ورتالىق ازياداعى بىرەگەي مەشىت تاتۋلىق پەن تۇراقتىلىققا ءوز ۇلەسىن قوسادى دەپ سەنەمىن – نازاربايەۆ
بۇل تۋرالى باس مەشىتتىڭ اشىلۋ راسىمىندە نۇرسۇلتان نازاربايەۆ ايتتى، دەپ حابارلايدى قازاقپارات ءتىلشىسى.
«بۇگىن قاسيەتتى جۇما كۇنى ەلوردامىزدا ەڭسەلى مەشىت اشىلىپ وتىر. بۇل ەلوردامىز نۇر- سۇلتان قالاسىنىڭ باس مەشىتى دەپ اتالادى. تاۋەلسىزدىك داۋىرىندە ءبىزدى قولداعان، ەلىمىزدى ەل قىلۋعا جار بولعان اللا تاعالاعا دەگەن قۇرمەتىمىزبەن مەن وسى مەشىتتى سالۋعا نيەت جاسادىم. بۇل باس قالامىز عانا ەمەس، بۇكىل ەلىمىز، بارلىق مۇسىلمان قاۋىمى ءۇشىن ماڭىزدى وقيعا»، - دەپ اتاپ ءوتتى ەلباسى مەشىتتىڭ اشىلۋ راسىمىندە.
نۇرسۇلتان نازاربايەۆ تاۋەلسىزدىك جىلدارى ىشىندە استانادا تالاي عيمارات بوي كوتەرگەنىن، ولاردىڭ بارلىعى دا ۇزدىك عيماراتتار ەكەنىن باسا ايتتى.
«ونىڭ ىشىندەگى بۇل مەشىتتىڭ ورنى جەكە دارا دەپ سانايمىن. تاۋەلسىزدىك تاڭى اتقاننان بەرى ەلىمىزدىڭ ءار تۇپكىرىندە كوپ مەشىت اشىلىپ، جاماعاتتى ريزا قىلعانى بارىمىزگە بەلگىلى. ولاردا وقىلعان نامازدار مەن دۇعالاردى اللا قابىل ەتسىن. مەن مەملەكەت باسشىسى رەتىندە وكىلەتتىگىمدى توقتاتۋدان ءبىر كۇن بۇرىن، 2019 -جىلعى ناۋرىزدا وسى مەشىتتىڭ العاشقى كىرپىشىن قالادىم. سول ساتتە مەنىڭ قاسىمدا قازىرگى پرەزيدەنتىمىز قاسىم- جومارت توقايەۆ بولدى. اللاعا جۇگىنىپ، ريزاشىلىعىمىزدى ءبىلدىرىپ، بولاشاقتا حالقىمىزدىڭ تاۋەلسىزدىگى مەن ەلىمىزدىڭ ەركىندىگى ۇزاعىنان بولسىن دەپ تىلەدىك. اسىل دىنىمىزگە وسىنشا قولداۋ كورسەتۋدى ءاۋ باستان مۇسىلماندىق مىندەتىم، حالقىمنىڭ الدىنداعى پەرزەنتتىك پارىزىم دەپ ءبىلدىم»، - دەدى ول.
ق ر تۇڭعىش پرەزيدەنتى كۇللى الەمدەگىدەي ءبىزدىڭ ەلىمىزدە دە مەشىتتەردىڭ رۋحاني جانە الەۋمەتتىك ماڭىزى زور ەكەندىگىن اتاپ ءوتتى. مەشىت يسلامنىڭ نەگىزگى قۇندىلىقتارىن ناسيحاتتاپ، يگى نيەتتى قاۋىمنىڭ باسىن بىرىكتىرەتىندىگىنە توقتالدى.
«قازىرگى زاماندا بۇل ميسسسيا ەرەكشە ماڭىزدى ءارى وزەكتى دەپ ويلايمىن. بۇكىل ورتالىق ازيا بويىنشا ۇلكەن، بىرەگەي مەشىت تاتۋلىق پەن تۇراقتىلىققا ءوز ۇلەسىن قوسادى دەپ سەنەمىن»، - دەدى نۇرسۇلتان نازاربايەۆ.
اۆتور مارلان جيەمباي