار جاقسى ءسوزىڭدى ارنا. جۇرتتىڭ، بالالارىڭنىڭ كوزىنشە قۇشاقتاپ، سۇيمە. ءوزىڭنىڭ دە، ونىڭ دا قادىرىن قاشىراسىڭ. ونىڭ بارلىعى وڭاشادا قىلار ءىس. ال باسقا ۋاقىتتا كوز قاراسىڭ مەن وعان جاسار جاقسى ءىسىڭ دە جەتىپ جاتىر.

5. ونى قىزعان. تەك جونىمەن بولعانى دۇرىس. ال شامادان ارتىق قىزعانۋ ۇرىس- كەرىسكە سەبەپشى.

6. ونىڭ جاسار ىسىنە ارالاسپا. اقىلدى ايەل سەن ارالاسپاي- اق قاجەت اقىلىن ءوزى كەلىپ سۇراپ الادى.

7. ونى ەشقاشان الداما. كەز- كەلگەن جاعدايدا تەك شىندىقتى ايت. ونىڭ وزىڭە دەگەن سەنىمىن جوعالتىپ الما. سەزىمنىڭ ىرگەتاسى سەنىمنەن قالاناتىنىن ۇمىتپا.

8. قانشا ۇرىس- كەرىس بولسا دا ءوز ارالارىڭدا بولسىن. سىرتقا شىعارۋشى بولما. ۇرىس- كەرىستە يا سەن جەڭىل، يا ول جەڭىلسىن. ال قاتەلىك پەن دۇرىس- بۇرىسىن اشۋلارىڭ باسىلعان سوڭ تالقىلاعان ءجون.

9. نە نارسەگە دە سابىر قىل. باردى قاناعات تۇت. ايەلىڭنەن دە وسىنى تالاپ ەت. سول كەزدە عانا ءومىردىڭ بارلىق توسىن جايلارىنا قارسى تۇرا الاسىڭدار.

Massaget.kz