نۇرسۇلتان نازاربايەۆ ورتالىق ازياداعى ەڭ ۇلكەن مەشىتتىڭ اشىلۋ راسىمىنە قاتىستى

نۇر- سۇلتان. قازاقپارات - ەلوردادا ورتالىق ازياداعى ەڭ ۇلكەن مەشىت اشىلدى. اللانىڭ ءۇيىنىڭ اشىلۋ راسىمىنە ەلباسى نۇرسۇلتان نازاربايەۆ ارنايى قاتىستى، دەپ حابارلايدى قازاقپارات ءتىلشىسى.

«بۇگىن ەلىمىزدىڭ رۋحاني ومىرىندە ەلەۋلى كۇن، تاريحي ءسات. قازاق توپىراعىندا بۇرىن- سوڭدى بولماعان، ارعى بەرگى تاريحىمىزدا كەزدەسپەيتىن، قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازاربايەۆتىڭ باستاماسىمەن سالىنعان ساۋلەتى مەن ءسانى جاراسقان ءزاۋلىم مەشىتتىڭ اشىلۋ راسىمىنە قوش كەلدىڭىزدەر. اللا تاعالا مەشىتكە باسىپ كەلگەن قادامدارىڭىزعا ساۋاپتان بەرگەي!» - دەدى قازاقستان مۇسىلماندار ءدىني باسقارماسىنىڭ ءتوراعاسى ناۋرىزباي قاجى تاعان ۇلى.

جاڭا مەشىت قازاقستان رەسپۋبليكاسىنىڭ تۇڭعىش پرەزيدەنتى - ەلباسى نۇرسۇلتان ءابىش ۇلى نازاربايەۆتىڭ باستاماسىمەن ءۇش جىلدىڭ ىشىندە سالىندى. مەشىت ورنالاسقان جەر ۋچاسكەسىنىڭ الاڭى - 10 گەكتار. ونىڭ جالپى الاڭى - 68062 شارشى مەتر. ۇلكەن كۇمبەزدىڭ بيىكتىگى - 83,2 مەتر، ديامەترى - 62 مەتر. مەشىتتىڭ ءتورت مۇناراسى بار. ونىڭ بيىكتى - 130 مەتر.

سونىمەن قاتار، مەشىتتىڭ جەراستى قاباتىندا 440 ورىندىق بانكەت زالى، 405 ورىندىق جابىق پاركينگ، ۆەستيبيۋل، دارەتحانا، تەحنيكالىق، ريتۋالدىق قىزمەت كورسەتۋ ورنى، قۇربان شالۋ ورنى جانە باسقا بولمەلەر ورنالاسقان.

ءبىرىنشى جانە ەكىنشى قاباتتاردا ناماز وقيتىن ورىننان بولەك سىنىپتار، كونفەرەنتس- زال، نەكە قيۋ زالى، قۇران وقيتىن بولمە، تەلەستۋديا، كەڭسەلەر، قىزمەتتىك بولمەلەر، دۇكەندەر، مۇراجاي جانە تەحنيكالىق بولمەلەر بار.

مەشىتتىڭ جالپى سىيىمدىلىعى 235000 ادامدى قۇرايدى، ياعني ءبىر مەزەتتە وسىنشا ادام ساپتا تۇرىپ ناماز وقۋعا مۇمىندىگى بار. اشىق الاڭدا شامامەن 200 مىڭ ادام، ياعني: پوديۋم مەن ساحان ايماعىندا 30 مىڭ ادام، مەشىت اۋلاسىندا 170 مىڭ ادام ءبىر مەزەتتە قۇلشىلىق جاساۋعا مۇمكىندىك بار. مەشىت ىشىندە 35 مىڭ ادام، ياعني: ەرلەرگە ارنالعان ورىندا 30 مىڭ ادام؛ ايەلدەرگە ارنالعان ورىندا 5 مىڭ ادام ناماز وقي الادى.

مەشىتتىڭ سىيىمدىلىعى بويىنشا نۇر- سۇلتان قالاسىنداعى رەسپۋبليكالىق باس مەشىت الەمدەگى ەڭ ۇلكەن 10 مەشىتتىڭ قاتارىنا ەندى.

اۆتور مارلان جيەمباي